സംസ്ഥാന പോലീസ് മേധാവി ലോക് നാഥ് ബഹ്റയെ പൂർണമായി പിന്തുണച്ച് മുഖ്യമന്ത്രി പിണറായി വിജയൻ നിയമസഭയിൽ നടത്തിയ പ്രസ്താവന കേട്ടപ്പോൾ 2016 ൽ ജേക്കബ് തോമസിനെ അനുകൂലിച്ച് പിണറായി നടത്തിയ പ്രസ്താവനയാണ് എം എൽ എമാർ ഓർത്തത്.

ബഹ്റയെ മാറ്റുമെന്ന് ആരും പ്രതീക്ഷിക്കരുതെന്ന് മുഖ്യമന്ത്രി തുറന്നടിച്ചു. സി എജിയുടെ റിപ്പോർട്ട് അദ്ദേഹം പൂർണമായും തള്ളി ഡിജി പി മാർക്ക് വില്ല നിർമ്മിച്ചതിൽ തെറ്റില്ല. കാർ വാങ്ങിയത് ടെണ്ടർ വിളിച്ച്. ഡിജിപിയെ കാണുമ്പോൾ മുഖ്യമന്ത്രിക്ക് ചങ്കിടിപ്പാണെന്ന് പി.ടി. തോമസ് പറഞ്ഞപ്പോൾ മുഖ്യമന്ത്രി ചൂടായി. തന്നെ പൊള്ളിക്കാൻ നോക്കേണ്ടെന്ന് മുഖ്യമന്ത്രി പറഞ്ഞു. ചെന്നിത്തലയുടെ ആക്ഷേപങ്ങളെയും മുഖ്യമന്ത്രി തള്ളി. സി ബി ഐ അന്വേഷണം വേണമെന്ന ആവശ്യവും തള്ളി. ചട്ടപ്രകാരം നടപടി വരുമെന്ന് അദ്ദേഹം പറഞ്ഞു. സി എജി റിപ്പോർട്ട് പബ്ളിക് അക്കൗണ്ട്സ് കമ്മിറ്റി പരിശോധിക്കുമെന്ന് പറഞ്ഞു. പോലീസിൽ വൻ അഴിമതിയാണെന്ന് പറഞ്ഞ പി ടി തോമസിന് ചുട്ട മറുപടിയാണ് നൽകിയത്.

ലാവ്ലിൻ കേസിൽ ദൽഹിയിലെ പാലമാണ് ബഹിറ എന്ന ആക്ഷേപത്തെ മുഖ്യമന്ത്രി ക്രുദ്ധനായി നേരിട്ടു. തനിക്ക് ആരുടെയും സഹായം ആവശ്യമില്ലെന്ന് മുഖ്യമന്ത്രി ക്ഷോഭത്തോടെ പ്രതികരിച്ചു. ബഹ്റക്കെതിരെ സി ബി ഐ അന്വേഷണം നടക്കാത്ത കാര്യമാണെന്നും മുഖ്യമന്ത്രി പറഞ്ഞു.

ബഹ്റക്ക് ഒന്നും സംഭവിക്കില്ലെന്ന കാര്യമാണ് നിയമസഭയിൽ നിന്നും വ്യക്തമായത്. പ്രതിപക്ഷം എത്ര തന്നെ ചാടിയിട്ടും കാര്യമില്ലെന്ന് മുഖ്യമന്ത്രി അർത്ഥശങ്കക്ക് ഇടയില്ലാത്ത വിധം വ്യക്തമാക്കി.

എന്നാൽ നിയമസഭയിൽ മുഖ്യമന്ത്രി പിന്തുണച്ചിട്ടുള്ള ഉദ്യോഗസ്ഥർക്ക് ഒക്കെ പിന്നീട് വലിയ അബദ്ധമാണ് സംഭവിച്ചിട്ടുള്ളത്. ജേക്കബ് തോമസ് ആണ് ആദ്യത്തെ ഉദാഹരണം. ജേക്കബ് തോമസിന്റെ കട്ടിൽ കണ്ട് പനിക്കരുതെന്ന് ഒരു ഘട്ടത്തിൽ മുഖ്യമന്ത്രി പ്രഖ്യാപിച്ചു. എന്നാൽ നിയമസഭാ പ്രസംഗം കഴിഞ്ഞ് ഏതാനും ദിവസങ്ങൾക്കുള്ളിൽ ജേക്കബ് തോമസ് പുറത്തായി. അതിന് ശേഷം മുഖ്യമന്ത്രി നിയമസഭയിൽ പ്രശംസിച്ചാൽ അവരുടെ കാര്യം കുഴപ്പത്തിലാകുമെന്ന് ഒരു ചൊല്ല് തന്നെയുണ്ടായി.

ബഹ്റയെ പിന്തുണക്കുന്ന രീതിയിൽ സംസാരിക്കുമ്പോഴും തന്നെ വിവാദത്തിലാക്കിയതിൽ മുഖ്യമന്ത്രിക്ക് ബഹ്റയോട് അമർഷമുണ്ട്. ബഹ്റയുടെ നിയമനം പൂർണമായും തന്റെ തീരുമാനമായതിനാൽ മുഖ്യമന്ത്രിക്ക് അദ്ദേഹത്തെ തള്ളി പറയാൻ കഴിയില്ല. തള്ളി പറഞ്ഞാൽ പാർട്ടി പോലും തനിക്കൊപ്പം നിൽക്കില്ല. ജേക്കബ് തോമസിന്റെ കാര്യത്തിലും ഇതായിരുന്നു മുഖ്യമന്ത്രിയുടെ അവസ്ഥ.

എന്നാൽ ജേക്കബ് തോമസിനെ പോലെയല്ല ബഹ്റ. അദ്ദേഹത്തിന് നിൽക്കാൻ അറിയാം. ആരെയും പിണക്കാതെ കാര്യങ്ങൾ കൈകാര്യം ചെയ്യാനുള്ള സാമർത്ഥ്യവുമുണ്ട്. പ്രതിപക്ഷം പോലും ബഹ്റയുടെ കാര്യത്തിൽ സ്വരം കടുപ്പിക്കുന്നത് അതു കൊണ്ടാണ്. ചെന്നിത്തലയുമായി അദ്ദേഹത്തിന് അടുത്ത ബന്ധമുണ്ട്. മുല്ലപ്പള്ളി രാമചന്ദ്രനുമായിട്ട് മാത്രമാണ് അകലം സൂക്ഷിക്കുന്നത്.

അതേ സമയം പബ്ളിക് അക്കൗണ്ട്സ് കമ്മിറ്റി ബഹ്റയെ തള്ളിയാൽ മുഖ്യമന്ത്രി അദ്ദേഹത്തെ സഹായിക്കുന്നത് അവസാനിപ്പിക്കും. ബഹ്റയുടെ ഭാവി പി എ സി യുടെ കൈയിലാണ്.