വിങ്ങലായി ദേവനന്ദ; പൊന്നോമനയ്ക്ക് സമൂഹമാധ്യമങ്ങളില്‍ അനുശോചന പ്രവാഹം
കേരളത്തിന്റെ വിങ്ങലായി ദേവനന്ദ. കാണാതാവുകയും പിന്നീട് വീടിന് അടുത്തുള്ള ആറ്റില്‍ മരിച്ച നിലയില്‍ കണ്ടെത്തുകയും ചെയ്ത ദേവനന്ദയ്ക്ക് സമൂഹമാധ്യമങ്ങളില്‍ അനുശോചന പ്രവാഹം. ഇന്നലെ കുട്ടിയെ കാണാതായി മണിക്കൂറുകള്‍ക്കുള്ളില്‍ ആ വിവരം സമൂഹമാധ്യമങ്ങളിലൂടെ ലോകമെങ്ങുമുള്ള മലയാളികളിലേക്ക് എത്തിയിരുന്നു. സൂപ്പര്‍താരങ്ങളായ മമ്മൂട്ടിയും മോഹന്‍ലാലുമടക്കമുള്ളവര്‍ ഇന്നലെ ദേവനന്ദയുടെ ചിത്രം സമൂഹമാധ്യമങ്ങളിലൂടെ ഷെയര്‍ ചെയ്തിരുന്നു.
എന്നാല്‍ പ്രതീക്ഷകള്‍ വിഫലമാക്കി ദേവനന്ദയുടെ മരണവാര്‍ത്ത എത്തിയതോടെ അവളെ കണ്ടെത്താനായി സോഷ്യല്‍ മീഡിയയില്‍ ഉയര്‍ന്ന ആവേശം നിശബ്ദതയ്ക്ക് വഴിമാറി. വാട്‍സാപ്പ്, ഇന്‍സ്റ്റാഗ്രാം, ഫേസ്ബുക്ക് തുടങ്ങി പ്രമുഖ സമൂഹമാധ്യങ്ങളില്‍ എല്ലാം നിറഞ്ഞു നില്‍ക്കുന്നത് ദേവനന്ദയുടെ മുഖമാണ്. വളരെ വൈകാരികമായാണ് ആളുകളെല്ലാം ദേവനന്ദയുടെ മരണവാര്‍ത്തയോട് പ്രതികരിക്കുന്നത്.
ദേവനന്ദയുടെ മരണത്തില്‍ അനുശോചിച്ച്‌ കൂടുതല്‍ സിനിമാതാരങ്ങളും രംഗത്തെത്തി. നടന്മാരായ മമ്മൂട്ടിയും ദുല്‍ഖര്‍ സല്‍മാനും, പൃഥ്വിരാജ്, അജു വര്‍ഗീസ്, ടൊവിനോ തോമസ് തുടങ്ങിയവര്‍ ദേവനന്ദയ്ക്ക് ആദരാഞ്ജലികള്‍ അര്‍പ്പിച്ചു. ഇത് ഒടുവിലത്തെ സംഭവമാകട്ടെയെന്ന് നടന്‍ അജു വര്‍ഗീസ് അനുശോചനക്കുറിപ്പില്‍ പറഞ്ഞു.
കൊല്ലം ഇളവൂരിലെ ദേവനന്ദയുടെ മരണത്തില്‍ മുഖ്യമന്ത്രി പിണറായി വിജയന്‍ ദുഃഖം രേഖപ്പെടുത്തി. ദേവനന്ദയെ തിരിച്ചു കിട്ടുവാനുള്ള പരിശ്രമത്തിലായിരുന്നു കേരളം. ഇന്നു രാവിലെ 7.30 ഓടെ വീടിന് സമീപത്തെ ഇത്തിക്കരയാറ്റില്‍ പൊലീസിലെ മുങ്ങല്‍ വിദഗ്ദ്ധര്‍ കുട്ടിയുടെ മൃതദേഹം കണ്ടെത്തിയ വാര്‍ത്ത ഞെട്ടലോടെയാണ് എല്ലാവരും അറിഞ്ഞത്. ദേവനന്ദയുടെ വിയോഗത്തില്‍ അഗാധമായ ദുഃഖം രേഖപ്പെടുത്തുന്നു. കുടുംബത്തിന്റെയും ഉറ്റവരുടെയും ദുഃഖത്തില്‍ പങ്കുചേരുന്നുവെന്നും മുഖ്യമന്ത്രി ഫെയ്‌സ്ബുക്ക് കുറിപ്പില്‍ പറഞ്ഞു.
ദേവനന്ദയുടെ മരണത്തില്‍ വിദ്യാഭ്യാസമന്ത്രി സി രവീന്ദ്രനാഥും അനുശോചിച്ചു. മരണകാരണം കണ്ടെത്താന്‍ വിശദമായ അന്വേഷണം നടത്തുമെന്ന് വിദ്യാഭ്യാസമന്ത്രി പറഞ്ഞു. പ്രതിപക്ഷ നേതാവ് രമേശ് ചെന്നിത്തലയും ദേവനന്ദയുടെ നിര്യാണത്തില്‍ അനുശോചിച്ചു. ഏഴുവയസുകാരിയെ കാണാതായി എന്ന വാര്‍ത്ത പരന്നത് മുതല്‍ നാടാകെ തെരച്ചിലായിരുന്നു. വീട്ടില്‍ കളിക്കുന്നതിനിടയിലാണ് കാണാതായത് എന്നറിഞ്ഞതോടെ എല്ലാമാതാപിതാക്കളും പരിഭ്രാന്തിയിലായിരുന്നു. നാട്ടുകാര്‍ ഉന്നയിക്കുന്ന മരണത്തിലെ ദുരൂഹത പൊലീസ് അന്വേഷിച്ച്‌ ഒഴിവാക്കണമെന്നും രമേശ് ചെന്നിത്തല ആവശ്യപ്പെട്ടു.
https://www.facebook.com/Malayalivartha
