തീരദേശപരിപാലന നിയമം ലംഘിച്ച്‌ നിര്‍മിച്ച മരട് നഗരസഭയിലെ നാലു ഫ്ലാറ്റുകളില്‍ അവസാനത്തെ ഫ്ലാറ്റായ ഗോള്‍ഡന്‍ കായലോരവും നിലംപതിച്ചു. തീരദേശ പരിപാലന നിയമം ലംഘിച്ച്‌ നിര്‍മ്മിച്ച മരടിലെ അവസാനത്തെ ഫ്ലാറ്റായ ഗോള്‍ഡന്‍ കായലോരവും നിലംപൊത്തിയതോടെ കോടതി വിധി അനുസരിച്ചുള്ള മുഴവന്‍ ഫ്ലാറ്റുകളും പൊളിച്ചു നീക്കി.

പ്രതീക്ഷിച്ചതിലും വെെകിയായിരുന്നു സെെറണ്‍ മുഴങ്ങിയിരുന്നത്. 2.20നായിരുന്നു രണ്ടാമത്തെ സെെറണ്‍. ചമ്ബക്കര കനാല്‍ തീര റോഡിനോടു ചേര്‍ന്ന് തൈക്കുടം പാലത്തിനു സമീപത്താണ് കണ്ണാടിക്കാട് ഗോള്‍ഡന്‍ കായലോരം സ്ഥിതിചെയ്തിരുന്നത്. 20 കൊല്ലം മുമ്ബ് മരട് പഞ്ചായത്ത് ആയിരുന്നപ്പോള്‍ ആദ്യം പണിത ഫ്ലാറ്റ് സമുച്ചയമായിരുന്നു ഇത്. ഇതിനു പിന്നാലെയാണ് മറ്റു കെട്ടിടങ്ങള്‍ക്കും അനുമതി നല്‍കിയിരുന്നത്.

താരതമ്യേന ചെറിയ കെട്ടിടമാണെങ്കിലും മറ്റുള്ളവയില്‍ നിന്ന് വ്യത്യസ്തമായാണ് ഗോള്‍ഡന്‍ കായലോരം തകര്‍ക്കുകയെന്നും കെട്ടിടത്തിന് തൊട്ടടുത്തായി അങ്കണ്‍വാടി കെട്ടിടമുണ്ട് എന്നതിനാല്‍ കെട്ടിടം തകര്‍ക്കല്‍ വെല്ലുവിളിയായിരുന്നെന്നും അദ്ദേഹം പറഞ്ഞിരുന്നു. തകര്‍ച്ചാ ഭീഷണി ഒഴിവാക്കാന്‍ കെട്ടിടത്തിന്‍റെ ചെറിയ ഭാഗം ഒരു വശത്തേക്കും വലിയ ഭാഗം മറുവശത്തേക്കും തകര്‍ന്നുവീഴുന്ന രീതിയിലായിരുന്നു ക്രമീകരണം. വെള്ളച്ചാട്ടം പോലെ ഗോള്‍ഡന്‍ കായലോരം തകര്‍ക്കുക വ്യത്യസ്ത രീതിയിലായിലായിരിക്കുമെന്നും അദ്ദേഹം വ്യക്തമാക്കിയിരുന്നു.

മരടില്‍ പൊളിക്കാന്‍ ഉത്തരവിട്ട കെട്ടിടങ്ങളില്‍ ഏറ്റവും ഭീമന്‍ കെട്ടിടമായിരുന്നു നേരത്തെ നിലംപൊത്തിയ ജെയിന്‍ കോറല്‍ കോവ്. ജെയിന്‍ കോറല്‍ കോവിന്റെ സമീപ പ്രദേശത്തുള്ള കെട്ടിടങ്ങള്‍ക്കു യാതൊരു കേടുപാടും സംഭവിച്ചില്ലെന്നാണ് സബ് കലക്ടര്‍ എസ്. സുഹാസ് വ്യക്തമാക്കിയത്. ഇതുവരെ നടന്ന സ്ഫോടനങ്ങളില്‍ ഏറ്റവും മികച്ചതും കൃത്യവും ഇതായിരുന്നുന്നെന്ന് എഡിഫ്സ് എംഡി അറിയിച്ചു. ഫ്ലാറ്റിലെ സെക്യൂരിറ്റി കാബിന്റെ ചില്ലുപോലും പൊട്ടിയില്ല. കായലില്‍ നിന്ന് നാല് മീറ്റര്‍ അകലത്തിലാണ് അവശിഷ്ടങ്ങള്‍ പതിച്ചതെന്നും അധികൃതര്‍ വ്യക്തമാക്കി. ഇന്നലെ ഹോളിഫെയ്ത്ത് എച്ച്‌ടുഒയും ആല്‍ഫാ സെറീനും ഉദ്യോഗസ്ഥര്‍ നിയന്ത്രിത സ്ഫോടനത്തിലൂടെ തകര്‍ത്തിരുന്നു.