സത്യത്തെ മറച്ചുവെക്കാനാകില്ല എന്നും എന്നായാലും യാഥാർഥ്യം മറനീക്കി പുറത്തുവരും എന്നതിന്റെ തെളിവാണ് ഒന്നരവയസ്സുകാരൻ വിയാന്റെ മരണവും തുടർന്നുള്ള വാർത്തകളും. ജീവൻ നൽകിയ സ്വന്തം 'അമ്മ തന്നെയാണ് പിഞ്ചോമനയുടെ ജീവൻ കവർന്നത്. കാരണമായത് സ്വാർത്ഥത.കാമുകനോടപ്പം സ്വസ്ഥ ജീവിതം നയിക്കാൻ മകൻ തടസ്സമാകുമെന്ന തോന്നലാണ്സ്വന്തം അമ്മയെ കൊലപാതകിയാക്കിയത്.

ഏതു കുറ്റകൃത്യത്തിന്‌ പിന്നിലും കുറ്റവാളി അറിയാതെപോകുന്ന ചില തെളിവുകൾ നിർണ്ണായകമാകാറുണ്ട്. കുറ്റകൃത്യങ്ങൾ തെളിയിക്കുന്നതിൽ നിർണ്ണായക പങ്കുവഹിക്കുന്നതും ഇത്തരം തെളിവുകളാണ്. വിയാന്റെ കൊലപാതകത്തിൽ നിർണായകമായത് ഒരു വായ്പ്പ അപേക്ഷയാണ്.

കൊലപാതകത്തിൽ പങ്കില്ലെന്ന വിശ്വാസത്തിൽ ആദ്യഘട്ടത്തിൽ പൊലീസ് ചോദ്യം ചെയ്തു വിട്ടയക്കുകയായിരുന്നു ശരണ്യയുടെ കാമുകൻ നിതിനെ. എന്നാൽ പിന്നീട് നിതിനെതിരായ കൂടുതൽ തെളിവുകൾ ലഭിച്ചതോടെ നിതിനെ പോലീസ് കഴിഞ്ഞ ദിവസം അറസ്റ്റ് ചെയ്യുകയായിരുന്നു.ശരണ്യയുടെ കാമുകൻ നിതിൻ കുടുങ്ങാൻ കാരണം നാട്ടുകാരനായ യുവാവ് അപ്രതീക്ഷിതമായി കണ്ട നിധിന്റെ ഫോട്ടോയാണ് .വിയാന്റെ സംസ്കാരം നടത്തിയതിനു തൊട്ടടുത്ത ദിവസം ശരണ്യയുമായി പൊലീസ് തയ്യിൽ കടപ്പുറത്തെ വീട്ടിൽ തെളിവെടുപ്പിന് എത്തിയിരുന്നു. പൊലീസ് നടത്തിയ തിരച്ചിലിൽ ശരണ്യയുടെ ബാഗിൽ നിന്നു നിധിനു വേണ്ടിയുള്ള ബാങ്ക് വായ്പയക്കായി തയാറാക്കിയ അപേക്ഷ, നികുതി അടച്ച രസീത്, നിധിന്റെ പാസ്പോർട്ടിന്റെ പകർപ്പ്, ഇയാളുടെ 2 ഫോട്ടോകൾ എന്നിവ ലഭിച്ചിരുന്നു. പൊലീസ് ഇവ പരിശോധിക്കുന്നതിനിടെയാണു നാട്ടുകാരനായ യുവാവ് അപ്രതീക്ഷിതമായി നിധിന്റെ ഫോട്ടോ കാണുന്നത്.
തുടർന്ന് ഇയാൾ ഫോട്ടോയിൽ കണ്ടയാളെ തലേന്ന് ശരണ്യയുടെ വീടിനു പിറകിലെ വഴിയിൽ കണ്ടതായി നാട്ടുകാരോടു വെളിപ്പെടുത്തി.

പുലർച്ചെ 1.30നു ശരണ്യയുടെ വീടിനു പിറകിലെ വഴിയിൽ ബൈക്കിൽ ഇയാൾ ഇരിക്കുന്നതു കണ്ടെന്നായിരുന്നു യുവാവ് മൊഴി നൽകിയത് . പിന്നീട് സിസിടിവി ദൃശ്യങ്ങളിലൂടെ പൊലീസ് മൊഴി സ്ഥിരീകരിച്ചു. തുടർന്ന് നിധിനെ ചോദ്യം ചെയ്യാൻ പൊലീസ് വിളിപ്പിച്ചെങ്കിലും ആദ്യം ഹാജരായില്ല. തുടർന്നു വീണ്ടും നോട്ടിസ് നൽകി.സംഭവത്തിൽ പങ്കില്ലെന്ന രീതിയിൽ നിധിൻ ഉറച്ചു നിൽക്കുകയായിരുന്നു . തുടർന്നു രണ്ടു ദിവസം ചോദ്യം ചെയ്തു വിട്ടയച്ചു. പിന്നീട് ശരണ്യയെയും നിധിനെയും ഒരുമിച്ചിരുത്തി ചോദ്യം ചെയ്തതോടെയാണ്ഞെട്ടിക്കുന്ന ക്രൂരതയുടെ വിവരങ്ങൾ പുറത്തുവരുന്നത്. സിസിടിവി ദൃശ്യങ്ങളും പണമിടപാട് രേഖകളും മൊബൈൽ ചാറ്റ് വിവരങ്ങളും പൊലീസ് തെളിവായി ലഭിക്കുകയും ചെയ്തു.

ഒന്നര വയസ്സുകാരൻ വിയാനെ അമ്മ ശരണ്യ കടപ്പുറത്ത് പാറയിൽ എറിഞ്ഞു കൊലപ്പെടുത്തിയ സംഭവത്തിൽ ആദ്യഘട്ടത്തിൽ നിഷ്കളങ്കത നടിച്ച കാമുകൻ നിധിൻ കുരുങ്ങിയത് പൊലീസിന്റെ വിശദമായ അന്വേഷണത്തിൽ. ഗൂഢാലോചന (ഐപിസി 120(ബി), പ്രേരണ (ഐപിസി 119) എന്നീ വകുപ്പുകൾ പ്രകാരമാണു നിധിനെ അറസ്റ്റ് ചെയ്തിരിക്കുന്നത്. കൊലപാതകം നടന്നു പത്താം ദിവസം ആണ് നിതിൻ അറസ്റ്റ് ചെയ്യപ്പെടുന്നത്.പൊലീസ് കസ്റ്റഡിയിൽ ഇരിക്കെ ശരണ്യയുടെ മൊബൈൽ ഫോണിലേക്കു വന്ന 17 കോളുകളിലൂടെയാണു നിധിൻ ആദ്യം പൊലീസിന്റെ സംശയ നിഴലിൽ പെടുന്നത്.

ശരണ്യയുടെ ഭർത്താവ് പ്രണവ് വിദേശത്തായിരുന്ന കാലം മുതലേ ശരണ്യയും നിധിനും തമ്മിൽ അടുപ്പത്തിലായിരുന്നു. ശരണ്യയുടെ ആഭരണങ്ങൾ നിധിൻ പലപ്പോഴായി കൈക്കലാക്കുകയും ചെയ്തിരുന്നു . രാത്രിയും പകലും വീട്ടിലെത്തി ശരണ്യയുമായി കൂടിക്കാഴ്ചകൾ നടത്തി. ഒടുവിൽ ശരണ്യയെ കൊണ്ട് ബാങ്ക് വായ്പ എടുപ്പിക്കാൻ ശ്രമിച്ചു. ഇതിനുള്ള അപേക്ഷാ വരെ തയാറാക്കിയിരുന്നു. വായ്പ എടുത്ത ശേഷം ശരണ്യയെ ഉപേക്ഷിച്ചു മറ്റൊരു യുവതിയെ വിവാഹം കഴിക്കാനായിരുന്നു പദ്ധതിയെന്നു നിധിൻ പൊലീസിനോടു വ്യക്തമാക്കി.

കാമുകനൊപ്പം ജീവിക്കാൻ സ്വന്തം കുഞ്ഞിനെ ഇല്ലാതാക്കിയ ശരണ്യയെന്ന അമ്മ ഒടുവിൽ എല്ലാം നഷ്ട്ടപ്പെട്ട് തനിച്ചായി. കാമുകൻ പോലും ശരണ്യയെ വഞ്ചിക്കുകയായിരുന്നു. നൊന്തുപെറ്റ മകനും പ്രണയിച്ച് വിവാഹം ചെയ്ത ഭർത്താവും നഷ്ടമായി. ഇനിയുള്ള ജീവിതം കാരാഗൃഹത്തിലും. ഇത്തരം ക്രൂരതകളുടെ അവസാനം ഇതുതന്നെയാണെന്ന ഓർമ്മപ്പെടുത്തൽ കൂടിയാണീ വാർത്ത.