ചങ്ങനാശ്ശേരിയിലെ പുതുജീവന്‍ മാനസികാരോഗ്യ കേന്ദ്രത്തിലെ മൂന്ന് അന്തേവാസികൾ ഒരാഴ്ചയ്ക്കിടെ മരിച്ച സംഭവത്തിൽ ഗുരുതര ആരോപണങ്ങളുമായി നാട്ടുകാർ രംഗത്ത്. അഗതി മന്ദിരത്തിനെതിരെ നിരവധി രൂക്ഷ ആരോപണങ്ങളാണ് നാട്ടുകാർ ഉന്നയിക്കുന്നത്. അഗതിമന്ദിരത്തില്‍ ഇരുട്ടുമുറിയുണ്ടെന്നും ഇവിടെ അന്തേവാസികളെ മര്‍ദിക്കുന്നത് പതിവാണെന്നും നാട്ടുകാര്‍ ആരോപിക്കുന്നു . സംഭവമറിഞ്ഞ് നിരവധിപേരാണ് ചങ്ങനാശ്ശേരി തൃക്കൊടിത്താനം പുതുജീവന്‍ അഗതിമന്ദിരത്തിന് മുന്നില്‍ തടിച്ചുകൂടിയത്. സംഭവത്തിൽ ദുരൂഹത ആരോപിക്കുകയാണ് നാട്ടുകാർ. മൂന്ന് മരണങ്ങളും ഒരേ രീതിയിലാണ് സംഭവിച്ചതെന്ന റിപ്പോർട്ട് കൂടി പുറത്തുവന്നതോടെയാണ് അഗതി മന്ദിരത്തിനെതിരെ നാട്ടുകാർ ആരോപണങ്ങളുമായി എത്തിയത്.

പലദിവസവും രാത്രിയില്‍ നിലവിളികള്‍ കേള്‍ക്കാമെന്നും അന്തേവാസികളെ മര്‍ദിക്കാറുണ്ടെന്നുമാണ് അഗതിമന്ദിരത്തിന് സമീപത്ത് താമസിക്കുന്നവര്‍ വെളിപ്പെടുത്തുന്നത്. മോശപ്പെട്ട ഭക്ഷണപദാര്‍ഥങ്ങള്‍ ഉപയോഗിച്ചാണ് ആഹാരം പാചകം നല്‍കിയിരുന്നതെന്നും പലപ്പോഴും മതിയായ ഭക്ഷണം പോലും അന്തേവാസികള്‍ക്ക് ലഭിച്ചിരുന്നില്ലെന്നും അഗതിമന്ദിരത്തിലെ മുന്‍ ജീവനക്കാരിയും വെളിപ്പെടുത്തി. ബഹളംവെയ്ക്കുന്ന അന്തേവാസികളെ കുത്തിവെപ്പ് നല്‍കിയും മരുന്ന് നല്‍കിയും മയക്കി കിടത്താറാണ് പതിവെന്നും അവര്‍ പറയുന്നു . രണ്ടുമാസത്തോളം ഇവിടെ ജോലിചെയ്തിരുന്ന ഇവരെ പിന്നീട് പുറത്താക്കുകയായിരുന്നു.

അതേസമയം, മരണങ്ങളില്‍ ദുരൂഹതയില്ലെന്ന് പുതുജീവന്‍ ട്രസ്റ്റ് മാനേജിങ് ഡയറക്ടര്‍ വി.സി.ജോസഫ് മാധ്യമങ്ങളോട് പ്രതികരിച്ചു. അന്തേവാസികളെ ആശുപത്രിയില്‍ പ്രവേശിപ്പിച്ചപ്പോള്‍ കൃത്യമായി ആരോഗ്യവകുപ്പ് ഉദ്യോഗസ്ഥരെ വിവരമറിയിച്ചിരുന്നുവെന്നും കൊറോണ, എച്ച് 1 എന്‍ 1 തുടങ്ങിയ രോഗങ്ങളൊന്നുമില്ലെന്ന് സ്ഥിരീകരണം ലഭിച്ചതായും അദ്ദേഹം കൂട്ടിച്ചേർത്തു.

ഫെബ്രുവരി 23-ാം തീയതിയാണ് അഗതി മന്ദിരത്തിലെ ആദ്യമരണം സംഭവിക്കുന്നത്. മുക്കൂട്ടുതറ സ്വദേശിനിയായ ഷെറിന്‍(44) ആണ് അന്ന് മരണപ്പെട്ടത്. രാത്രിയോടെ ശാരീരികാസ്വാസ്ഥ്യം അനുഭവപ്പെട്ട യുവതിയെ ആദ്യം നിരീക്ഷണമുറിയിലേക്ക് മാറ്റി. എന്നാല്‍ തളര്‍ച്ച ബാധിച്ചതോടെ പുഷ്പഗിരി ആശുപത്രിയിലേക്കും തുടര്‍ന്ന് മറ്റൊരു സ്വകാര്യ ആശുപത്രിയിലും എത്തിച്ചു. അവിടെവെച്ചാണ് മരണം സംഭവിച്ചത്. ഈ വിവരം യുവതിയുടെ സഹോദരനെ അറിയിച്ചിരുന്നു. തുടര്‍ന്ന് പോലീസെത്തി സഹോദരന്റെയടക്കം മൊഴി രേഖപ്പെടുത്തി പോസ്റ്റുമോര്‍ട്ടത്തിന് ശേഷം മൃതദേഹം വിട്ടുനല്‍കിയെന്നും ജോസഫ് പറഞ്ഞു.

ഫെബ്രുവരി 24-ാം തീയതി നാലുപേരെ കൂടി സമാന രോഗലക്ഷണങ്ങളോടെ വിവിധ ആശുപത്രികളില്‍ പ്രവേശിപ്പിച്ചു. ഇതോടെ രോഗികളുടെ വിവരം ആരോഗ്യവകുപ്പ് ഉദ്യോഗസ്ഥരെ അറിയിച്ചിരുന്നു. തുടര്‍ന്ന് മുപ്പത് പേരടങ്ങുന്ന ആരോഗ്യവകുപ്പിന്റെ സംഘം ആശുപത്രിയിലുള്ള രോഗികളെയും അഗതിമന്ദിരത്തിലെ അന്തേവാസികളെയും പരിശോധിച്ചു. ഇതിനിടെ തിരുവനന്തപുരം പേട്ട സ്വദേശിയായ ഗിരീഷ് തിരുവല്ലയിലെ ആശുപത്രിയില്‍വെച്ച് മരണപ്പെട്ടു. എന്നാല്‍ മൃതദേഹം പോസ്റ്റുമോര്‍ട്ടം നടത്താതെ ബന്ധുക്കള്‍ കൊണ്ടുപോവുകയും സംസ്‌കരിക്കുകയും ചെയ്തു.തോട്ടക്കാട് സ്വദേശിയായ യോഹന്നാനാണ്(21) ശനിയാഴ്ച രാവിലെ മരിച്ചത്. ശ്വാസകോശത്തില്‍ ന്യൂമോണിയ ബാധിച്ചതാണ് മരണകാരണമെന്നാണ് പ്രാഥമികമായ വിവരം. അഗതിമന്ദിരത്തിലെ ആറുപേര്‍ കൂടി ചികിത്സയിലാണെന്നും പുതുജീവന്‍ ട്രസ്റ്റ് എം.ഡി. വി.സി. ജോസഫ് വിശദീകരിച്ചു.