അക്ഷരങ്ങളുടെ ലോകത്തേക്ക് അവൾ ചുവടുവെച്ചു തുടങ്ങിയതേ ഉണ്ടായിരുന്നുള്ളൂ. അറിവിന്റെ ലോകത്തെ ചവിട്ടുപടിയായ ഒന്നാം ക്ലാസ്സിലെ വിദ്യാർത്ഥിയായിരുന്നു കേരളത്തിനാകെ വിങ്ങലായി മാറിയ ദേവനന്ദ എന്ന കുരുന്ന്. കാണാതായതിന്റെ രണ്ടാം നാൾ അവളുടെ ചേതനയറ്റ ശരീരം പുഴയിൽ നിന്നും കണ്ടുകിട്ടിയപ്പോൾ അലറിക്കരഞ്ഞത് മാതാപിതാക്കളും ബന്ധുക്കളും നാട്ടുകാരും മാത്രമല്ല കേരള ജനത ഒന്നടങ്കമായിരുന്നു. അത്രയേറെ പ്രതീക്ഷയോടെയായിരുന്നു ലോകം അവൾക്കുവേണ്ടി കാത്തിരുന്നത്. എന്നാൽ എല്ലാ പ്രതീക്ഷകളെയും ബാക്കിയാക്കി പ്രാർത്ഥനകളെ വിഫലമാക്കി അവൾ മറ്റൊരു ലോകത്തേക്ക് യാത്രയായി.ഓർമ്മകൾ മാത്രം അവശേഷിപ്പിച്ച്. കുരുന്നുവിരലുകളാൽ അവളെഴുതിയ അക്ഷരങ്ങൾ പോലും ഇപ്പോൾ കണ്ണീരിൽ കുതിർന്നിരുന്നു.

ദേവനന്ദ അക്ഷരങ്ങൾ അറിഞ്ഞു തുടങ്ങിയതേ ഉണ്ടായിരുന്നുള്ളൂ. ക്ലാസ്സിലെ ഒന്നാം സ്ഥാനക്കാരിയായ മിടുമിടുക്കിയാണ് പൊലിഞ്ഞു പോയത്. ഭാവിയിൽ ഉയരങ്ങൾ കീഴടക്കുമെന്ന് കുഞ്ഞിലേ തെളിയിച്ച ദേവാനന്ദയെന്ന ദീപം പകുതിൽ കെട്ടുപോയത് അധ്യാപകർക്കുപോലും വിശ്വസിക്കാനാകുന്നില്ല. സ്‌കൂളിലെ പരീക്ഷകളിൽ എല്ലാം ഈ മിടുക്കി ഒന്നാമതായിരുന്നു. പരീക്ഷയുള്ള ദിവസങ്ങളിലെല്ലാം അവൾ എല്ലാം പഠിച്ചിട്ടായിരിക്കും എത്തുന്നത്. എന്തെങ്കിലും കാരണത്താൽ പഠിക്കാൻ കഴിഞ്ഞില്ലെങ്കിൽ ക്ലാസ്സിൽ എത്തുമ്പോ തന്നെ ഇക്കാര്യം ടീച്ചറിനെ അറിയിക്കും.ഇന്നത്തെ പരീക്ഷയ്ക്കു പഠിക്കാൻ പറ്റിയില്ല ടീച്ചറെ എന്ന് പറഞ്ഞവൾ കരയും . പഠിച്ചിട്ട് എത്തുന്ന ദിവസം ടീച്ചർ ക്ലാസ്സിൽ എത്തുമ്പോഴേ പറയും, ടീച്ചറേ ഇന്നു പപരീക്ഷയുണ്ടെന്ന്. അധ്യാപകരുടെ പ്രതീക്ഷയാണ് ജ്വലിച്ചു തുടങ്ങിയപ്പോൾ തന്നെ അണഞ്ഞത്. വാക്കനാട് സരസ്വതീ വിദ്യാനികേതനിലെ ദേവനന്ദയുടെ അധ്യാപിക പ്രീത ദേവി തന്റെ പ്രിയപ്പെട്ട വിദ്യാർത്ഥിനിയെ കണ്ണീരോടെ ഓർക്കുന്നു.തന്റെ നോട്ട്ബുക്കിൽ എല്ലാ ദിവസവും ഡേറ്റ് ഉൾപ്പെടെയാണു ദേവനന്ദ എഴുതാറുള്ളത്. തന്റെ നോട്ടുബുക്കിലെ അവസാന ദിവസമായി അടയാളപ്പെടുത്തിയിരിക്കുന്നത് ഈ മാസം 24 ആണ് . ദേവനന്ദ സ്‌കൂളിൽ അവസാനമായി എത്തിയ ദിവസം. അന്നവൾ ഹിന്ദിയുടെ ആദ്യക്ഷരങ്ങളാണ് എഴുതി തുടങ്ങിയത്. ഇനിയത് ഒരിക്കലും പൂർത്തിയാക്കാനാകാതെ കുഞ്ഞു മിടുക്കി ഈ ലോകത്തോട് എന്നന്നേക്കുമായി വിടപറഞ്ഞു. അക്ഷരങ്ങളെ തനിക്ക് പകരമായി നൽകികൊണ്ട്. ഇനി അവൾ ജീവിക്കുക ബാക്കിയാക്കിയ അവളുടെ വസ്തുക്കളിലൂടെയായിരിക്കും. പകുതി എഴുതി നിർത്തിയ അക്ഷരങ്ങളിലൂടെയും.

ഫെബ്രുവരി 27നു ദേവനന്ദയെന്ന ആറുവയസുകാരിയെ കാണാനില്ല എന്ന വാർത്ത പരന്നപ്പോൾ അവളെ തിരയാൻ ഒരു നാട് മുഴുവൻ ഒത്തു ചേർന്നിരുന്നു. അറിഞ്ഞവർ അറിഞ്ഞവർ വാർത്ത കൈമാറി. ദേശീയ മാധ്യമങ്ങൾ വരെ വാർത്ത ഏറ്റെടുത്തു. നാട് മുഴുവൻ പ്രാർത്ഥനയിലായി . എന്നാൽ ഒരു പകലും രാത്രിയും നീണ്ട തിരച്ചിൽ ഒടുവിൽ വിഫലമായത് കുരുന്നു ശരീരം വീടിനടുത്തുള്ള പുഴയിൽ നിന്നും കണ്ടെടുക്കുമ്പോൾ.
പ്രവാസിയായ അച്ഛൻ നാട്ടിലെത്തിയപ്പോൾ കണ്ടത് മകളുടെ തണുത്തുറഞ്ഞ ശരീരം. വിധി മറ്റൊന്നുകൂടി ആ അച്ഛനുവേണ്ടി കാത്തുവെച്ചിരുന്നു. നാലുമാസം മാത്രം പ്രായമുള്ള തന്റെ മകനെ ആദ്യമായി കണ്ടനിമിഷം തന്നെ തന്റെ ആറുവയസ്സുകാരി മകളെ അവസാനമായും കണ്ടു. ഒരു നാട് മുഴുവൻ വിതുമ്പിയ കറുത്ത ദിനം കൂടിയാണ് നാലുവർഷത്തിലൊരിക്കൽ മാത്രം എത്തിച്ചേരുന്ന ഫെബ്രുവരി മാസത്തിലെ അധിക ദിവസമായ ഇന്ന്.