ഇരിങ്ങാലക്കുട മണലൂരില്‍ വീട്ടമ്മ ആത്മഹത്യ ചെയ്ത സംഭവത്തില്‍ ശാസ്ത്ര സാഹിത്യ പരിഷത് രംഗത്ത്. ക്ഷേത്രച്ചടങ്ങിനിടെ യുവതിക്ക് സ്വഭാവദൂഷ്യമുണ്ടെന്ന് വെളിച്ചപ്പാട് കല്‍പന പുറപ്പെടുവിച്ചതിനെ തുടര്‍ന്നുള്ള മനോവിഷമത്തിലാണ് യുവതി ജീവനൊടുക്കിയതെന്നാണ് ഈ മരണവുമായി ബന്ധപ്പെട്ട് ഉയരുന്ന ആരോപണം.

വിശ്വാസത്തെ ചൂഷണം ചെയുന്നത് തികച്ചും പ്രാകൃത രീതിയാണ് എന്നും പുരോഗമന സമൂഹത്തിൽ ഈ രീതികൾ ഒട്ടും ഭൂഷണമല്ല എന്നും ശാസ്ത്രസാഹിത്യ പരിഷത് സംസ്ഥാന ജോയിൻ സെക്രട്ടറി ജുന പി എസ് മലയാളിവാർത്തയോട് പറഞ്ഞു. ഭക്തിയുടെ പേരിൽ ജനങ്ങളെ ചൂഷണം ചെയ്യുന്ന ഒരു വിഭാഗം ഇപ്പോഴും സമൂഹത്തിൽ വളർന്നുവരുന്നുണ്ട്‌ എന്നും അതുകൊണ്ടുതന്നെ യുവതിയുടെ മരണത്തിനു കാരണക്കാരായ വെളിച്ചപ്പാടിനെയും അങ്ങനെ ഒരു കല്പന വെളിച്ചപ്പാട് പുറപ്പെടുവിക്കാൻ കാരണക്കാരനായ വ്യക്തിയെയും നിയമത്തിനു മുന്നിൽ കൊണ്ടുവരാനുള്ള എല്ലാ ശ്രമങ്ങളും പരിഷത്തിന്റെ ഭാഗത്തു നിന്നും ഉണ്ടാകുമെന്നും ജുന മലയാളിവാർത്തയോട് പറഞ്ഞു.