ഓരോ തട്ടിപ്പും വെട്ടിപ്പും പോകുന്ന വഴിയേ. പണിയെന്നു പറഞ്ഞാലും പോരാ. കനത്ത അടിയായി പോയി.
രണ്ടു തട്ടിപ്പുകള്‍ ഒന്ന് മണി ചെയിന്‍ മറ്റേത് ദൈവദര്‍ശനം. കോടികള്‍ പോയ വഴി പറയുകയും വേണ്ട.
കോയമ്പത്തൂര്‍ കേന്ദ്രീകരിച്ച് ആയിരക്കണക്കിന് കോടി രൂപയുടെ മണിചെയിന്‍ തട്ടിപ്പ്. കേരളത്തില്‍ പതിനാലായിരത്തോളം പേര്‍ തട്ടിപ്പിനിരയായി. പരാതിക്കാരുടെ കൂട്ടായ്മ ശേഖരിച്ച കണക്കനുസരിച്ച് ഒരു സ്ഥാപനം കേരളത്തില്‍ നിന്നുമാത്രം മൂവായിരത്തിഅഞ്ഞൂറ് കോടി രൂപയിലധികം തട്ടിയെടുത്തു. ദിവസേന നൂറുകണക്കിന് കോടികളുടെ ഇടപാട് നടന്നിരുന്ന ഓഫിസിന്റെ ഗേറ്റ് പുറത്തുനിന്ന് പൂട്ടിയ നിലയിലാണ്. വൃക്കരോഗിയായ മകന് ചികില്‍സയ്ക്കുള്ള പണം ചോദിച്ചെത്തിയ കൊടുങ്ങല്ലൂരുകാരനായ വയോധികന്‍ റോഡരികില്‍ കുത്തിയിരിക്കുന്നു. ഇതാണ് ഇപ്പോഴത്തെ അവസ്ഥ.
പണം നഷ്ടപ്പെട്ടവര്‍ക്ക് മറുപടി നല്‍കാന്‍ മാത്രം ആരുമില്ല. ഗേറ്റ് കടക്കാന്‍ പോലും അനുവാദമില്ല.
ഒരുലക്ഷം നിക്ഷേപിച്ചാല്‍ ഓരോ മാസവും ഇരുപതിനായിരം രൂപ വച്ച് പത്തുമാസം കൊണ്ട് ഇരട്ടി പണം മടക്കിനല്‍കും. ഈ വാഗ്ദാനത്തില്‍ വീണവര്‍ ബന്ധുക്കളേയും സുഹൃത്തുകളേയുമൊക്കെ നിക്ഷേപത്തിന് പ്രേരിപ്പിച്ചു.
കേരളം, തമിഴ്‌നാട്, കര്‍ണാടക, മഹാരാഷ്ട, തെലങ്കാന തുടങ്ങിയ സംസ്ഥാനങ്ങളില്‍ നിന്ന് ആയിരക്കണക്കിന് കോടി രൂപ തട്ടിയെടുത്ത കമ്പനിയും ഉടമയും കൂട്ടാളികളും കോയമ്പത്തൂരില്‍ ഇപ്പോഴും വിലസുകയാണ്. ഉന്നത രാഷ്ട്രീയ, പൊലീസ് സംരക്ഷണത്തില്‍.
ബെംഗളൂരു ന്മ രാമമൂര്‍ത്തി നഗറില്‍ വിധവയെ കബളിപ്പിച്ച് 27 കോടി രൂപ തട്ടിയെന്ന കേസില്‍ 4 പേര്‍ അറസ്റ്റില്‍. ദൈവ ദര്‍ശനം വാഗ്ദാനം ചെയ്ത് കബളിപ്പിച്ചെന്നു വീട്ടമ്മ ഗീത (48) നല്‍കിയ പരാതിയില്‍ നാഗരാജ് എന്നയാള്‍ ഉള്‍പ്പെടെ 4പേരെയാണു പൊലീസ് അറസ്റ്റ് ചെയ്തത്. 2009ല്‍ ഭര്‍ത്താവിന്റെ മരണശേഷം ഒട്ടേറെ കുടുംബ പ്രശ്‌നങ്ങള്‍ നേരിട്ടെന്നും ഇതിനിടെയാണ് നാഗരാജുമായി പരിചയത്തിലായതെന്നും ഗീത പറഞ്ഞു.
തനിക്കു ദൈവ ദര്‍ശനം ലഭിച്ചിട്ടുണ്ടെന്ന വിധത്തില്‍ ഇടപെടല്‍ നടത്തിയ നാഗരാജ് ഗീതയുടെ വീട്ടില്‍ ഒട്ടേറെ പൂജകളും നടത്തി. പറയുന്നതു പോലെ ചെയ്തില്ലെങ്കില്‍ തനിക്കും 3 മക്കള്‍ക്കും ജീവഹാനിയുണ്ടാകുമെന്നും ഇയാള്‍ ഭയപ്പെടുത്തി. ഇയാളുടെ നിര്‍ബന്ധത്തിനു വഴങ്ങി സ്വന്തം ഉടമസ്ഥതയിലുള്ള ഒട്ടേറെ ഭൂമി ഇവര്‍ വില്‍പ്പന നടത്തി. ഇതിന്റെ കമ്മിഷനു പുറമേ 5 കോടി രൂപയും 3 കിലോ സ്വര്‍ണാഭരണങ്ങളും ഇയാള്‍ വാങ്ങിയതായി വീട്ടമ്മയുടെ പരാതിയില്‍ പറയുന്നു.