എന്തിലും ഏതിലും കയറി അഭിപ്രായം പറയുന്ന ഹൈക്കോടതി ജഡ്ജി കെമാല്‍ പാഷയ്‌ക്കെതിരെ രൂക്ഷ വിമര്‍ശനവുമായി മുഖ്യമന്ത്രി പിണറായി വിജയന്‍ രംഗത്തെത്തി. സിഎഎ വിഷയത്തിലാണ് കെമാല്‍ പാഷയ്‌ക്കെതിരെ മുഖ്യമന്ത്രി രംഗത്തെത്തിയത്. പേരെടുത്ത് പറയാതെ ആയിരുന്നു മുഖമന്ത്രിയുടെ വിമര്‍ശനം. ജമാ അത്തെ ഇസ്ലാമിയെയും എസ്ഡിപിഐയെയും കുറിച്ച് പറയുമ്പോള്‍ പഴയ ന്യായാധിപന് എന്തിനാണ് ഇത്ര പൊള്ളലെന്ന് മുഖ്യമന്ത്രി ചോദിച്ചു. ഇരുന്ന സ്ഥാനത്തിന്റെ വലിപ്പം അറിയാതെയാണ് ന്യായാധിപന്റെ പെരുമാറ്റം.. ദേശീയ ജനസംഖ്യാ രജിസ്റ്ററുമായി ബന്ധപ്പെട്ട് സര്‍ക്കാര്‍ നയത്തെകുറിച്ചു തെറ്റിധാരണ പരത്തി. താന്‍ പറയാത്ത വാക്കുകള്‍ തന്റെ നാവില്‍ വയ്ക്കാന്‍ ശ്രമിക്കുന്നുവെന്നും മുഖ്യമന്ത്രി വിമര്‍ശിച്ചു.

ജമാ അത്തെ ഇസ്ലാമിയുടെ നാവായി ഈ ന്യായാധിപന്‍ മാറിയെന്ന് മുഖ്യമന്ത്രി പിണറായി പറഞ്ഞു. രാജ്യത്ത് ഇത്രത്തോളം അധഃപതിച്ച ജുഡിഷ്യറി വേറെ ഉണ്ടായിട്ടില്ലെന്ന് സുപ്രീം കോടതിയെ അധിക്ഷേപിച്ചും കെമാല്‍ പാഷ നേരത്തെ രംഗത്തെത്തിയിരുന്നു. ജനങ്ങള്‍ക്ക് സുപ്രീം കോടതിയിലുള്ള വിശ്വാസം നഷ്ടപ്പെട്ടു. ഭരണഘടന എന്താണെന്നുപോലും വായിച്ചുമനസിലാക്കാനുള്ള ബോധമില്ലാത്തവരാണ് ബില്‍ ഉണ്ടാക്കുന്നതെന്നും അദേഹം വിമര്‍ശിച്ചിരുന്നു.

ഭാരതത്തിലെ ജനാധിപത്യ വ്യവസ്ഥയെ ചോദ്യം ചെയ്ത് പ്രകോപനപരമായ പ്രസ്താവനയും അദേഹം നടത്തിയിരുന്നു. ഇന്ത്യന്‍ ജനാധിപത്യത്തില്‍ മുസ്ലിമിനു ഭാവിയുണ്ടെന്നു തോന്നുന്നില്ലെന്നും വോട്ടും വോട്ടിനുള്ള അവകാശവുമൊക്കെ എത്രകാലം ഉണ്ടാകും എന്നു പറയാനാവാത്ത കാലമാണു വരുന്നത്. കോടതികള്‍ പോലും ജനവിരുദ്ധ വിധികളാണു പുറപ്പെടുവിക്കുന്നതെന്നാണ് അദേഹം പറഞ്ഞിരുന്നു.

ജസ്റ്റിസ് കെമാല്‍ പാഷയുടെ സുരക്ഷ സര്‍ക്കാര്‍ നേരത്തെ പിന്‍വലിച്ചിരുന്നു. രണ്ട് വര്‍ഷമായി സുരക്ഷക്കായി ഏര്‍പ്പെടുത്തിയ നാല് ഉദ്യോഗസ്ഥരെയാണ് സര്‍ക്കാര്‍ പിന്‍വലിച്ചത്. വാളയാര്‍, യു.എ.പി.എ കേസുകളില്‍ പൊലീസിനെ വിമര്‍ശിച്ചതിന്റെ പേരിലാണ് സര്‍ക്കാര്‍ നടപടിയെന്ന് കെമാല്‍ പാഷ അന്ന് പറഞ്ഞു.

മാവോയിസ്റ്റുകളെ, വെടിവെച്ചു കൊലപ്പെടുത്തിയവരെക്കുറിച്ച് എനിക്കറിയില്ല, വാളയാറിലെ പെണ്‍കുട്ടികളെ എനിക്കറിയില്ല, പക്ഷെ സമൂഹത്തിന് വേണ്ടി ഞാന്‍ ശബ്ദമുയര്‍ത്തുകയാണ്. ഇനിയും ഞാന്‍ ശബ്ദമില്ലാത്തവരുടെ ശബ്ദമായി മാറും. ചെവി കേള്‍ക്കാത്തവന്റെ ചെവിയായി ഞാന്‍ പോകും. മീഡിയ ഇനിയും എന്റെയടുത്ത് വന്നാല്‍ ധൈര്യപൂര്‍വം എനിക്ക് പറയാനുള്ളത് പറയും. അത് സര്‍ക്കാരിനെതിരായോ പൊലീസിനെതിരായിട്ടോണോ എന്ന് ഞാന്‍ നോക്കാറില്ല. ജനങ്ങള്‍ക്ക് വേണ്ടിയും സത്യസന്ധമായ കാര്യങ്ങള്‍ക്ക് വേണ്ടിയും ഞാന്‍ ഇനിയും സംസാരിക്കും. അത് അടക്കാനായിരിക്കും ഈ നടപടിയെന്ന് എനിക്ക് തോന്നുന്നുവെന്നും ജസ്റ്റിസ് കെമാല്‍ പാഷ പറഞ്ഞു.

രണ്ട് വര്‍ഷം മുമ്പ് ഐ.എസ് ഉള്‍പ്പെടയുള്ള സംഘടനകളില്‍ നിന്നും ഭീഷണിയുള്ളതായ ഇന്റലിജന്‍സ് വിവരങ്ങള്‍ പരിഗണിച്ചാണ് ജസ്റ്റിസ് കെമാല്‍ പാഷക്ക് നാല് ഉദ്യോഗസ്ഥരെ സുരക്ഷക്കായി നിയോഗിച്ചത്.

ഹൈക്കോടതി ജഡ്ജിയായി വിരമിച്ച ശേഷം മറ്റൊരു പദവികളും സ്വീകരിക്കാതിരുന്ന ആളാണ് ജസ്റ്റിസ് കെമാല്‍ പാഷ. ആദ്യമൊക്കെ ജനങ്ങളെ ബാധിക്കുന്ന കാര്യങ്ങളില്‍ കൃത്യമായ അഭിപ്രായം പറഞ്ഞ് കൈയ്യടി നേടി. എന്നാല്‍ പിന്നീട് എല്ലാ കാര്യങ്ങള്‍ക്കും കയറി അഭിപ്രായം പറഞ്ഞതോടെ രാഷ്ട്രീയക്കാരുടേയും എതിരാളിയായി. പഴയ ന്യായാധിപനെന്ന കാര്യം വച്ച് പലരും ഉള്ളിലൊതുക്കിയെങ്കിലും ആദ്യമായാണ് മുഖ്യമന്ത്രി തുറന്നടിക്കുന്നത്. ഇതിനെതിരെ കെമാല്‍ പാഷ എങ്ങനെ പ്രതികരിക്കുമെന്നാണ് ഇനിയറിയാനുള്ളത്.