ആയുര്‍വേദ ഡിസ്പന്‍സറിയില്‍ പരിശോധന നടന്നതിന് പിന്നാലെ ജീവനക്കാരി ആത്മഹത്യ ചെയ്ത സംഭവത്തിൽ ആത്മഹത്യാക്കുറിപ്പ് പുറത്ത്. ഡിസ്പന്‍സറിയില്‍ സ്റ്റോക്കുണ്ടായിരുന്ന മരുന്നില്‍ കുറവുവന്നതായി ആരോപിച്ച് ശനിയാഴ്ച രാവിലെ ഒരുവിഭാഗം ആളുകള്‍ സ്ഥാപനത്തിലെത്തി പ്രതിഷേധിച്ചിരുന്നു. മരുന്ന് എടുത്തുമാറ്റിയശേഷം കുപ്പികളില്‍ വെള്ളം നിറച്ചുവൈച്ചന്നായിരുന്നു പ്രധാന ആരോപണം. സ്റ്റോക്ക് പരിശോധനയുടെ പേരിൽ ഡോക്ടറും പഞ്ചായത്തംഗങ്ങളും അപമാനിച്ചതിനെ തുടർന്നാണ് അരുണ ജീവനൊടുക്കിയതെന്നു ബന്ധുക്കളും സിപിഎം പ്രാദേശിക നേതൃത്വവും ആരോപിച്ചിരുന്നു. മൃതദേഹം കണ്ടെത്തിയ മുറിയിൽ നിന്നാണ് അരുണയുടേതെന്ന് കരുതപ്പെടുന്ന കുറിപ്പ് പോലീസിന് കിട്ടിയത്. 

മകന്റെ സ്കൂൾ നോട്ട് ബുക്കിൽ അരുണ കുറിച്ചത് ഇങ്ങനെയായിരുന്നു... ‘എന്റെ മരണത്തിന് ഉത്തരവാദികൾ ഡോക്ടർ, മെംബർമാർ എന്നിവരാണ്. എന്നെ അത്രയ്ക്കു തരം താഴ്ത്തി അവർ – അരുണ. അരുണ അവധിയിലായിരുന്ന 15നാണ് ആശുപത്രിയിൽ മരുന്നു കുറവാണെന്നു ഡോക്ടർ രത്നകുമാർ പഞ്ചായത്തംഗം എം.സാബുവിനെ വിവരമറിയിച്ചത്. തുടർന്ന്, 16ന് രാവിലെ പഞ്ചായത്ത് പ്രസിഡന്റ് ജിമ്മി വി. കൈപ്പള്ളി  ഉൾപ്പെടെ പഞ്ചായത്തംഗങ്ങൾ ആശുപത്രിയിലെത്തി ചർച്ച നടത്തി. ചില കുപ്പികളിൽ വെള്ളം നിറച്ചിരിക്കുകയാണെന്നു സംശയം തോന്നിയതോടെയാണ് ആയുർവേദ ഡിഎംഒയെ അറിയിച്ച ശേഷം കൂടുതൽ പഞ്ചായത്തംഗങ്ങളെ വരുത്തി വിശദമായ പരിശോധന നടത്തിയതെന്ന് പഞ്ചായത്ത് സ്ഥിരം സമിതി അധ്യക്ഷൻ ആർ.റോഷിൻ പറഞ്ഞു. ഇന്ന് അടിയന്തര പഞ്ചായത്ത് കമ്മിറ്റി കൂടി വിഷയം ചർച്ച ചെയ്യാമെന്നു പ്രസിഡന്റ് അറിയിച്ചതിനെ തുടർന്നാണ് ശനിയാഴ്ച പരിശോധന അവസാനിപ്പിച്ചത്.

വൈകീട്ട് മൂന്നുമണിയോടെ ഡിസ്പന്‍സറിയില്‍നിന്ന് പോയ അരുണ വീട്ടിലെത്തുമ്പോള്‍ ഭര്‍ത്താവും മക്കളും സ്ഥലത്തുണ്ടായിരുന്നില്ല. ഡ്രൈവറായ ഭര്‍ത്താവ് ജോലിക്ക് പോയിരിക്കുകയായിരുന്നു. മക്കള്‍ ട്യൂഷന്‍ ക്ലാസിലും. അഞ്ചരയായിട്ടും അരുണയെ കാണാതായപ്പോള്‍ സഹോദരി ഫോണില്‍ വിളിച്ചു. ഫോണ്‍ എടുക്കാത്തതിനാല്‍ ബന്ധുക്കള്‍ വീട്ടിലെത്തിയപ്പോഴാണ് തൂങ്ങിയനിലയില്‍ കാണുന്നത്. ഉടന്‍ ഗവ. ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. അരുണയുടെ മുറി പോലീസ് സീല്‍ ചെയ്ത്
പോലീസ് കാവലും ഏര്‍പ്പെടുത്തിയിരുന്നു.

അതേ സമയം കാർത്തികപ്പള്ളി എരികാട് ഗവ.ആയുർവേദ പ്രാഥമികാരോഗ്യ കേന്ദ്രത്തിൽ പഞ്ചായത്തംഗങ്ങൾ നടത്തിയ പരിശോധനയെ തള്ളിപ്പറഞ്ഞ് കാർത്തികപ്പള്ളി പഞ്ചായത്ത് പ്രസിഡന്റ്. പ്രാഥമികാരോഗ്യ കേന്ദ്രത്തിൽ പരിശോധന നടത്താൻ പഞ്ചായത്തംഗങ്ങൾക്ക് അധികാരമില്ലെന്നു പ്രസിഡന്റ് ജിമ്മി വി.കൈപ്പള്ളി പറഞ്ഞു. പഞ്ചായത്തംഗങ്ങൾ നടത്തിയ പരിശോധനയെ തുടർന്ന് അധിക്ഷേപം നേരിട്ടതാണ് താൽക്കാലിക ജീവനക്കാരി അരുണയുടെ മരണത്തിന് വഴിവെച്ചതെന്ന ആരോപണം ഉയരുന്നതിനിടയിലാണ് പരിശോധനയെ  പഞ്ചായത്ത് പ്രസിഡന്റ് തള്ളിപ്പറഞ്ഞത്.‌

സിപിഎം ഭരിക്കുന്ന പഞ്ചായത്തിലെ ആരോഗ്യ സ്ഥിരം സമിതി അധ്യക്ഷൻ കോൺഗ്രസ് അംഗമായ ആർ.റോഷിനാണ്. റോഷിന്റെ നേതൃത്വത്തിലാണ് കോൺഗ്രസ്, ബിജെപി അംഗങ്ങൾ ചേർന്ന് ആശുപത്രിയിൽ പരിശോധന നടത്തിയത്. ആശുപത്രി സ്ഥിതി ചെയ്യുന്ന വാർഡിലെ പഞ്ചായത്തംഗം കോൺഗ്രസിലെ എം.സാബുവാണ്. സിപിഎം കാർത്തികപ്പള്ളി ബ്രാഞ്ച് അംഗമാണ് മരിച്ച അരുണയുടെ അച്ഛൻ രവീന്ദ്രൻ.