അരവണ ക്ഷാമത്തില് അതൃപ്തി പ്രകടിപ്പിച്ച് കെ മുരളീധരന്
കന്നിമാസപൂജകള്ക്കായി നട തുറന്ന ശബരിമലയില് അരവണയ്ക്കും അപ്പത്തിനും ക്ഷാമം നേരിട്ടതില് കടുത്ത അതൃപ്തി പ്രകടിപ്പിച്ച് ദേവസ്വം മന്ത്രി കെ മുരളീധരന്. വേണ്ടിവന്നാല് ഹൈക്കോടതിയില് ആശങ്ക അറിയിക്കുമെന്നും മന്ത്രി മാദ്ധ്യമങ്ങളോട് പറഞ്ഞു. ഇനിയൊരു പരീക്ഷണത്തിന് ഇല്ലെന്നും അദ്ദേഹം കൂട്ടിച്ചേര്ത്തു. പ്ളാന്റിന്റെ ശേഷി വര്ദ്ധിപ്പിക്കുന്ന പണികള്ക്കായി പ്രസാദ നിര്മ്മാണം നിര്ത്തിവച്ചതാണ് അരവണ ക്ഷാമത്തിന് കാരണമായത്.
സാധാരണയായി നട അടയ്ക്കുന്ന സമയങ്ങളിലാണ് പ്ളാന്റില് പണികള് നടത്തുന്നത്. എന്നാല് നട തുറന്ന സമയത്ത് തന്നെ ഇത്തരത്തില് പ്ലാന്റില് പണികള് നടത്തുന്നത് ശരിയല്ല. അതിനാലാണ് അരവണ ക്ഷാമം വന്നത്. ഒരു കാര്യം ഞാന് പറയാം. ഇങ്ങനെ പ്രസ്താവന ഇറക്കിയിട്ട് കാര്യമില്ല. സര്ക്കാരിന് അതിന്റെ ഉത്തരവാദിത്വം നിര്വഹിച്ചേ മതിയാകൂ. വേണ്ടിവന്നാല് ഹൈക്കോടതിയില് ഞാന് ആശങ്ക അറിയിക്കും.ഒരു കാരണവശാലും ഇങ്ങനെ പരീക്ഷണത്തിന് നില്ക്കാന് ഞങ്ങള്ക്ക് കഴിയില്ല. മണ്ഡലകാലത്തിന് മുന്പ് ദര്ശനത്തിന് വരുന്നവര്ക്ക് അരവണയും അപ്പവും വേണ്ടേ? ബോര്ഡ് പറയുന്നതിന് ഒരു അടിസ്ഥാനം വേണ്ടേ? നട തുറന്നിരിക്കുമ്പോള് ഭക്തര്ക്ക് പ്രസാദം ലഭിക്കണം. അതിന്റെ സംവിധാനം ഒരുക്കേണ്ടത് ദേവസ്വം ബോര്ഡാണ്. നട അടയ്ക്കുമ്പോള് പ്ലാന്റില് പണികള് നടത്തിയാല് പോരെ? അല്ലെങ്കില് ബദല് സംവിധാനം കൊണ്ടുവരണം. ഇപ്പോള് ഉണ്ടായ അരവണ ക്ഷാമം ഒരു സൂചനയാണ്. മുഖ്യമന്ത്രിയുമായി ആലോചിച്ച് ഇതില് ശക്തമായ നടപടിയെടുക്കും' മന്ത്രി വ്യക്തമാക്കി.
കഴിഞ്ഞദിവസം, തിരുവിതാംകൂര് ദേവസ്വം ബോര്ഡ് പ്രസിഡന്റ് കെ ജയകുമാറിനെ ഫോണില് വിളിച്ച് ദേവസ്വം മന്ത്രി അതൃപ്തി അറിയിച്ചിരുന്നു. കരുതല് ശേഖരം ഒരുക്കുന്നതില് ബോര്ഡിന് വീഴ്ചപറ്റിയെന്ന് വിമര്ശിച്ചു. മുന് വര്ഷങ്ങളില് പ്ലാന്റിന്റെ ശേഷി വര്ദ്ധിപ്പിക്കുകയോ അറ്റകുറ്റപ്പണികള് നടത്തുകയോ ചെയ്യുമ്പോള് അരവണ നിര്മ്മാണം പൂര്ണമായി നിറുത്തിയിരുന്നില്ല.മുന് വര്ഷങ്ങളില് 2.50 മുതല് 2.80ലക്ഷം ടിന് അരവണയാണ് കന്നി മാസത്തില് വിറ്റുപോയിരുന്നത്.
അതിന്റെ അടിസ്ഥാനത്തില് 3.20 ലക്ഷം ടിന് അരവണ കരുതല് ശേഖരമായി നിര്മ്മിച്ചശേഷം പ്ളാന്റുകള് നിറുത്തിവയ്ക്കുകയായിരുന്നു. എന്നാല് നടതുറന്ന് രണ്ട് ദിവസത്തിനുള്ളില് 80 ശതമാനത്തിലധികം അരവണയും തീര്ന്നു.മണ്ഡല മകരവിളക്ക് കാലത്ത് കഴിഞ്ഞ വര്ഷം മൂന്നു മുതല് നാലു ലക്ഷം ടിന് വരെ അരവണയാണ് വിറ്റിരുന്നത്. പ്രതിദിനം 2 മുതല് 2.25 ലക്ഷം ടിന് അരവണയാണ് ഉത്പാദിപ്പിച്ചിരുന്നത്. തീര്ത്ഥാടനം തുടങ്ങും മുമ്പു അരക്കോടി ടിന് അരവണ കരുതല് ശേഖരമായി നിര്മ്മിച്ചിരുന്നതിനാലാണ് കഴിഞ്ഞ വര്ഷം ക്ഷാമം ഉണ്ടാകാതിരുന്നത്.
https://www.facebook.com/Malayalivartha
