വോട്ടര്‍ ഐഡന്റിറ്റി കാര്‍ഡിലെയോ ആധാർ കാർഡിലെയോ ചിത്രം കണ്ടാല്‍ പലരേയും തിരിച്ചറിയാന്‍ വളരെ ബുദ്ധിമുട്ടായിരിരിക്കും. ചിത്രം മാറ്റാന്‍ തെരഞ്ഞെുപ്പ് കമ്മീഷന്‍ പല തവണ അവസരം നൽകിയിട്ടുണ്ടെങ്കിലും ആ അവസരം പലരും അറിഞ്ഞിട്ടേയില്ല. ഇതിനായി മൂന്ന് തവണ അവസരം നല്‍കിയിട്ടും കേരളത്തില്‍ ഇത് പ്രയോജനപ്പെടുത്തിയത് ഏഴ് ശതമാനം പേര്‍ മാത്രമാണ്.

വോട്ടര്‍ കാര്‍ഡിലെ തെറ്റു തിരുത്താനും , ചിത്രം മാറ്റാനും കേന്ദ്ര തെരഞ്ഞെടുപ്പ് കമ്മീഷന്‍ നടത്തുന്ന ഇലക്‌ട്രേഴ്‌സ് വെരിഫിക്കേഷന്‍ പ്രോഗ്രാമിന്റെ അവസാന തിയതി ഈ മാസം 30 വരെ നീട്ടി. www.nvsp.in എന്ന വെബ്‌സൈറ്റ്,മൊബൈല്‍ ആപ്പ്, ബൂത്ത് ലെവല്‍ ഓഫീസര്‍ എന്നിവ മുഖേന വോട്ടര്‍ പട്ടിക പരിശോധിക്കാനും തെറ്റ് തിരുത്താനും അവസരമുണ്ട്.

പുതുക്കിയ കാര്‍ഡ് തപാല്‍ വഴി ലഭിക്കും. നിലവില്‍ ,സംസ്ഥാനത്തെ 2.62 കോടി വോട്ടര്‍മാരില്‍ 18 ലക്ഷത്തില്‍ താഴെ ആളുകള്‍ മാത്രമാണ് ഇത് ചെയ്തത്. ഫോട്ടോ മാറ്റാന്‍ ചെയ്യേണ്ടത്

# www.nvsp.in എന്ന വെബ്‌സൈറ്റില്‍ പ്രവേശിക്കുക.അല്ലെങ്കില്‍ വോട്ടര്‍ ഹെല്‍പ്പ് ലൈന്‍ എന്ന മൊബൈല്‍ ആപ്ലിക്കേഷന്‍ ഡൗണ്‍ലോഡ് ചെയ്യുക.

#ഇലക്‌ട്രേഴ്‌സ് വെരിഫിക്കേഷന്‍ പ്രോഗ്രാം എന്ന ഭാഗത്ത് ക്ലിക്ക് ചെയ്യുക.

# യൂസര്‍ അക്കൗണ്ട് രജിസ്റ്റര്‍ ചെയ്യാന്‍ മൊബൈല്‍ നമ്പര്‍ നല്‍കി അതില്‍ ലഭിക്കുന്ന ഒടിപി ടൈപ്പ് ചെയ്യുക.

# അതിന് ശേഷം തിരിച്ചറിയല്‍ കാര്‍ഡ് നമ്പര്‍,പേര്,ഇ മെയില്‍ ഐഡി, പാസ് വേഡ് എന്നിവ നല്‍കുക.

# വോട്ടറുടെ വിവരങ്ങള്‍ പേജില്‍ വരും. തെറ്റുണ്ടെങ്കില്‍ എഡിറ്റ് എന്ന ഓപ്ഷനില്‍ തിരുത്താം.

# ഫോട്ടോ എഡിറ്റ് എന്ന ഭാഗത്ത് ക്ലിക്ക് ചെയ്ത് ചിത്രവും മാറ്റാം.