ദേവനന്ദ ഇല്ലാത്ത ആദ്യ അധ്യയന ദിവസമായിരുന്നു ഇന്നലെ. അവള്‍ പഠിച്ചിരുന്ന ക്ലാസ് മുറിക്ക് ഇനി മുതല്‍ 'ദേവനന്ദ' എന്നാണ് പേര്. കൂട്ടുകാരിയുടെ ഓര്‍മയ്ക്കായി കൊല്ലം വാക്കനാട് സരസ്വതി വിദ്യാനികേതന്‍ മുറ്റത്ത് സഹപാഠികള്‍ തുളസിച്ചെടി നട്ടു.

കഴിഞ്ഞ ബുധനാഴ്ച്ചയും ഈ കുഞ്ഞു കസേരയില്‍ ദേവനന്ദയുണ്ടായിരുന്നു. ഇനി ഒരിക്കലും അവള്‍ ക്ലാസില്‍ ഹാജരാകില്ലെങ്കിലും ഈ കസേര എന്നും ഒഴിഞ്ഞു കിടക്കും. കുഞ്ഞിന്റെ ഓര്‍മയ്ക്കായി, കാശി എന്നു പേരിട്ടിരുന്ന ക്ലാസ് മുറി ദേവനന്ദ എന്നാക്കി മാറ്റി. കുട്ടികള്‍ക്കും അധ്യാപകര്‍ക്കും കൗണ്‍സിലിങ് നല്‍കിയ ശേഷമാണ് പഠനം ആരംഭിച്ചത്.

ഇന്നലെ നടന്ന അനുസ്മരണച്ചടങ്ങില്‍ സ്‌കൂള്‍ രക്ഷാധികാരി വിജയകുമാറാണ് ഇക്കാര്യം പ്രഖ്യാപിച്ചത്. ഒന്നാം സ്റ്റാന്‍ഡേര്‍ഡിന് ഒരു ഡിവിഷന്‍ മാത്രമാണുള്ളത്. ക്ലാസിലെ 50 കുട്ടികളും പ്രിന്‍സിപ്പല്‍ ഗീതാകുമാരി, ക്ലാസ് ടീച്ചര്‍ പ്രീതദേവി എന്നിവരും അനുസ്മരണച്ചടങ്ങില്‍ പങ്കെടുത്തു. ജൂണ്‍ അഞ്ച്-പരിസ്ഥിതി ദിനത്തില്‍ ദേവനന്ദ നട്ടമരം അധ്യാപകര്‍ സംരക്ഷിക്കുന്നുണ്ട്.

വീടിനകത്ത് കളിച്ചുകൊണ്ടിരുന്ന ആറുവയസ്സുകാരിയെ വ്യാഴാഴ്ച്ച രാവിലെ പത്തരയോടെയാണ് കാണാതായത്. മൃതദേഹം വീടില്‍ നിന്ന് നാനൂറ് മീറ്ററോളം മാറി ഇത്തിക്കരയാറ്റില്‍ നിന്നു വെള്ളിയാഴ്ച്ച രാവിലെ കണ്ടെത്തുകയായിരുന്നു. മരണത്തില്‍ ദുരൂഹതയുണ്ടെന്നാണ് കുടുംബത്തിന്റെ പക്ഷം.
എന്നാല്‍ മുങ്ങിമരണമെന്നാണ് പോസ്റ്റ്‌മോര്‍ട്ടത്തിലെ കണ്ടെത്തല്‍. ചാത്തന്നൂര്‍ എ.സി.പിയുടെ നേതൃത്വത്തിലുള്ള പ്രത്യേക സംഘത്തിന്റെ അന്വേഷണം തുടരുകയാണ്. അതേസമയം, ദേവനന്ദയുടേത് മുങ്ങിമരണമെന്നുള്ള പോസ്റ്റ് മോര്‍ട്ടം റിപ്പോര്‍ട്ട് പൊലീസിന് കൈമാറി. ആന്തരികാവയവങ്ങളുടെ രാസപരിശോധനഫലം ലഭിച്ചിട്ടില്ല.