വേനല്‍ കടുത്തതോടെ സംസ്ഥാനത്തെ വൈദ്യുതി ഉപയോഗം സര്‍വകാല റെക്കോഡിലേക്ക്. കഴിഞ്ഞ ദിവസം മാത്രം വൈദ്യുതി ഉപയോഗം 24 മണിക്കൂറില്‍ 80.2099 ദശലക്ഷം യൂണിറ്റായിരുന്നു. വേനല്‍ ഇത്തവണ രൂക്ഷമാകുമെന്ന മുന്നറിയിപ്പുണ്ട് . അതുകൊണ്ട് വൈദ്യുതി ഉപയോഗം അധികം വൈകാതെ നിലവിലെ റെക്കോഡ് മറികടക്കുമെന്ന സൂചനയാണ് കെ.എസ്.ഇ.ബിയിൽ നിന്നും ലഭിക്കുന്നത്. സംസ്ഥാനത്ത് ചൂട് 4 ഡിഗ്രി സെല്‍ഷ്യസ് വരെ ഉയര്‍ന്നത് നിലവില്‍ വൈദ്യുതോപഭോഗം ഇരട്ടിയാക്കി . 2019 മേയ് 23ലെ 88.3386 ദശലക്ഷം യൂണിറ്റാണ് നിലവിലെ ഉയര്‍ന്ന വൈദ്യുതോപഭോഗം. എസ്.എസ്.എല്‍.സി, പ്ലസ് ടു പരീക്ഷകളും മറ്റ് സ്കൂള്‍ പരീക്ഷകളും അടുത്തതിനാല്‍ വൈദ്യുതി ഉപയോഗം ഇനിയും ഉയരുമെന്ന കാര്യത്തില്‍ സംശയമില്ല.

നിലവില്‍ സംസ്ഥാനത്തെ ഡാമുകളിലാകെ 61 ശതമാനം വെള്ളമുണ്ട്. 2509.514 ദശലക്ഷം യൂണിറ്റ് വൈദ്യുതിക്കാവശ്യമായ ജലം ഡാമുകളിൽ ലഭ്യമാണ്. ഇടുക്കിയില്‍ 62, പമ്ബ 54, ഷോലയാര്‍ 73, ഇടമലയാര്‍ 52, കുണ്ടള 98, മാട്ടുപ്പെട്ടി 67, കുറ്റ്യാടി 84, ആനയിറങ്കല്‍ 97,പൊന്മുടി 84, നേര്യമംഗലം 55, ലോവര്‍ പെരിയാര്‍ 65 എന്നിങ്ങനെയാണ് ജലാശയങ്ങളിലെ ജലനിരപ്പ്. വേനല്‍ കടുത്തതോടെ ജലാശയങ്ങളിലേക്കുള്ള നീരൊഴുക്ക് നിലച്ചത് അല്‌പം ആശങ്കയോടെയാണ് അധികൃതര്‍ കാണുന്നത്. എന്നാല്‍ നിലവിലെ സാഹചര്യമനുസരിച്ച്‌ വേനല്‍ക്കാലത്ത് ലോഡ് ഷെഡിംഗ് ഉണ്ടാകില്ലെന്നാണ് കെ.എസ്.ഇ.ബി വൃത്തങ്ങള്‍ നല്‍കുന്ന സൂചന. കേന്ദ്രത്തില്‍ നിന്നുള്ള വൈദ്യുതി മുടക്കമില്ലാതെ ലഭിച്ചാല്‍ ഒരു പരിധി വരെ പ്രതിസന്ധി അതിജീവിക്കാമെന്ന് ബോര്‍ഡ് കരുതുന്നു. എന്നാല്‍ ചില പദ്ധതികളുടെ അറ്റകുറ്റപ്പണികളുമായി ബന്ധപ്പെട്ട് ചിലയിടങ്ങളില്‍ വൈദ്യുതി തടസം നേരിട്ടേക്കാമെന്നും ബോര്‍ഡ് അധികൃതര്‍ പറയുന്നു. വേനല്‍ക്കാലത്ത് വൈദ്യുതി ഉപയോഗം കുറയ്ക്കുന്നതിനുള്ള പരസ്യപ്രചാരണം വേണ്ടെന്ന് തന്നെയാണ് കെ.എസ്.ഇ.ബിയുടെ തീരുമാനം. സിനിമാ താരങ്ങളെ ഉപയോഗിച്ചുള്ള പരസ്യങ്ങള്‍ക്ക് പകരം വൈദ്യുതി ദുരുപയോഗം പാടില്ലെന്നുമാത്രം ഉപദേശിച്ചാല്‍ മതിയെന്നാണ് ബോര്‍ഡ് അധികൃതര്‍ ഇപ്പോള്‍ തീരുമാനമെടുത്തിരിക്കുന്നത്. കാലവര്‍ഷം എത്തും വരെ വൈദ്യുതി പ്രതിസന്ധി ഉണ്ടാകില്ലെന്നാണ് കെ.എസ്.ഇ.ബിയുടെ നിലവിലെ പ്രതീക്ഷ.