തീരപരിപാലന നിയമം ലംഘിച്ച്‌ നിര്‍മ്മിച്ച മരടിലെ ഫ്ലാറ്റ് സമുച്ചയങ്ങളില്‍ ഓരോന്നായി നിലം പതിച്ചപ്പോൾ ഇനി വിധി കാത്ത് അവശേഷിക്കുന്നത് ​ഗോള്‍ഡന്‍ കായലോരം മാത്രം. ഫ്ലാറ്റിലെ അവസാന ഘട്ട പരിശോധനകള്‍ പൂര്‍ത്തിയായി. ആദ്യ സൈറണ്‍ മുഴങ്ങി. ഫ്ലാറ്റ് പൊളിക്കുന്നത് 15 മിനിറ്റ് വൈകുമെന്നാണ് ഒടുവില്‍ ലഭിക്കുന്ന വിവരങ്ങള്‍. 51 മീറ്ററാണ് ഗോള്‍ഡന്‍ കായലോരം ഫ്ലാറ്റിന്റെ ഉയരം. ഗോള്‍ഡന്‍ കായലോരം വ്യത്യസ്ത രീതിയിലാകും പൊളിക്കുകയെന്ന് ജെറ്റ് ഡിമോളിഷന്‍സ് എം.ഡി. ജോ ബ്രിക്മാന്‍ പറഞ്ഞു.

15 കിലോ സ്ഫോടക വസ്തുവാണ് തകര്‍ക്കാന്‍ ഉപയോഗിക്കുന്നത്. വളരെയേറെ വെല്ലുവിളി ഉയര്‍ത്തുന്ന ദൗത്യമാണ് ഗോള്‍ഡന്‍ കായലോരം പൊളിക്കുക എന്നത്. ഫ്ളാറ്റിന് തൊട്ടടുത്തായി സ്ഥിതി ചെയ്യുന്ന അങ്കണവാടിക്ക് യാതൊരുവിധ കേടുപാടും സംഭവിക്കാതിരിക്കുകയെന്നതാണ് പ്രധാന വെല്ലുവിളി. വെള്ളച്ചാട്ടം പോലെ ഗോള്‍ഡന്‍ കായലോരം തകര്‍ക്കുക വ്യത്യസ്ത രീതിയിലായിലായിരിക്കും. ആദ്യ മൂന്ന് ഫ്ളാറ്റുകളുടെയും പൊളിക്കല്‍ പ്രക്രിയ നൂറ് ശതമാനം വിജയകരമായാണ് പൂര്‍ത്തിയാക്കിയത്. നിലവില്‍ അങ്കണവാടി സംരക്ഷിക്കുന്നതിനുള്ള പ്രവര്‍ത്തനങ്ങളാണ് നടക്കുന്നത്. എച്ച്‌ടുഒ പോലെ തന്നെ അവശിഷ്ടം കായലില്‍ വീഴില്ല, സമീപ കെട്ടിടങ്ങള്‍ക്കു കേടും വരില്ലെന്നാണ് ജെറ്റ് ഡിമോളിഷന്‍സ് എം.ഡി. ജോ ബ്രിക്മാന്റെ അവകാശവാദം.

ഫ്ലാറ്റിന് അഞ്ചുമീറ്റര്‍ അടുത്ത് അങ്കണവാടി കെട്ടിടം ഉള്ളതിനാല്‍ പൊളിക്കലിന് ഏറ്റവും വെല്ലുവിളി നേരിടുന്നതും ​ഗോള്‍ഡന്‍ കായലോരത്തിനാണ്. അങ്കണവാടി കെട്ടിടത്തില്‍ പതിക്കാതിരിക്കാനായി കെട്ടിടത്തെ പിളര്‍ത്തിയാണ് പൊളിക്കുക. ഒരു വശത്തെ അവശിഷ്ടങ്ങള്‍ 45 ഡി​ഗ്രിയില്‍ മുന്‍ഭാ​ഗത്തേക്കും, മറ്റേത് 66 ഡി​ഗ്രിയില്‍ പിന്‍വശത്തേക്കും വീഴും. കുറച്ചുഭാ​ഗം മധ്യത്തിലും. കെട്ടിടത്തിന്റെ തൂണുകള്‍ക്ക് ശക്തി കുറവായതിനാല്‍ ഏറ്റവും കുറവ് സ്ഫോടക വസ്തുക്കളാണ് ഉപയോ​ഗിക്കുന്നത്.

ഫ്‌ലാറ് നിലംപതിക്കുമ്പോൾ 7100 ടണ്‍ അവശിഷ്ടങ്ങള്‍ ഉണ്ടാകുമെന്നാണ് വിലയിരുത്തപ്പെടുന്നത്. ഫ്ലാറ്റില്‍ ഒന്ന്, മൂന്ന്, ആറ്, 11, 14 നിലകളിലാണ് സ്ഫോടക വസ്തുക്കള്‍ നിറച്ചിരുന്നത്. ആദ്യം വൈദ്യുതി ഉപയോഗിച്ച്‌ സ്ഫോടനം നടത്തിയ ശേഷം ടൈമര്‍ ഉപയോഗിച്ച്‌ വലിയ സ്ഫോടനം നടത്തും. ഇതോടെ ഫ്ലാറ്റ് കെട്ടിടം തകര്‍ന്ന് നിലംപൊത്തും. ഫ്ലാറ്റ് പൊളിച്ച വിവരം ചൂണ്ടിക്കാട്ടി സംസ്ഥാന സര്‍ക്കാര്‍ നാളെ സുപ്രീംകോടതിയില്‍ റിപ്പോര്‍ട്ട് നല്‍കും.