ഇരിങ്ങാലക്കുട മണലൂരില്‍ വെളിച്ചപ്പാട് ‘കല്‍പന’ പുറപ്പെടുവിച്ചതിനെ തുടര്‍ന്ന് ജീവനൊടുക്കിയ സംഭവത്തിലെ പ്രതിയെ പോലീസ് അറസ്റ്റ് ചെയ്തു. അന്തികാട് പൊലീസാണ് പ്രതിയായ വെളിച്ചപ്പാട് ശ്രീകാന്ത് കാരണത്തിനെ അറസ്റ്റ് ചെയ്തത്.

രണ്ടു കുട്ടികളുടെ അമ്മയായ സ്ത്രീയാണ് ബുധനാഴ്ച ജീവനൊടുക്കിയത്. ക്ഷേത്രച്ചടങ്ങിനിടെ യുവതിക്ക് സ്വഭാവദൂഷ്യമുണ്ടെന്ന് വെളിച്ചപ്പാട് കല്‍പന പുറപ്പെടുവിച്ചെന്നും ഇതു മാനഹാനി ഉണ്ടാക്കിയെന്നുമാരോപിച്ച് യുവതിയുടെ ബന്ധുക്കൾ പോലീസിൽ പരാതി നൽകിയിരുന്നു. യുവതി ദേവിക്കു മുന്‍പില്‍ മാപ്പു പറയണമെന്നായിരുന്നു ഇരുന്നൂറോളം പേര്‍ പങ്കെടുത്ത ചടങ്ങില്‍ വെളിച്ചപ്പാടിന്റെ കല്‍പന. ഇതേ നാട്ടുകാരനായ യുവാവാണു വെളിച്ചപ്പാടായത്. കല്പനയെ തുടർന്ന് വീട്ടിലെത്തിയ യുവതി അന്ന് രാത്രി ആത്മഹത്യ ചെയ്യുകയായിരുന്നു. ഇയാള്‍ക്കെതിരെ ആത്മഹത്യാ പ്രേരണക്കുറ്റം ചുമത്തി കേസ് എടുക്കണമെന്ന് ആവശ്യപ്പെട്ടു ബന്ധുക്കൾ നൽകിയ പരാതിയിൻ മേലാണ് അറസ്റ്റ്. യുവാവിനെ ചോപദ്യം ചെയ്തു വരികയാണ്എന്നു അന്തിക്കാട് പോലീസ് അറിയിച്ചു

ശാസ്ത്ര സാഹിത്യ പരിഷത് പ്രവര്‍ത്തകര്‍ കഴിഞ്ഞ ദിവസം യുവതിയുടെ വീട് സന്ദര്‍ശിചിരുന്നു. വെളിച്ചപ്പാട് ആയ ശ്രീകാന്തിനെതിരെ നടപടി വേണമെന്ന് ആവശ്യപ്പെട്ടു ശക്തമായ ഇടപെടലായിരുന്നു ശാസ്ത്രസാഹിത്യ പരിഷത് നടത്തിയത്.

ഒരു മതവിശ്വാസത്തെ എത്ര വേഗമാണ് മറ്റൊരാളുടെ ജീവനെടുക്കുന്ന വിധത്തിലേക്ക് മാറ്റിത്തീർക്കാൻ സാധിക്കുന്നത് എന്നതിന്റെ വ്യക്തമായ ഉദാഹരണമാണ് ഈ സംഭവം. സമൂഹത്തെ കാർന്നു തിന്നുന്ന മറ്റൊരു മഹാരോഗമായി അന്ധവിശ്വാസം മാറാൻ തുടങ്ങിയിട്ടു നാളുകളായി. എത്രതന്നെ പുരോഗതി കൈവരിച്ചു എന്ന് നമ്മൾ അവകാശപ്പെട്ടാലും വിശ്വാസത്തിന്റെ പേരിൽ വ്യക്‌തികൾ ചൂഷണം ചെയ്യപ്പെടുന്നത് വർധിച്ചു വരികയാണ്. ഇപ്പോഴിതാ വിശ്വാസത്തെയും ആചാരങ്ങളെയും മറയാക്കി ഒരു ജീവിതം കൂടി നമ്മുടെ സമൂഹം കവർന്നെടുത്തിരിക്കുന്നു.