മലേഷ്യയിൽ മലയാളിയെ മാരകമായി പൊള്ളലേൽപ്പിച്ച് അജ്ഞാത കേന്ദ്രത്തിൽ പാർപ്പിച്ചിരിക്കുന്നുവെന്ന പരാതിയുമായി ഭാര്യ. ജോലിസ്ഥലത്തു ശമ്പളകുടിശിക ചോദിച്ചതിനാണ് ഈ ക്രൂരത. ഭർത്താവിനെ തിരികെ നാട്ടിൽ എത്തിക്കണമെന്ന ആവശ്യവുമായി ഭാര്യ കലക്ടർക്കു പരാതി നൽകുകയും ചെയ്തു . ഹരിപ്പാട് പള്ളിപ്പാട് നീണ്ടൂർ വാലേത്ത് വീട്ടിൽ രാജശ്രീയാണ് ഭർത്താവ് എസ്.ഹരിദാസിനു വേണ്ടി (45) കലക്ടറെ സമീപിച്ചിരിക്കുന്നത്. ശരീരമാസകലം പൊള്ളലേൽപ്പിച്ചതിന്റെ പാടുകളോടെ കമഴ്ന്നു കിടക്കുന്ന ഹരിദാസിന്റെ ചിത്രം വാട്സാപ്പിൽകിട്ടിയപ്പോഴായിരുന്നു ഭാര്യയും ബന്ധുക്കളും വിവരം അറിയുന്നത്.

ഹരിദാസിന് ഒപ്പം ജോലി ചെയ്യുന്ന തമിഴ്നാട്ടുകാരനാണ് ചിത്രങ്ങൾ അയച്ച് കൊടുത്തത് . ഞായർ വൈകിട്ട് വിളിച്ചപ്പോൾ പൊള്ളലേറ്റ വിവരം ഹരിദാസ് സൂചിപ്പിച്ചെങ്കിലും കൂടുതലൊന്നും പറഞ്ഞില്ലായിരുന്നു . 4 വർഷം മുൻപ് ജോലി തേടി പോയ ഹരിദാസിനു ഇതുവരെ അവധി അനുവദിച്ചിട്ടില്ല. 3 വർഷം കഴിഞ്ഞപ്പോൾ അവധി ആവശ്യപ്പെട്ടെങ്കിലും പാസ്പോർട്ടും മറ്റും തൊഴിലുടമ പിടിച്ചുവയ്യ്ക്കുകയും ചെയ്തു. 30,000 രൂപ മാസശമ്പളം വാഗ്ദാനം ചെയ്തു മലേഷ്യയിൽ ബാർബർ ജോലിക്കു കൊണ്ടുപോയ ഹരിദാസിന് പലപ്പോഴും 16,000 രൂപയായിരുന്നു ശമ്പളമായി കിട്ടിയത് എന്ന പരാതി നിലനിൽക്കുന്നു. 7 മാസമായി ശമ്പളം ലഭിക്കുന്നില്ല. കുടിശിക ശമ്പളം ചോദിച്ചപ്പോഴായിരുന്നു ആക്രമണം നടത്തിയത് . ചിങ്ങോലി സ്വദേശി മുഖേന ചെന്നൈയിൽ അഭിമുഖം നടത്തിയായിരുന്നു മലേഷ്യയിൽ കൊണ്ടുപോയത്. തമിഴ്‌ വംശജരാണ് തൊഴിലുടമയെന്നും രാജശ്രീ പറഞ്ഞു. കേന്ദ്രമന്ത്രി വി.മുരളീധരനും പരാതി അയച്ചു കഴിഞ്ഞു .