മണലൂര്‍ പാലാഴിയില്‍ ക്ഷേത്രത്തിലെ കോമരം സ്വഭാവദൂഷ്യമാരോപിച്ച വീട്ടമ്മ ജീവനൊടുക്കി. ഈ സംഭവത്തില്‍ കൂടുതല്‍ വിവരങ്ങള്‍ പുറത്ത് വരികയാണ് . രണ്ട് കുട്ടികളുടെ അമ്മയായ യുവതിക്കെതിരെ അപവാദ പ്രചാരണം നടത്തിയത് അമ്മാവന്റെ മകനാണെന്ന് ഭര്‍ത്താവും സഹോദരനും പറയുന്നു . ഇയാളുടെ താല്‍പര്യത്തിന് വഴങ്ങാത്തത് കൊണ്ടുള്ള പകയാണ് മരണത്തിന് കാരണമെന്നാണ് കിട്ടുന്ന സൂചന. യുവതിയുടെ ഭര്‍ത്താവ് ഗള്‍ഫിലാണ് ജോലി ചെയ്യുന്നത്. ആരോപണ വിധേയനായ നാല്പതുകാരന്‍ മറ്റൊരു യുവാവിനെ ചേര്‍ത്ത് തനിക്കെതിരെ അപവാദ പ്രചാരണങ്ങള്‍ നടത്തുവെന്ന് യുവതി വീട്ടുകാരോടും ഭര്‍ത്താവിനോടും പലവട്ടം പരാതി പറഞ്ഞിരുന്നുവെന്നും അവർ നൽകിയ പ്രതിയിൽ പറയുന്നു.

ഇങ്ങനെ അപവാദ പ്രചരങ്ങൾ നടത്തിയപ്പോൾ ഭര്‍ത്താവും സഹോദരനും ഇടപെട്ട് താക്കീത് ചെയ്തിട്ടുണ്ടായിരുന്നു. എന്നാൽ അപ്പോഴും അയാള്‍ പ്രചാരണങ്ങള്‍ തുടര്‍ന്നു കൊണ്ടിരിക്കുകയായിരുന്നു . യുവതിയുടെ അമ്മാവന്റെ മകനായ ഇയാള്‍ യുവതിയുടെ ഭര്‍ത്താവിന്റെ അച്ഛന്റെ സഹോദരപുത്രനാണ്.വെളിച്ചപ്പാട് ‘കല്‍പന’ പുറപ്പെടുവിച്ചതിനെ തുടര്‍ന്ന് ജീവനൊടുക്കിയ സംഭവത്തിലെ പ്രതിയെ പോലീസ് അറസ്റ്റ് ചെയ്തു.അന്തികാട് പൊലീസാണ് പ്രതിയായ വെളിച്ചപ്പാട് ശ്രീകാന്ത് കാരണത്തിനെ അറസ്റ്റ് ചെയ്തത്.

മുപ്പത്തി രണ്ടുകാരിയായ വീട്ടമ്മയ്ക്കെതിരെ ഇയാള്‍ കഥകള്‍ മെനയുകയും വോയ്സ് റെക്കോര്‍ഡുകള്‍ നിര്‍മിച്ച്‌ നാട്ടുകാര്‍ക്ക് അയച്ചു കൊടുക്കുകയും ചെയ്തതായും പറയുന്നു. തൃശ്ശൂര്‍ റൂറല്‍ എസ്.പിക്ക് നല്‍കിയ പരാതിയില്‍ ഇത്തരത്തിൽ ഉള്ള ആരോപങ്ങൾ ഉണ്ട് . അമ്മാവന്റെ മകന്റെ ശല്യം സഹിക്കാനാകാതെയാണ് യുവതി ജീവന്‍ ഒടുക്കിയതെന്നും പരാതിയില്‍ വ്യക്തമായി പറയുന്നു. കുടുംബ ക്ഷേത്രത്തിലെ കോമരം യുവതിയ്ക്ക് സ്വഭാവദൂഷ്യമുണ്ടെന്ന കല്‍പന പുറപ്പെടുവിച്ചത് അമ്മാവന്റെ മകന്റെ സ്വാധീനത്താലാണെന്നും ആരോപണം ഉയരുന്നു . യുവതി തെറ്റുകാരിയാണെന്നും തെറ്റ് ഏറ്റു പറയണമെെന്നും കോമരം നാട്ടുകാരുടെയും ബന്ധുക്കളുടെയും മുന്നില്‍ വിളിച്ചു പറയുകയായിരുന്നു . അമ്മാവന്റെ മകന്റെ സുഹൃത്തായിരുന്നു കോമരം കെട്ടിയിരുന്നത് . ഇക്കാര്യങ്ങള്‍ അന്നു തന്നെ യുവതി ഗള്‍ഫിലുള്ള ഭര്‍ത്താവിനെ അറിയിക്കുകയും ചെയ്തിരുന്നു . തുടര്‍ന്ന് ഭര്‍ത്താവ് ഇയാളെയും കോമരത്തെയും ഫോണില്‍ വിളിച്ച്‌ താക്കീത് ചെയ്തു. നിലവിലെ പരാതിയുടെ അടിസ്ഥാനത്തില്‍ കോമരത്തിന് എന്തെങ്കിലും വാഗ്ദാനങ്ങള്‍ നല്‍കിയിരുന്നോ എന്നും പൊലീസ് പരിശോധിക്കുന്നുണ്ട്.

നാട്ടുകാരില്‍ നിന്ന് പൊലീസ് മൊഴി രേഖപ്പെടുത്തിത്തുടങ്ങി കഴിഞ്ഞു . ഇരിങ്ങാലക്കുട ഡിവൈഎസ്പിക്കും ജില്ലാ പൊലീസ് മേധാവിക്കും പരാതി നല്‍കിയിട്ടുണ്ട്. ശാസ്ത്ര സാഹിത്യ പരിഷത് പ്രവര്‍ത്തകര്‍ ഇന്നലെ യുവതിയുടെ വീട് സന്ദര്‍ശിക്കുകയും കോമരം തുള്ളിയ ആള്‍ക്കെതിരെ നടപടി വേണമെന്ന് ആവശ്യപ്പെടുകയും ചെയ്തിരുന്നു . മണലൂരിൽ ബുധനാഴ്ചയായിരുന്നു യുവതി ജീവനൊടുക്കിയത്. യുവതിയുടെ സഹോദരനാണ് പൊലീസിൽ പരാതി നൽകിയിരിക്കുന്നത്. യുവതിക്ക് സ്വഭാവദൂഷ്യമുണ്ടെന്നു ക്ഷേത്രച്ചടങ്ങിനിടെ കോമരം കൽപന പുറപ്പെടുവിച്ചു. ഇതേ തുടർന്ന് യുവതി ആത്മഹത്യ ചെയ്യുകയായിരുന്നു. യുവതി ദേവിക്കു മുൻപിൽ മാപ്പു പറയണമെന്നായിരുന്നു ഇരുന്നൂറോളം പേർ പങ്കെടുത്ത ചടങ്ങിൽ കോമരത്തിന്റെ കൽപന. എത്ര വേഗമാണ് മറ്റൊരാളുടെ ജീവനെടുക്കുന്ന വിധത്തിലേക്ക് മാറി തീർന്നിരിക്കുന്നത് എന്നതിന്റെ വ്യക്തമായ ഉദാഹരണമാണ് ഈ സംഭവം. സമൂഹത്തെ കാർന്നു തിന്നുന്ന മറ്റൊരു മഹാരോഗമായി അന്ധവിശ്വാസം മാറാൻ തുടങ്ങിയിട്ടു നാളുകളായി.എത്രതന്നെ പുരോഗതി കൈവരിച്ചു എന്ന് നമ്മൾ അവകാശപ്പെട്ടാലും വിശ്വാസത്തിന്റെ പേരിൽ വ്യക്‌തികൾ ചൂഷണം ചെയ്യപ്പെടുന്നത് വർധിച്ചു വരികയാണ്.ഇപ്പോഴിതാ വിശ്വാസത്തെയും ആചാരങ്ങളെയും മറയാക്കി ഒരു ജീവിതം കൂടി നമ്മുടെ സമൂഹം കവർന്നെടുത്തിരിക്കുന്നു.