ഭർത്താവിനൊപ്പം ചികിത്സയ്ക്കെത്തിയതാണ് എട്ടുമാസം ഗർഭിണിയായ യുവതി. യുവതിയെ ഡോക്ടർക്ക് ഒരു സംശയം.തിരിച്ചറിയൽ റേഖ നോക്കിയപ്പോൾ ഡോക്ടർ ശരിക്കും ഞെട്ടി. പ്രായം വെറും 14 വയസ്സ് മാത്രം. ഡോക്ടർ ഉടനെ പോലീസിൽ വിവരം അറിയിച്ചു. ഇതോടെ പോക്സോ കേസെന്നനിലയിൽ സംഭവം ഡോക്ടർ ദേവികുളം പോലീസിൽ അറിയിച്ചു. ഉടൻതന്നെ എസ്.ഐ. കെ.ദിലീപ് കുമാറിന്റെ നേതൃത്വത്തിൽ, പിങ്ക് പോലീസടക്കം വട്ടക്കാട്ടിലെത്തി അന്വേഷണം തുടങ്ങി......

വെള്ളിയാഴ്ച രാവിലെയാണ് കണ്ണൻദേവൻ കമ്പനി ചൊക്കനാട് വട്ടക്കാട് ഡിവിഷനിലെ മറുനാടൻ തൊഴിലാളികളായ ദമ്പതിമാർ പരിശോധനയ്ക്കായി ടാറ്റാ ടീ ആശുപത്രിയിലെത്തിയത്.. ആശുപത്രിയിൽനിന്ന്‌ മടങ്ങിയെത്തിയ ദമ്പതിമാരെ ചോദ്യംചെയ്തപ്പോൾ, യുവതിക്ക് 19 വയസ്സ് തികഞ്ഞതായി അവർ പറഞ്ഞു. എങ്കിലും വിശ്വാസംവരാതെ പോലീസ് യുവതിയുടെ മാതാപിതാക്കളോട് കാര്യം അന്വേഷിച്ചു. അസം ദറാംഗ് ജില്ലയിലെ സാംതിലാ ഗ്രാമത്തിലുള്ളവരാണ് യുവതിയുടെ ബന്ധുക്കൾ . അവരും യുവതിക്ക് 19 വയസ്സായി എന്ന് തന്നെ പറഞ്ഞെങ്കിലും ജനന രേഖകളുടെ പകർപ്പ് കാണാതെ വിശ്വസിക്കാൻ പോലീസ് തയ്യാറായില്ല.

15 കിലോമീറ്റർ ദൂരെയുള്ള സ്ഥലത്ത് പണിക്കുപോയ യുവതിയുടെ അച്ഛൻ വീട്ടിലെത്തി യുവതിയുടെ ജനനരേഖകൾ വാട്സാപ്പ് വഴി രാത്രിയിൽ എസ്.ഐ.ക്ക് അയച്ചുകൊടുത്തു. 2000 ഡിസംബറിലാണ് യുവതി ജനിച്ചതെന്ന് കണ്ടെത്തി. ഇതോടെയാണ് പോലീസിനു സമാധാനമായത്.
ദമ്പതിമാർ മുൻപ് ജോലിചെയ്തിരുന്ന പീരുമേട്ടിലെ സ്ഥാപനം പറ്റിച്ച പണിയാണ് ഇവർക്ക് വിനയായത് .ഇവർ നൽകിയ തിരിച്ചറിയൽരേഖയിൽ യുവതിയുടെ പ്രായം തെറ്റിച്ചാണ് എഴുതിയിരുന്നത്