സി പി എം കേന്ദ്ര നേതൃത്വത്തിന്റെ പ്രഖ്യാപിത നിലപാടുകൾക്കും ആശയങ്ങൾക്കും വിരുദ്ധമായി പ്രവർത്തിക്കുന്ന സർക്കാരാണ് കേരളം ഭരിക്കുന്നതെന്ന് സി പി എം പോളിറ്റ് ബ്യൂറോയിൽ രുക്ഷ വിമർശനം. മാവോയിസ്റ്റ്, ശബരിമല വിഷയങ്ങളിൽ കേന്ദ്ര നേതൃത്വത്തിന് എതിരെയാണ് പിണറായി സർക്കാരും പാർട്ടിയും പ്രവർത്തിക്കുന്നതെന്ന് വിമർശനം ഉയർന്നു. സ്വന്തം ഗ്രൂപ്പുകാരനായ പ്രകാശ് കാരാട്ടും പിണറായിയെ കൈവിട്ടു.

പിണറായിക്കെതിരെ സീതാറാം യച്ചൂരിയും അദ്ദേഹത്തെ അനുകൂലിക്കുന്ന പി.ബി. അംഗങ്ങളും ഒറ്റക്കെട്ടായി അണിനിരക്കുകയാണ്. പിണറായി സർക്കാർ ചുക്കിനും ചുണ്ണാമ്പിനും കൊള്ളില്ലെന്നാണ് പിബി അംഗങ്ങൾ പറയുന്നത്.

യുഎപിഎ ചുമത്തി വിദ്യാർഥികളെ അറസ്റ്റ് ചെയ്ത സംഭവത്തിൽ സർക്കാരിനെതിരെ സിപിഎം പൊളിറ്റ് ബ്യൂറോയിൽ രൂക്ഷ വിമർശനമാണുണ്ടായത്. വിഷയത്തിൽ വിശദ ചർച്ച നടത്തുന്നതിന് കേന്ദ്ര കമ്മറ്റിക്ക് വിട്ടു. കേന്ദ്ര കമ്മിറ്റിയിലും പിണറായിക്ക് പിന്തുണ കുറവാണ്.

ശബരിമല വിഷയത്തിൽ ലിംഗസമത്വം എന്ന നിലപാടിൽ പി.ബി ഉറച്ചുനിൽക്കും. ശബരിമലയിൽ യുവതി പ്രവേശന വിധി വരുന്നതിന് മുമ്പ് തന്നെ മന്ത്രിമാരും നേതാക്കളും അതിനെതിരെ ശബ്ദം ഉയർത്തിയത് തെറ്റായി പോയെന്ന് പി.ബി. വിമർശിച്ചു. കാള പെറ്റെന്ന് കേൾക്കുമ്പോൾ കയറെടുക്കുന്ന സ്വഭാവം ശരിയല്ലെന്നാണ് പി.ബി. വ്യാഖ്യാനിച്ചത്.

യുഎപിഎ കരിനിയമമാണെന്ന നിലപാട് പാർട്ടി സ്വീകരിക്കുമ്പോൾ പാർട്ടി ഭരിക്കുന്ന കേരളത്തിൽ വിദ്യാർഥികൾക്കെതിരെ യുഎപിഎ ചുമത്തിയത് അനുചിതമാണെന്ന് മൂന്ന് പിബി അംഗങ്ങൾ ചൂണ്ടിക്കാണിച്ചു. പോലീസിനെ പഴിചാരി മാറിനിൽക്കാനാകില്ലെന്നും വിമർശനമുയർന്നു. കൂടുതൽ ചർച്ചകൾ നടത്തുന്നതിനായി വിഷയം കേന്ദ്ര കമ്മിറ്റിക്കു വിടാനും തീരുമാനിച്ചു. ജനുവരിയിൽ കേരളത്തിൽ നടക്കുന്ന കേന്ദ്ര കമ്മിറ്റിയിൽ വിശദമായ ചർച്ചകൾ നടക്കും.

ശബരിമലയിലെ യുവതീപ്രവേശനം സംബന്ധിച്ച് ലിംഗനീതി ഉറപ്പുവരുത്തണമെന്ന നിലപാടിൽ മാറ്റമില്ലെന്ന് പോളിറ്റ് ബ്യൂറോ വ്യക്തമാക്കി. സംസ്ഥാന കമ്മിറ്റി ഇക്കാര്യത്തിൽ കേന്ദ്ര നേതൃത്വത്തിന്റെ നിലപാടിന്അനുയോജ്യമായ തരത്തിലാണ് പ്രസ്താവന ഇറക്കിയതെന്ന് നേതാക്കൾ വ്യക്തമാക്കി. സുപ്രീം കോടതി വിധിയിൽ വ്യക്തതക്കുറവുണ്ടെന്നും സർക്കാർ ഇതുസംബന്ധിച്ച് വ്യക്തത വരുത്തണമെന്നും പോളിറ്റ് ബ്യൂറോ നിലപാടെടുത്തു. ഇതിനായി നിയമ വ്യത്തങ്ങളെ സമീപിക്കാനും തീരുമാനിച്ചു.

യുഎപിഎ അറസ്റ്റ് സംബന്ധിച്ച് മുഖ്യമന്ത്രി പിണറായി വിജയൻ സിപിഎം പൊളിറ്റ് ബ്യൂറോയ്ക്ക് വിശദീകരണം നൽകിയിരുന്നു. പോലീസ് ആണ് വിദ്യാർഥികൾക്കെതിരെ യുഎപിഎ ചുമത്തിയതെന്നും വിഷയം സർക്കാരിന്റെ പരിഗണനയ്ക്ക് വരുമ്പോൾ ഉചിതമായ തീരുമാനം എടുക്കുമെന്നുമാണ് മുഖ്യമന്ത്രി അറിയിച്ചത്. ഇപ്പോഴത്തെ സാഹചര്യത്തിൽ പോലീസിന്റെ സ്വതന്ത്രമായി പ്രവർത്തിക്കാനുള്ള അവകാശത്തിൽ സർക്കാർ ഇടപെടില്ലെന്നും പിണറായി പി.ബി. യോഗത്തെ അറിയിച്ചു. പിണറായിയുടെ അഭിപ്രായത്തെ നേതാക്കൾ പരിഹാസത്തോടെയാണ് നേരിട്ടത്. കേസ് ഹൈക്കോടതിയിൽ വരുമ്പോൾ സഹായിക്കാമെന്നാണ് സർക്കാർ നിലപാട്. ഇക്കാര്യം മലയാളി വാർത്ത റിപ്പോർട്ട് ചെയ്തിട്ടുണ്ട്.

പി.ബിയിൽ പിണറായിയുടെ പിടുത്തം കുറയുകയാണ്. അദ്ദേഹത്തിന്റെ നിലപാടുകൾ തന്നെയാണ് വിനയായി തീർന്നിട്ടുള്ളത്. സംസ്ഥാന നേതാക്കളിൽ ഒരു നല്ല ശതമാനം പിണറായിയെ മനസുകൊണ്ട് എതിർക്കുന്നു. കേരളത്തിൽ ആർക്കും പിണറായിയെ പരസ്യമായി എതിർക്കാൻ ധൈര്യമില്ലാത്തതു കൊണ്ടാണ് പരസ്യമായ എതിർപ്പ് സംഭവിക്കാത്തത്. പിബിയിൽ പ്രകാശ് കാരാട്ടും പിണറായിക്കെതിരെ നീങ്ങിയത് . യു എ പി എ കാരണമാണ്.