കോഴിക്കോട് പൗരത്വനിയമ വിശദീകരണ യോഗത്തിനായി അമിത് ഷാ കേരളത്തില്‍ വരുന്ന ദിവസം യൂത്ത് ലീഗ് വലിയ പ്രതിഷേധത്തിനാണ് കാത്തിരുന്നത്. അമിത് ഷായുടെ സന്ദര്‍ശനത്തില്‍ പ്രതിഷേധിച്ച് ജനുവരി 15ന് കരിപ്പൂര്‍ മുതല്‍ കോഴിക്കോട് വരെ 35 കിലോമീറ്റര്‍ നീളത്തില്‍ പ്രവര്‍ത്തകരെ അണിനിരത്തി കറുത്ത മതില്‍ നിര്‍മിക്കാനായിരുന്നു യൂത്തു ലീഗിന്റെ തീരുമാനം. മലപ്പുത്ത് ചേര്‍ന്ന ലീഗ് പാര്‍ലമെന്ററി പാര്‍ട്ടി യോഗത്തിന് ശേഷമാണ് നേതൃത്വം തീരുമാനമറിയിച്ചത്. ഇതോടെ മുസ്ലീം ലീഗിന് വേവലാതിയായി. കേന്ദ്രം ഭരിക്കുന്ന പാര്‍ട്ടിയുടെ ആഭ്യന്തര മന്ത്രിയാണ് അമിത് ഷാ. മാത്രമല്ല അമിത് ഷാ ബിജെപി ദേശീയ അധ്യക്ഷനുമാണ്. ഇതിന്റെ പേരില്‍ എന്തെങ്കിലും അന്വേഷണം നടത്തിയാല്‍ പേരുദോഷമുണ്ടാകാന്‍ സാധ്യതയേറെ. തീവ്ര ഗ്രൂപ്പുകാര്‍ നുഴഞ്ഞ് കയറി പ്രശ്‌നമുണ്ടാക്കിയാല്‍ ഉത്തരവും പറയേണ്ടി വരും. മാത്രമല്ല ബിജെപിക്കാര്‍ ഇത് പ്രതിരോധിക്കാന്‍ നിന്നാല്‍ കേരളത്തിലെ സമാധാനാന്തരീക്ഷവും പോകും.

ഇത് മുന്നില്‍ കണ്ട മുസ്ലീം ലീഗ് സംഭവത്തിലിടപെട്ടു. അവര്‍ നടത്താനിരുന്ന സമരപരിപാടിയായ കരിമതില്‍ (ബ്ലാക്ക് വാള്‍) മാറ്റി വച്ചു. സംഘര്‍ഷം ഉണ്ടാക്കാനാണ് ബി.ജെ.പി ആഗ്രഹിക്കുന്നത്. ആ വലയില്‍ ചാടാന്‍ തല്‍ക്കാലം ഉദ്ദേശിക്കുന്നില്ലാത്തതിനാലാണ് പരിപാടി ദിവസം മാറ്റാന്‍ നിര്‍ദ്ദേശിച്ചതെന്നാണ് പി.കെ.കുഞ്ഞാലിക്കുട്ടി പറഞ്ഞത്.

എന്നാല്‍ യൂത്ത് ലീഗ് കാരേയും മുംസ്ലീംലീഗ് കാരേയും അമ്പരപ്പിച്ച് മറ്റൊരു വാര്‍ത്തയാണ് വരുന്നത്. പൗരത്വ നിയമ ഭേദഗതിക്ക് അനുകൂലമായ പ്രചരണത്തിന് കേന്ദ്ര ആഭ്യന്തര മന്ത്രി അമിത് ഷാ ഉടന്‍ കേരളത്തില്‍ എത്തില്ലെന്നാണ് കേന്ദ്രമന്ത്രി വി. മുരളീധരന്‍ അറിയിച്ചത്. അമിത് ഷായുടെ സന്ദര്‍ശനത്തിന്റെ തീയതി തന്നെ തീരുമാനിച്ചിട്ടില്ല. എന്നാല്‍ അത്തരത്തില്‍ തീരുമാനം വന്നു എന്ന തരത്തില്‍ കേരളത്തിലെ മാധ്യമങ്ങള്‍ വാര്‍ത്ത നല്‍കിയത് അപഹാസ്യമാണെന്നും കാള പെറ്റു എന്ന് കേട്ട ഉടന്‍ കയറെടുക്കുന്ന തരത്തിലാണ് മാധ്യമങ്ങള്‍ പെരുമാറുന്നതെന്നും വി. മുരളീധരന്‍ പറഞ്ഞു. തീരുമാനിക്കാത്ത സന്ദര്‍ശനത്തിന്റെ പേരില്‍ ചിലര്‍ സമരം വരെ പ്രഖ്യാപിച്ചുവെന്നും മുരളീധരന്‍ പരിഹസിച്ചു.

പൗരത്വ നിയമ ഭേദഗതിക്ക് അനുകൂലമായി രാജ്യവ്യാപകമായി ബി.ജെ.പി ഗൃഹസമ്പര്‍ക്ക പരിപാടികള്‍ നടത്തി വരികയാണ്. ഇതിന്റെ ഭാഗമായി കേരളത്തിലും അദ്ദേഹം എത്തുമെന്ന് റിപ്പോര്‍ട്ടുകളുണ്ടായിരുന്നു. എന്നാല്‍ സന്ദര്‍ശനം തീരുമാനിച്ചിട്ടില്ലെന്നാണ് ഇപ്പോള്‍ കേന്ദ്രമന്ത്രി വി. മുരളീധരന്‍ തന്നെ വ്യക്തമാക്കിയിരിക്കുന്നത്. ഡല്‍ഹിയില്‍ പൗരത്വ നിയമ ഭേദഗതിയെ അനുകൂലിച്ച് ഗൃഹസന്ദര്‍ശനത്തിന് എത്തിയ അമിത് ഷായ്‌ക്കെതിരെ പ്രതിഷേധം ഉയര്‍ന്നിരുന്നു. ഗോ ബാക്ക് വിളികളുമായും പ്രതിഷേധ മുദ്രാവാക്യങ്ങള്‍ എഴുതിയ ബാനര്‍ ഉയര്‍ത്തിയുമാണ് രണ്ട് പെണ്‍കുട്ടികള്‍ പ്രതിഷേധിച്ചത്.

ഡല്‍ഹിയില്‍ അമിത് ഷായ്ക്ക് പ്രതിഷേധം നേരിടേണ്ടി വന്നതിന് പിന്നാലെയാണ് കേരള സന്ദര്‍ശനം തീരുമാനിച്ചിട്ടില്ലെന്ന് ബി.ജെ.പി നേതൃത്വം വ്യക്തമാക്കിയത്. അതേസമയം ജനാധിപത്യത്തില്‍ സഖ്യാബലം തന്നെയാണ് പ്രധാനമെന്ന് വി. മുരളീധരന്‍ പറഞ്ഞു. രാജ്യത്ത് എന്‍.ആര്‍.സി നടപ്പിലാക്കാന്‍ ആരും തീരുമാനിച്ചിട്ടില്ല. പൗരത്വ നിയമഭേദഗതിയെക്കുറിച്ച് ഈ നാട്ടില്‍ പരത്തുന്നത് നുണയുടെ ഘോഷയാത്രയാണെന്നും വി. മുരളീധരന്‍ പറഞ്ഞു.

പൗരത്വ നിയമ ഭേദഗതിക്കെതിരെ കേരള നിയമസഭ പാസാക്കിയ പ്രമേയത്തോട് ഗവര്‍ണര്‍ നടത്തിയ പ്രതികരണം അഭിനന്ദനാര്‍ഹമാണ്. പ്രതികരണം കേട്ട തനിക്ക് ഗവര്‍ണറെ അഭിനന്ദിക്കാന്‍ തോന്നി. നിയമത്തെക്കുറിച്ചും അത് നടപ്പാക്കുന്നതിനെക്കുറിച്ചും മാധ്യമങ്ങള്‍ തെറ്റായ ചിത്രമാണ് നല്‍കുന്നത്. പ്രതിഷേധം വളരെ കുറച്ച് തെരുവുകളില്‍ മാത്രമാണ് ഉണ്ടായിരുന്നത്. അതിനെ പെരുപ്പിച്ച് കാട്ടുകയായിരുന്നു മാധ്യമങ്ങളെന്നും വി. മുരളീധരന്‍ ആരോപിച്ചു. മുരളീധരന്റെ പ്രസ്താവനയോടെ ലീഗുകാര്‍ ഓടി ഒളിക്കുകയാണ്.