കേരളം ഏറ്റവുമധികം പേര്‍ ഒന്നിച്ചിരുന്നു കണ്ട ഒന്നാണ് മരട് ഫ്‌ളാറ്റുകളുടെ സ്‌ഫോടനം. നിയന്ത്രിത സ്‌ഫോടനമാണെന്ന് പറഞ്ഞെങ്കിലും നിയന്ത്രണം വിടുമോയെന്നാണ് പലരുടേയും ഉത്കണ്ഠ. കോട്ടയം നാഗമ്പടം പാലം ഇതുപോലെ തകര്‍ക്കാന്‍ ശ്രമിച്ച് പരാജയപ്പെട്ട കഥ ഓര്‍മ്മയിലുണ്ട്. മാത്രമല്ല എറണാകുളം നഗരമാണ്. ജനങ്ങള്‍ തിങ്ങി നിറഞ്ഞ നഗരത്തില്‍ താമസിക്കുന്നവര്‍ക്ക് എന്തെങ്കിലും സംഭവിച്ചാല്‍ ആഘോഷിക്കുന്ന ചാനലുകള്‍ നിന്ന നില്‍പ്പില്‍ നിലപാട് മാറ്റും. ഇങ്ങനെ സര്‍ക്കാരും പോലീസും ജനങ്ങളും ആകാക്ഷയോടെയാണ് ഫ്‌ളാറ്റ് സമുച്ചയം പൊളിക്കുന്നത് കണ്ടത്.

തലേദിവസം മുതല്‍ ഇന്ത്യയിലെ പ്രമുഖ ചാനലുകള്‍ മരടിന് ചുറ്റും അണി നിരന്നു. രാജ്യത്തെ ആദ്യ ഫ്‌ളാറ്റ് തകര്‍ക്കല്‍ സ്‌ഫോടനം ആഘോഷമാക്കി റേറ്റ് കൂട്ടാന്‍ എല്ലാവരും തലേ ദിവസം മുതല്‍ റെഡിയായി. ഉദയം മുതല്‍ ലൈവ് ടെലികാസ്റ്റാണ്. ഫാളാറ്റുകളുടെ ചുറ്റുപാടും അരിച്ചു പെറുക്കി എല്ലാം എരിവും പുളിയും ചേര്‍ത്ത് ചാനലുകള്‍ വിളമ്പിക്കൊണ്ടിരുന്നു. അതിനിടെയാണ് കുടുമ വച്ച രണ്ട് പൂജാരിമാര്‍ എത്തിയത്. സത്യത്തില്‍ കമ്മ്യൂണിസ്റ്റ് കേരളം ചിരിച്ചു പോയി. കലിയുഗ വരദനായ അയ്യപ്പന്റെ പേരില്‍ കണ്ട പുകിലും പുക്കാറും നടന്ന സ്ഥലത്താണ് സര്‍വവിധ സര്‍ക്കാര്‍ സംവിധാനത്തോടെ ഫ്‌ളാറ്റ് പൊളിക്കുന്നത്. അതും സുപ്രീം കോടതിയാണ് ഫ്‌ളാറ്റിന് വധശിക്ഷ വിധിച്ചത്.

അപേപോഴാണ് കഴിഞ്ഞ വര്‍ഷത്തെ ശബരിമല സീസണ്‍ ഓര്‍മ്മയില്‍ വരുന്നത്. ശബരിമലയില്‍ കൂട്ടമായി ശരണം വിളിച്ചാല്‍ അറസ്റ്റ് ചെയ്യുന്ന അവസ്ഥ. എന്തിന് പോലീസ് അയ്യപ്പന്‍മാരെ പോലീസുകാരാക്കി താടിയും മുടിയും വെട്ടിപ്പിച്ച് ഇന്‍ഷര്‍ട്ട് ചെയ്യിപ്പിച്ചു. മാത്രമല്ല സകല പൂജാരിമാരേയും അധിക്ഷേപിച്ച് മന്ത്രിമാരുള്‍പ്പെടെ രംഗത്തെത്തുകയും ചെയ്തു. പൂജാരിമാര്‍ അടി വസ്ത്രം ഇടാത്തവരെന്ന് പറഞ്ഞയാളാണ് മന്ത്രി ജി. സുധാകരന്‍. ഏറ്റവും പവിത്രമായ തന്ത്രിമാരെപ്പോലും വെറുതേ വിട്ടില്ല. മാത്രമല്ല ഓഫീസകളില്‍ പൂജ പാടില്ലെന്നും വ്യക്തമാക്കി. പോലീസ് ട്രെയിനിംഗ് കോളേജിലെ അമ്പലങ്ങള്‍ പോലും വേണ്ടായെന്ന നിലപാടിലായിരുന്നു അന്ന്. അതെല്ലാം മാറി മറിയുന്നതാണ് പുതുവര്‍ഷത്തില്‍ കണ്ടത്.

അടിവസ്ത്രങ്ങള്‍ ഇടില്ലെന്ന് ആക്ഷേപിച്ച പൂജാരിമാരാണ് ഫ്‌ളാറ്റ് പൊളിക്കുന്നതിന് മുമ്പുള്ള പൂജ സര്‍ക്കാര്‍ ചെലവില്‍ നടത്തിയത്. പൊളിക്കാന്‍ കരാറെടുത്ത കമ്പനി സര്‍ക്കാര്‍ നല്‍കിയ കാശ് കൊണ്ടാണ് രണ്ട് പൂജാരിമാരേയും പരിവാരങ്ങളേയും ചെല്ലും ചെലവും നല്‍കി കൊണ്ടുവന്നത്. ചെയ്യുന്നത് പൊളിക്കലാണെങ്കിലും, തുടങ്ങിയത് പൂജയോടെയാണ്. ശനിയാഴ്ച രാവിലെ ഏഴേമുക്കാലോടെയാണ് ഹോളിഫെയ്ത്ത് ഫ്‌ലാറ്റിന്റെ ഗേറ്റിനുമുന്നില്‍ പൂജയ്ക്ക് തുടക്കമായത്. ശൃംഗേരി മഠത്തില്‍നിന്നുള്ള പൂജാരികളുടെ നേതൃത്വത്തിലായിരുന്നുയിത്.

പൊളിക്കല്‍ കമ്പനിയായ എഡിഫസിന്റെ പ്രതിനിധികളെല്ലാം പങ്കെടുത്തു. ഒരു മണിക്കൂറോളം നീണ്ട ചടങ്ങുകള്‍ക്കൊടുവില്‍ പൂജിച്ചുനല്‍കിയ ചുറ്റികയുമായി എഡിഫസ് പാര്‍ട്ണര്‍ ഉത്കര്‍ഷ് മേത്ത ഫ്‌ലാറ്റിന്റെ ഗേറ്റിനുള്ളിലേക്ക് കടന്നു. ജോലികള്‍ക്ക് ഉപയോഗിച്ച എന്തെങ്കിലുമൊന്നുകൂടി ഫഌറ്റിനൊപ്പം തകര്‍ക്കണമെന്നാണ് വിശ്വാസം... ആ വിശ്വാസമാണ് കണ്ടത്.

തുടര്‍ന്ന് പ്രസാദവും പഴങ്ങളുമെല്ലാം ചുറ്റുംകൂടിനിന്നവര്‍ക്കെല്ലാം നല്‍കി. പൂജയ്ക്കുശേഷമായിരുന്നു സ്‌ഫോടനത്തിന് മുന്നോടിയായുള്ള അവസാനവട്ട പരിശോധനകള്‍ നടത്തിയത്.

അതങ്ങനേയാണ്, റോക്കറ്റ് പറത്തുമ്പോഴും ശാസ്ത്രജ്ഞന്‍മാര്‍ പൂജ നടത്തുന്നത് ഒരു വിശ്വാസമാണ്. അത് നല്‍കുന്ന ആത്മ വിശ്വാസം വളരെ വലുതാണ്. അത് തല്ലിക്കെടുത്തിയാല്‍ ഫലം വിപരീതമായിരിക്കും. അതാണ് ഇന്നലെ മരടിലും കണ്ടത്. സംഭവം പൊളിക്കലാണെങ്കിലും അതിലും ഉണ്ട് ഒരു വിശ്വാസം. എന്നാല്‍ ആ വിശ്വാസത്തെ നമ്മുടെ ഉദ്യോഗസ്ഥരോ സര്‍ക്കാരോ പോലീസോ ഇടപെട്ട് തടഞ്ഞില്ല. ഒരു മണിക്കൂറോളം നടന്ന പൂജയ്ക്ക് ലോകം സാക്ഷിയാകുകയും ചെയ്തു. എല്ലാം ശുഭം ആകുകയും ചെയ്തു. അവിടെയാണ് കലിയുഗ വരദനായ അയ്യപ്പന്റെ ശക്തി.