മലേഷ്യയിൽ നിന്നെത്തിയ യുവാവ് കളമശേരി മെഡിക്കൽ കോളേജിൽ മരിച്ചത് കൊറോണ വൈറസ് രോഗം ബാധിച്ചല്ല. പയ്യന്നൂർ സ്വദേശിയായ യുവാവ് കഴിഞ്ഞ ദിവസമായിരുന്നു മരിച്ചത്. ഇദ്ദേഹത്തിന്റെ ശരീരത്തിൽ നിന്നെടുത്ത സാമ്പിളുകൾ രണ്ട് തവണ പരിശോധിച്ചപ്പോഴും കൊറോണ ബാധയില്ലെന്ന് വ്യക്തമാകുകയായിരുന്നു. മരണ കാരണം വൈറൽ ന്യൂമോണിയയാണെന്നും സ്ഥിരീകരിച്ചു.

ആദ്യ പരിശോധന ആലപ്പുഴയിലും രണ്ടാമത്തെ പരിശോധന പുണെ വൈറോളജി ഇൻസ്റ്റിറ്റ്യൂട്ടിലുമായിരുന്നു നടത്തിയത്. രണ്ടിലും ഫലം നെഗറ്റീവായിരുന്നു. മലേഷ്യയില്‍ നിന്നും ഫെബ്രുവരി 27നായിരുന്നു ഇദ്ദേഹം കൊച്ചിയിൽ എത്തുകയായിരുന്നു. അവശനായിരുന്നതിനാൽ കളമശേരി മെഡിക്കല്‍ കോളേജില്‍ ഐസൊലേഷന്‍ വാർഡിൽ പ്രവേശിപ്പിക്കുകയായിരുന്നു. ചികിത്സയിലിരിക്കെ ഇന്നലെ ഇയാൾ മരിക്കുകയും ചെയ്തു. ഇദ്ദേഹത്തിന്റെ രണ്ടാമത്തെ പരിശോധനാഫലം വരുന്നതിന് മുൻപായിരുന്നു മരണം സംഭവിച്ചത്. നടക്കാന്‍ പോലും കഴിയാതെ ഗുരുതരാവസ്ഥയിലാണ് ഇദ്ദേഹം വിമാനത്താവളത്തിൽ എത്തിയത്. ആശുപത്രിയിലെത്തുമ്പോള്‍ പ്രമേഹം കൂടിയ നിലയിലായിരുന്നു ഉണ്ടായിരുന്നത് . ഐസൊലേഷൻ വാർഡിൽ പ്രവേശിപ്പിച്ച് വെന്റിലേറ്റര്‍ ഉള്‍പ്പെടെയുള്ള വിദഗ്ധ ചികിത്സ നല്‍കിയിരുന്നു .