അക്ഷരം പകർന്നു നൽകുന്ന അദ്ധ്യാപിക ജീവിതം വഴിമുട്ടി സമരത്തിൽ. കുഞ്ഞുങ്ങൾക്ക് അറിവ് പകരാൻ സധൈര്യം ഏകാധ്യാപിക വിദ്യാലയത്തിലെ അധ്യാപനം സ്വീകരിച്ച ഉഷയുടെ കുടുംബം ഇപ്പോൾ പട്ടിണിയാകുന്ന അവസ്ഥയിലാണ്. കുരുന്നുകൾക്ക് അറിവ് പകരാൻ ഈ അധ്യാപിക ദിവസേന നേരിടുന്ന ക്ലേശങ്ങൾ ചെറുതല്ല. എന്നിരുന്നാലും അധികൃതർ ഇവർക്കുമേൽ കണ്ണടക്കുകയാണ് ചെയ്യുന്നത്. പാടാൻ പകരാൻ ഈ അദ്ധ്യാപിക താണ്ടുന്ന ദൂരം ചെറുതല്ല.

അമ്പൂരിയിലെ വീട്ടിൽ നിന്നും ഒരോ ദിവസവും രണ്ട് മണിക്കൂർ യാത്ര ചെയ്താണ് ഉഷാ മോഹൻ എന്ന ഉഷ ടീച്ചർ തൊടുമലയിലെ സ്കൂളിൽ എത്തുന്നത്. സാദാരണ യാത്രയല്ലിത്. കാടിനുള്ളിലെ വിദ്യാലയത്തിലെത്താൻ നടന്നു തീർക്കേണ്ടത് കല്ലും മുള്ളും നിറഞ്ഞ കാനന പാതയാണ്. ഏകാധ്യാപകവിദ്യാലയത്തിലെ ടീച്ചറായ ഉഷ മോഹൻ ആണ് തന്റെ ദുരിത ജീവിതം പങ്കുവെക്കുന്നത് . ഉഷ മോഹൻ അഞ്ചു മാസമായി മുടങ്ങി കിടക്കുന്ന വേതനം നൽകണമെന്ന ആവശ്യവുമായി നിരാഹാര സമരത്തിലാണ്.തിരുവനന്തപുരം അഗസ്ത്യ വിദ്യാലയത്തിലെ ഏകാധ്യാപികയാണ് ഉഷ മോഹൻ ആകെ ഉഷട്ടീച്ചർ മാത്രമയുള്ളൂ വിദ്യാലയത്തിൽ എല്ലാ കാര്യങ്ങളും നോക്കാൻ. കുട്ടികളുടെ പഠനത്തിനു പുറമെ, കുട്ടികളുടെ ഭക്ഷണം, പ്രധാനധ്യാപക ജോലി, ഉച്ചക്കഞ്ഞി കണക്കുകള്‍ വരെ സ്‌കൂളിനെ സംബന്ധിച്ച എല്ലാ കാര്യങ്ങളും ഈ അധ്യാപകരാണ് ചെയ്യുന്നത്. . പുഴ കടന്ന്, നാല് കിലോമീറ്ററോളം നടന്നാണ് ദിവസേന സ്‌കൂളിൽ എത്തുന്നത്. പകൽ മുഴുവൻ കുട്ടികളോടൊപ്പം. ഉച്ചഭക്ഷണമൊരുക്കി, കുട്ടികളെ പഠിപ്പിച്ച്, വൈകിട്ട് മലയിറങ്ങും ടീച്ചർ. വീണ്ടും നാല് കിലോമീറ്റർ വടി കുത്തിപ്പിടിച്ച് ഇറക്കം. പുഴ കടന്ന് തിരികെ വീട്ടിലേക്ക്. ഇത്രയും യാതനകൾ സഹിക്കുന്നുണ്ടെങ്കിലും കുട്ടികൾക്ക് അറിവ് പകരുന്നതിൽ സന്തോഷം മാത്രമേയുള്ളു ഈ അധ്യാപികയ്ക്ക്. പക്ഷെ ജീവിക്കാൻ വകയില്ലാതെ എങ്ങനെ കുടുംബം പുലർത്തും. സ്വന്തം കുട്ടികളെ വളർത്തും. ഈ ആശങ്കയിലാണ് ഉഷ ടീച്ചർ നിരാഹാരമിരിക്കാൻ തീരുമാനിക്കുന്നത് .കഴിഞ്ഞ അഞ്ച് മാസമായി ഏകാധ്യാപക വിദ്യാലങ്ങളിലെ 340 അധ്യാപകർ ശമ്പളം ലഭിക്കാതെ ദുരിതത്തില്‍ കഴിയുകയാണ്. കുട്ടികൾക്ക് ഉച്ചഭക്ഷണം വച്ച് കൊടുക്കാനുള്ള ഫണ്ടും പാസ്സാക്കുന്നില്ല. ശമ്പളം കിട്ടാത്തപ്പോഴും സ്വന്തം കയ്യിൽ നിന്ന് പണമെടുത്താണ് കുട്ടികൾക്ക് ഉച്ചഭക്ഷണം ടീച്ചർ വച്ചുകൊടുക്കുന്നത്.

ഇത് ഉഷ ടീച്ചർ മാത്രം നേരിടുന്നൊരു ഒറ്റപ്പെട്ട സംഭവമല്ല. 1995 മുതലാണ് ഏകാധ്യാപകവിദ്യാലയങ്ങൾ സർക്കാർ ആരംഭിക്കുന്നത്. ഇന്ന് സംസ്ഥാനത്ത് 270 ഏകാധ്യാപക വിദ്യാലയങ്ങളുണ്ട്. നാട്ടിലെ സ്കൂളിലേക്കെത്താൻ പ്രയാസമുള്ള കുട്ടികളെ അവരുടെ ഇടങ്ങളിൽ തേടിച്ചെന്ന് പഠിപ്പിക്കുന്ന ആശയമായിരുന്നു ഏകാധ്യപക വിദ്യാലയങ്ങളുടെ രൂപീകരണത്തിന് പിന്നിൽ . ഈ വിദ്യാലയങ്ങൾക്കായി സംസ്ഥാന ബജറ്റിൽ മാറ്റിവെച്ച വിഹിതം തീർന്നു. ധനവകുപ്പ് പുതുതായി പണം അനുവദിച്ചിട്ടുമില്ല. പലയിടത്തും കുട്ടികൾ കുറഞ്ഞു. ഇനി ഇത്തരം വിദ്യാലയങ്ങൾ വേണോ വേണ്ടയോ എന്നതിൽ വിദ്യാഭ്യാസവകുപ്പിന് പോലും ആശയക്കുഴപ്പവുമാണിപ്പോൾ. അധികൃതരുടെ ആശയക്കുഴപ്പത്തിൽ പെട്ടുപോയത് അധ്യാപകരാണ്. ജോലിയിൽ ആത്മാർത്ഥമായി തുടരുമ്പോഴും ജീവിതം ഇവരുടെ മുന്നിൽ ഒരു ചോദ്യ ചിന്ഹമായി നിൽക്കുകയാണ്. കുരുന്നുകളുടെ മുഖം കാണുമ്പോൾ ജോലി ഉപേക്ഷിക്കാനും ഇവർക്കാകുന്നില്ല.