എത്ര പണമുണ്ടായാലും നീതിപീഠത്തിന്റെ ശക്തമായ ഇടപെടലുണ്ടെങ്കില്‍ തടുക്കാനാകില്ല എന്ന് തെളിയിക്കുന്നതാണ് എറണാകുളം മരടിലെ ഫ്‌ളാറ്റുകളുടെ പതനം. നീതിപീഠത്തിന്റെ ഉരുക്കുകരങ്ങളിലമര്‍ന്ന അനധികൃത അംബരചുംബികള്‍ നിമിഷ നേരം കൊണ്ടാണ് തവിടുപൊടിയായത്. എന്ത് അധ്വാനം കൊണ്ടാണ് ഇത് പടുത്തുയര്‍ത്തിയെന്ന വേദന ചിലരെങ്കിലും പങ്കു വയ്ക്കുന്നു. മാത്രമല്ല ഇത്രയും നാള്‍ താമസിച്ച ഫ്‌ളാറ്റ് കണ്‍മുമ്പില്‍ തകര്‍ന്നു വീഴുന്നതിന്റെ വേദന വേറെയും. പൊളിച്ചു നീക്കുന്നതിനേക്കാള്‍ തുടക്കത്തിലേ തന്നെ അനുമതി നല്‍കാതിരുന്നുകൂടേയെന്ന ചോദ്യവും ഉണ്ടാകുന്നു. എന്നാല്‍ നിയമ ലംഘനം നടത്തുന്നവര്‍ക്കുള്ള ശക്തമായ താക്കീതായി മരട് മാറുകയാണ്. തീരദേശപരിപാലനനിയമം ലംഘിച്ച്, കായലോരത്തു കെട്ടിപ്പടുത്ത മരടിലെ രണ്ടു ഫഌറ്റ് സമുച്ചയങ്ങള്‍ നിയന്ത്രിതസ്‌ഫോടനത്തിലൂടെ നൊടിയിടയില്‍ തരിപ്പണമായി. പൊളിച്ചുനീക്കാന്‍ സുപ്രീം കോടതി നിര്‍ദേശിച്ച സമുച്ചയങ്ങളില്‍ ശേഷിക്കുന്ന രണ്ടെണ്ണം ഇന്നു തകര്‍ക്കും.

ഇന്നലെ രാവിലെ 11.17ന് എച്ച്.ടു.ഒ. ഹോളിഫെയ്ത്തും 11.42ന് ആല്‍ഫ സെറിന്‍ ടവര്‍ രണ്ടും 11.43നു ടവര്‍ മൂന്നും നാമാവശേഷമായി. ഹോളിഫെയ്ത്ത് അഞ്ചു സെക്കന്‍ഡിലും ആല്‍ഫയിലെ ഇരട്ട ടവറുകള്‍ നാലു സെക്കന്‍ഡിലും തറപറ്റി. സമീപവീടുകള്‍ക്കോ കുണ്ടന്നൂര്‍തേവര പാലത്തിനോ ഇന്ത്യന്‍ ഓയില്‍ കോര്‍പറേഷന്റെ പൈപ്പ് ലൈനിനോ കേടുപാടുകളില്ലാതെ, മുന്‍നിശ്ചയപ്രകാരം കൃത്യമായിത്തന്നെ ദൗത്യം വിജയം കണ്ടു.

അടിത്തട്ടില്‍ സ്‌ഫോടനം ആരംഭിച്ചതോടെ ഉയര്‍ന്നുപൊങ്ങിയ പൊടിപടലം, ഫഌറ്റ് നിലംപൊത്തിയതോടെ കാഴ്ചമറച്ചു. മുംബൈയിലെ എഡിഫേസ്, ദക്ഷിണാഫ്രിക്കയിലെ ജെറ്റ് ഡിമോളിഷന്‍ കമ്പനികള്‍ ചേര്‍ന്നാണ് എച്ച്.ടു.ഒ. ഹോളിഫെയ്ത്ത് പൊളിച്ചത്. ആല്‍ഫ തകര്‍ത്തതു ചെന്നൈയിലെ വിജയ് സ്റ്റീല്‍സ് കമ്പനിയും. സാങ്കേതികസമിതിയും വിദഗ്ധരും ജില്ലാഭരണകൂടവും തയാറാക്കിയ പദ്ധതിപ്രകാരം എല്ലാം കൃത്യമായി നടന്നു. ഫഌറ്റുകള്‍ ചരിച്ചുവീഴ്ത്തിയപ്പോള്‍ ആല്‍ഫയുടെ അവശിഷ്ടങ്ങള്‍ കായലിലും പതിച്ചു.

അതേസമയം എച്ച്ടുഒ ഹോളിഫെയ്ത്ത്, ആല്‍ഫ സെറീന്‍ എന്നീ ഫഌറ്റ് സമുച്ചയങ്ങള്‍ക്കു പിന്നാലെ ഗോള്‍ഡന്‍ കായലോരവും ജയിന്‍ കോറല്‍കോവ് ഇന്ന് നിലംപൊത്തും. രാവിലെ 11 മണിക്ക് ജയിനും ഉച്ചകഴിഞ്ഞ് രണ്ട് മണിക്ക് ഗോള്‍ഡന്‍ കായലോരവും സ്‌ഫോടനത്തിലുടെ തകര്‍ക്കും. രണ്ടു സ്‌ഫോടനങ്ങളും എഡിഫേസ് കമ്പനിയാണ് നടത്തുന്നത്. അഞ്ച് സെക്കന്‍ഡിനുള്ളില്‍ ദൗത്യം പൂര്‍ത്തിയാക്കും.

സ്‌ഫോടനത്തിനു മുന്നോടിയായുള്ള അവസാന പരിശോധനകള്‍ പുരോഗമിക്കുകയാണ്. ആദ്യം പൊളിക്കുന്ന ജയിന്‍ കോറല്‍കോവില്‍ അവസാനവട്ട പരിശോധനകള്‍ക്കായി വിദഗ്ധ സംഘം എത്തി. രാവിലെ എട്ട് മുതല്‍ വൈകിട്ട് നാലു വരെ പ്രദേശത്ത് നിരോധനാജ്ഞയാണ്. സ്‌ഫോടനത്തിന്റെ അവശിഷ്ടം കായലിലേക്ക് പതിക്കില്ലെന്ന് എഡിഫേസ് എഞ്ചിനീയറിങ് സംഘം വ്യക്തമാക്കിയിട്ടുണ്ട്.

അതേസമയം നാലു ഫഌറ്റ് സമുച്ചയങ്ങളും സ്‌ഫോടനത്തിലൂടെ തകര്‍ത്തതിനു ശേഷം നടപടി സംസ്ഥാന സര്‍ക്കാര്‍ സുപ്രീംകോടതിയെ തിങ്കളാഴ്ച അറിയിക്കും. തീരദേശ പരിപാലന നിയമലംഘനതതില്‍ സമര്‍പ്പിക്കേണ്ട റിപ്പോര്‍ട്ടിന്മേല്‍ കോടതിയുടെ അടുത്ത നടപടി എന്താകും എന്നതില്‍ സര്‍ക്കാരിന് ആശങ്കയുണ്ട്. മറുവശത്ത് ഫഌറ്റുകളിലെ താമസക്കാരുടെ പ്രതിഷേധവും ഉയരുകയാണ്. ഇതിനു പുറമെ ആലപ്പുഴയിലെ കാപ്പിക്കോ റിസോര്‍ട്ട് പൊളിക്കണമെന്ന സുപ്രീംകോടതി ഉത്തരവും സംസ്ഥാന സര്‍ക്കാരിന് മുന്നില്‍ നില്‍ക്കുകയാണ്. സംസ്ഥാനത്ത് തീരദേശ പരിപാലന ചട്ടം ലംഘിച്ചുള്ള മുഴുവന്‍ കെട്ടിടങ്ങളുടെയും റിപ്പോര്‍ട്ടുഒം സുപ്രീംകോടതി ആവശ്യപ്പെട്ടിട്ടുണ്ട്.