കഴിഞ്ഞ ദിവസങ്ങളിൽ സോഷ്യൽ മീഡിയയിൽ വൈറലായ ഒരു വീഡിയോയായിരുന്നു വഴിയരികിൽ കണ്ട ഭിക്ഷക്കാരനെ കുളിപ്പിച്ച് ഭക്ഷണം നൽകി അഭയകേന്ദ്രത്തിൽ എത്തിച്ച ഒരു പോലീസുകാരന്റേത്. കഴിഞ്ഞ ദിവസം ചാങ്കൂർ മുക്കിൽ മാനസിക വിഭ്രാന്തി കാട്ടിയ ആനന്ദ് എന്ന ഇതര സംസ്ഥാനക്കാരന്റെ മുടി വെട്ടുകയും കുളിപ്പിച്ച് പുതിയ വസ്ത്രങ്ങൾ ധരിപ്പിക്കുകയും ചെയ്തശേഷം ആനകുത്തിയിലെ അഭയകേന്ദ്രത്തിൽ എത്തിച്ച ജനമൈത്രി ബീറ്റ് ഓഫീസർ സുബീക് റഹീമിന്റെ വീഡിയോയാണ് സോഷ്യൽ മീഡിയയിൽ വൈറലായത്.

ജനമൈത്രി സുരക്ഷ പദ്ധതിയുടെ ഭാഗമായി നടത്തിയ കാരുണ്യ പ്രവർത്തനത്തിന് പൊലീസ് സ്റ്റേഷനിലെ ഇദ്ദേഹത്തെ തേടി സംസ്ഥാന പൊലീസ് മേധാവി ലോക്നാഥ് ബെഹ്റയുടെ അഭിനന്ദനം എത്തുകയും ചെയ്തിരിക്കുന്നു ഇപ്പോൾ. വഴിയരികിൽ കണ്ട ഭിക്ഷക്കാരനെ കുളിപ്പിച്ച് ഭക്ഷണം നൽകി അഭയകേന്ദ്രത്തിൽ എത്തിച്ചതാണ് അഭിനന്ദനത്തിനിടയാക്കിയത്. കാഷ് അവാർഡും അഭിനന്ദനക്കത്തുമാണ് ഡിജിപിയിൽ നിന്നും ഇദ്ദേഹത്തിന് ലഭിച്ചത്. ഈ വീഡിയോ സാമൂഹ മാധ്യമങ്ങളിൽ പ്രചരിച്ചതോടെ ഏറെ അഭിനന്ദനങ്ങളാണ് സുബീക്കിനെ തേടിയെത്തിയത്. സ്റ്റേറ്റ് പൊലീസ് മീഡിയ സെന്ററും ഈ ദൃശ്യങ്ങൾ ഫെയ്സ്ബുക്കിൽ പങ്കുവച്ചിരുന്നു.

ഇത് ആദ്യമായല്ല സുബീക് എന്ന ഈ ഓഫിസർ ഇത്തരത്തിലൊരു പ്രവൃത്തി ചെയ്യുന്നത്. ജനമൈത്രി പോലീസ് എന്ന പദത്തെയും സ്ഥാനത്തേയും അന്വർത്ഥമാക്കി കൊണ്ട് സുബീകിന്റെ സേവനമെത്താത്ത മേഖല കോന്നിയിലില്ല എന്നുതന്നെ പറയാം. അതുകൊണ്ടുതന്നെ സോഷ്യൽ മീഡിയയിൽ വൈറലായ ഈ ദൃശ്യത്തെയും ഒരുസാധാരണ സംഭവമായിത്തന്നെ വിലയിരുത്തുകയാണ് ഈ ബീറ്റ് ഓഫീസർ. ഈ ഒരു കാര്യത്തിൽ എന്താണ് ഇത്ര പ്രത്യേകത എന്നായിരുന്നു അദ്ദേഹത്തിന്റെ ചോദ്യം. ഇന്നത്തെ കാലഘട്ടത്തിൽ എല്ലാ മനുഷ്യരും സഹജീവി സ്നേഹവും സഹാനുകമ്പയും ഉള്ളവരാണ് എന്നും അതുകൊണ്ടു തന്നെ താൻ ചെയ്ത ഈ പ്രവൃത്തി അങ്ങനെ വളരെ വലിയ കാര്യമൊന്നുമല്ല എന്നുമാണ് ഈ ഓഫീസറിന്റെ ഭാഷ്യം.

കുറച്ചു നാൾ മുൻപ് കോന്നി കെ എസ ആർ ടി സി ബസ് സ്റ്റാൻഡിനു സമീപം അവശനിലയിൽ കണ്ട 50 വയസ് പ്രായം തോന്നിക്കുന്ന ആളെ ഓട്ടോറിക്ഷ തൊഴിലാളികൾ വിളിച്ചറിയച്ചതിനെ തുടർന്ന് കോന്നി ജനമൈത്രി പോലിസ് എത്തുകയും ,മുഷിഞ്ഞു അല്പ വസ്ത്ര ധാരിയായ ഇദ്ദേഹത്തെ കോന്നി പോലീസ് സ്റ്റേഷനിൽ കൂട്ടി കൊണ്ട് വന്ന് പരിചരിച്ച് പത്തനംതിട്ടയിൽ പ്രവർത്തിക്കുന്ന കെന്നഡി ചാരിറ്റബിൾ ട്രസ്റ്റുമായി ബന്ധപെടുകയും അവിടുത്തെ പ്രവർത്തകരെഏല്പിക്കുകയും ചെയ്തിരുന്നു എന്നതും അദ്ദേഹത്തിന്റെ പ്രവൃത്തികളിൽ ചിലതുമാത്രം.

ഇത്തരത്തിൽ നിരവധി നല്ല പ്രവൃത്തികൾക്ക് ഉടമയായ ബീറ്റ് ഓഫീസർ സുബീകിനെത്തേടി എത്തിയ ഡിജിപിയുടെ ഈ അഭിനന്ദനത്തിനു തിളക്കം ഏറെയാണ്. സോഷ്യൽ മീഡിയയിൽ കൂടിയും ഏറ്റവും ഒടുവിൽ സംസ്ഥാന പോലീസ് മേധാവിയുടെ തന്നെയും അഭിനദനങ്ങൾ പ്രവഹിക്കുമ്പോഴും ഇതൊന്നും അത്ര വലിയ കാര്യമല്ല എന്നമട്ടിൽ ചിരിച്ചു കൊണ്ട് തന്റെ കടമകളിലൂടെയുള്ള യാത്രയിലാണ് കോന്നിയിലെ ഈ ബീറ്റ് ഓഫീസർ സുബീക് റഹീം.