കേന്ദ്ര സർക്കാരിന്റെ ഫണ്ട് വാങ്ങിയ ശേഷം സംസ്ഥാന സർക്കാർ തള്ളി പറഞ്ഞ ലൈഫ് പദ്ധതിക്കുള്ള സഹായം കേന്ദ്ര സർക്കാർ താത്കാലികമായി നിർത്തിയേക്കും. എന്നാൽ ലൈഫ് പദ്ധതിയുമായി ബന്ധപ്പെട്ട് കേന്ദ്ര സർക്കാരിനെ ഒരു കാരണവശാലും വിമർശിക്കരുതെന്ന് സർക്കാർ, സി പി എം നേതാക്കൾക്കും മന്ത്രിമാർക്കും നിർദ്ദേശം നൽകി.

ഇതിന്റെ ഭാഗമായാണ് കാനം രാജേന്ദ്രൻ കേന്ദ്ര സർക്കാരിനെതിരെ രംഗത്തെത്തിയത്. അതേ സമയം കേന്ദ്രം ഫണ്ട് തന്നിട്ടില്ലെന്ന് കാനം പറഞ്ഞില്ല. വിവാദം എന്തുതന്നെയായാലും ലൈഫ് പദ്ധതിയിൽ രണ്ട് ലക്ഷത്തി പതിന്നാലായിരത്തിലേറെ വീടുകൾ നിർമ്മിച്ചെന്ന മുഖ്യമന്ത്രിയുടെ അവകാശവാദം തികച്ചും സത്യവിരുദ്ധമാണെന്ന് തെളിഞ്ഞു.

നിയമസഭയിൽ സി പി എം എം എൽ എ കെ ജെ മാക്സിയുടെ ചോദ്യത്തിന് മന്ത്രി എ സി മൊയ്തീൻ നൽകിയ ഉത്തരമനുസരിച്ച് ലൈഫ് പദ്ധതിയിൽ സ്ഥലമുള്ളതും വീട് പണിയാൻ അർഹതയുള്ളവരുമായി കണ്ടെത്തിയത് 100618 പേർ മാത്രമാണ്. ഇതിൽ 79 384 പേർ തദ്ദേശ സ്വയം ഭരണ സ്ഥാപനങ്ങളുമായി കരാർ ഒപ്പിട്ടു. 665 14 ഗുണഭോക്താക്കൾ വീടിന്റെ നിർമ്മാണം ആരംഭിച്ചു. ഇതിലേക്കായി 742-20 കാടി ധനസഹായം നൽകി. എന്നാൽ മുഖ്യമന്ത്രി പറഞ്ഞത് 214212 പേർക്ക് വീട് നൽകിയെന്നാണ്.

കോൺഗ്രസിന് ലഭ്യമായ കണക്ക് പ്രകാരം ഒരു ലക്ഷം വീടു പോലും പണി പൂർത്തിയായിട്ടില്ലെന്ന് കെ സി ജോസഫ് എം എൽ എ പറഞ്ഞു. അതിനാൽ ഒരോ പഞ്ചായത്തിലും, നഗരസഭയിലും എത്ര വീടുകൾ വീതം പണി പൂർത്തിയാക്കിയെന്ന കണക്ക് പ്രസിദ്ധീകരിക്കാൻ മുഖ്യമന്ത്രി തയ്യാറാകണമെന്നും കെ സി ജോസഫ് ആവശ്യപ്പെട്ടു. എന്നാൽ അതിന് മുഖ്യമന്ത്രി മറുപടി പറഞ്ഞില്ല. എന്നാൽ ലൈഫിന്റെ മാനദണ്ഡങ്ങളിൽ ഉൾപ്പെടാതിരുന്നവർക്കും വീട് നൽകുമെന്ന് മുഖ്യമന്ത്രി പറഞ്ഞു.

യഥാർത്ഥത്തിൽ യു ഡി എഫ് സർക്കാരിൽ ഭവനനിർമ്മാണ വകുപ്പ് മന്ത്രിയായിരുന്ന കെ.എം. മാണിയാണ് ലൈഫ് പദധതി നടപ്പിലാക്കിയത്. അദ്ദേഹത്തിന്റെ ഭരണ കാലയളവിൽ നാല് ലക്ഷത്തി പതിനായിരം വീടുകൾ നിർമ്മിച്ചു. എന്നാൽ അതിനെ പബ്ളിസിറ്റിക്ക് വേണ്ടി കെ.എം മാണിയും ഉമ്മൻചാണ്ടിയും ഉപയോഗിച്ചില്ല. ഒരു വീട്ടിലും അദ്ദേഹം പാലുകാച്ചാൻ പോയില്ല. പാവങ്ങൾക്ക് സർക്കാർ നൽകുന്ന വീടുകൾ പരസ്യത്തിന് വേണ്ടി ഉപയോഗിക്കരുതെന്നായിരുന്നു അന്നത്തെ സർക്കാരിന്റെ നിലപാട്.

കേന്ദ്ര സർക്കാരിന്റെ നീക്കങ്ങൾ സാകൂതം നോക്കുകയാണ് പിണറായി സർക്കാർ. കേന്ദ്രം കനിയാതിരുന്നാൽ ലൈഫ് പദ്ധതി മുടങ്ങുമെന്ന് സംസ്ഥാന സർക്കാരിന് അറിയാം. അതിനുള്ള സാധ്യത ഇല്ലാതാക്കാനാണ് പിണറായി ശ്രമിക്കുന്നത്. അതുകണ്ടാണ് കോൺഗ്രസിനെതിരെ രംഗത്തെത്തിയ പിണറായി ബി ജെ പിയെ വിമർശിക്കാത്തത്. നിയമസഭ സമ്മേളനം ചേർന്ന പശ്ചാത്തലത്തിൽ സർക്കാർ വിവാദങ്ങളിൽ നിന്ന് അകന്നു നിന്നേക്കും.