അറുപതാമത് കൗമാരകലാവസന്തത്തെ വരവേല്‍ക്കാന്‍ സപ്ത സംഗമ ഭൂമി ഒരുങ്ങി.. കലോത്സവത്തിന്‍റെ പ്രചരണാർത്ഥം വിവിധ കമ്മറ്റികൾ അവസാന വട്ട ഒരുക്കത്തിലാണ്.കലകളുടെയും കർഷകസമരം ചിത്രങ്ങളുടെയും കഥ പറയുന്ന കാസർഗോഡിന് ഇനി ആവേശത്തിന്റെ നാളുകൾ.രണ്ടുവേദികളുള്ള നീലേശ്വരവും കലയുടെ ആവേശത്തില്‍ കണ്ണിചേരുന്നുണ്ട്. സംസ്ഥാനകലോത്സവം ജില്ലയില്‍ രണ്ടാംതവണയാണ്. 

കാഞ്ഞങ്ങാട് സംസ്ഥാന സ്‌കൂൾ കലോത്സവത്തിന്‍റെ പ്രധാന ഭാഗമായ ലൈറ്റ് ആന്‍റ് സൗണ്ടിന്‍റെ സ്വിച്ച് ഓൺ കർമ്മം ഇന്ന് വൈകിട്ട് 5 മണിക്ക് ഐങ്ങോത്ത് പ്രധാന വേദിയിൽ നടക്കും. കലോത്സവത്തിൽ പങ്കെടുക്കുന്നവർക്കുള്ള ഭക്ഷണം നൽകുന്നതിനായി അടുക്കളയിലെ പാൽകാച്ചൽ ചടങ്ങ് ഇന്ന് നടക്കും. മറ്റു ജില്ലകളിൽ നിന്നും എത്തുന്ന മത്സരാർത്ഥികളെ സ്വീകരിക്കുന്നതക്കമുള്ള നിരവധി പരിപാടികളാണ് സംഘാടകർ അവസാന മണിക്കൂറിൽ ഒരുക്കിയിട്ടുള്ളത്.സ‌്കൂൾ കലോത്സവത്തിന്റെ 30 വേദികളെയും പരസ്പരം ബന്ധിപ്പിക്കുന്ന ഹൈടെക് സംവിധാനമൊരുക്കുമെന്ന്‌ മന്ത്രി സി രവീന്ദ്രനാഥ്‌ പറഞ്ഞു.
എവിടെയെങ്കിലും എന്തെങ്കിലും കുറവുണ്ടായാൽ സെക്കന്റുകൾക്കകം അറിയാനും പരിഹരിക്കാനും അതുവഴി സാധിക്കുമെന്നും ഒരുക്കങ്ങൾ അവലോകനംചെയ്യാൻ ചേർന്ന യോഗത്തിൽ മന്ത്രി പറഞ്ഞു.

നവംബര്‍ 28 മുതല്‍ ഡിസംബര്‍ ഒന്നുവരെ നടക്കുന്ന കലാമാമാങ്കത്തിന് മണ്‍മറഞ്ഞ മഹാരഥന്‍മാരുടെ പേരുവഹിക്കുന്ന വേദികള്‍.ഓരോ വേദിക്കും കാസര്‍കോട് ജില്ലയുടെ അഭിമാനമായ കവികളുടെയും, എഴുത്തുകാരുടെയും കലാ സാംസ്കാരിക പ്രവര്‍‍ത്തകരുടെയും പേരുകളാണ് നല്‍കിയിരിക്കുന്നത്.28 വേദികളിലായി 239 ഇനങ്ങളിലാണ് മത്സരം നടക്കുക. കലാ മേളയുടെ ആദ്യ ദിനം 74 ഇനങ്ങളും, രണ്ടാം ദിനം 77 ഇനങ്ങളും, മൂന്നാം ദിനം 74 ഇനങ്ങളും 28 വേദികളിലായി നടക്കും. സമാപന ദിവസമായ നാലാം ദിനം സമാപന പരിപാടികള്‍ വൈകിക്കാത്ത രീതിയില്‍ 14 ഇനങ്ങള്‍ മാത്രമാണ് ഇപ്പോള്‍ നിശ്ചയിച്ചിരിക്കുന്നത്. 239 ഇനങ്ങളിലായി 13000 ത്തോളം വിദ്യാര്‍ത്ഥികള്‍ കാഞ്ഞങ്ങാട് അറുപതാമത് സംസ്ഥാന സ്കൂള്‍ കലോത്സവത്തില്‍ മത്സരിക്കാനായെത്തും.
ബല്ലാ ഈസ്റ്റ് ഗവ. ഹയര്‍ സെക്കന്‍ഡറി സ്‌കൂളിലെ വേദിയില്‍ പൊതുവിദ്യാഭ്യാസവകുപ്പിന്റെ വിദ്യാഭ്യാസപ്രദര്‍ശനം 'ദിശ'.പുതിയ ബസ്സ്റ്റാന്‍ഡിലെ ബാലകൃഷ്ണന്‍ മാങ്ങാട് സ്മാരക വേദിയില്‍ സാംസ്‌കാരികപരിപാടികളും മറ്റൊന്നില്‍ പ്രദര്‍ശനവും.
എല്ലാ വേദികളിലും രാവിലെ 9 മണി മുതല്‍ മത്സരങ്ങള്‍ ആരംഭിക്കും. മറ്റു ജില്ലകളില്‍ നിന്നും എത്തുന്ന മത്സരാര്‍ത്ഥികള്‍ക്ക് കാഞ്ഞങ്ങാട് റെയില്‍വേ സ്റ്റേഷനില്‍ ബുധനാഴ്ചയും വ്യാഴാഴ്ചയും സ്വീകരണം നല്‍കും. ദിവസം 12000 പേര്‍ക്ക് ഭക്ഷണം വിളമ്ബാനുള്ള ഊട്ടുപുരയില്‍ ഇന്ന് പഴയിടം മോഹനന്‍ നമ്ബൂതിരിയുടെ നേതൃത്വത്തില്‍ പാല് കാച്ചും.
മഹാകവി പി യുടെ നാമധേയത്തിലുള്ള ഐങ്ങോത്ത് ഗ്രൗണ്ടിലെ പ്രധാനവേദിയില്‍ വ്യാഴാഴ്ച രാവിലെ എട്ടിന് പൊതുവിദ്യാഭ്യാസ ഡയറക്ടര്‍ ജീവന്‍ ബാബു പതാക ഉയര്‍ത്തും. ഒമ്ബതുമണിക്ക് സ്പീക്കര്‍ പി ശ്രീരാമകൃഷ്ണന്‍ അറുപതാമത് മേളയുടെ ഉദ്ഘാടനം നിര്‍വഹിക്കും സ്വാഗത സംഘം ചെയര്‍മാന്‍ കൂടിയായ മന്ത്രി ഇ ചന്ദ്രശേഖരന്‍, വിദ്യാഭ്യാസ മന്ത്രി സി രവീന്ദ്രനാഥ് ,മന്ത്രി രാമചന്ദ്രന്‍ കടന്നപ്പള്ളി, സിനിമാ താരം ജയസൂര്യ, ജനപ്രതിനിധികള്‍ തുടങ്ങി പ്രമുഖരുടെ സാന്നിധ്യം കൊണ്ട്സമ്പന്നമാകും ഉദ്ഘാടന വേദി.

മത്സരാര്‍ത്ഥികളെ വിവിധ വേദികളില്‍ എത്തിക്കാന്‍ 40 ബസുകള്‍ ഉള്‍പ്പെടെ വിപുലമായ ഗതാഗത സൗകര്യങ്ങളാണ് ഏര്‍പ്പെടുത്തിയിട്ടുള്ളത്. മന്ത്രി ഇ ചന്ദ്രശേഖരന്‍ ചെയര്‍മാനായ സംഘാടക സമിതിക്ക് കീഴില്‍ 21 സബ് കമ്മിറ്റികള്‍ ആണ് കലോത്സവത്തിന് വിജയകരമായ നടത്തിപ്പിനായി പ്രവര്‍ത്തിക്കുന്നത്.
നാളെ വേദി ഒന്നിൽ മോഹിനിയാട്ടവും സംഘ നൃത്തവും നടക്കും രാവിടെ 9 മണിയോടെ നടക്കുന്ന ഉദ്ഘാടന ചടങ്ങിൽ പതിനഞ്ച് മിനിറ്റ് ദൈര്‍ഘ്യമുള്ള സ്വാഗത ഗാനം അടക്കം ഒരുങ്ങി കഴിഞ്ഞു.

കലോത്സവ പ്രചരണത്തിന് പൂരക്കളിയോടെ കൊട്ടി കലാശം ഇന്ന് നടക്കും വൈകുന്നേരം 4.30ന് കാഞ്ഞങ്ങാട് ആലാമിപ്പള്ളി പുതിയ ബസ് സ്റ്റാൻഡ് പരിസരത്ത് അരങ്ങേറുന്ന പൂരക്കളിയിൽ കാസർകോടിന്‍റെ പൈതൃകവും, സംസ്‌കാരവും കലോത്സവവുമായി കോർത്തിണക്കിയ പാട്ട് പാടിയാണ് 60 കലാകാരൻമാർ ചേർന്നു പൂരക്കളിഅവതരിപ്പിക്കുന്നത്. ഓരോ കമ്മറ്റികളും അവസാന ഘട്ട മിനുക്കുപണികൾ നടത്തു കയാണ്