നിയമസഭയ്ക്ക് നാളെ മുതല്‍ നാലു ദിവസം അവധി. നാളത്തെ സഭാസമ്മേളനവും ഒഴിവാക്കി. എംഎല്‍എമാര്‍ക്ക് മണ്ഡലത്തില്‍ തുടര്‍ച്ചയായ നാലു ദിവസം ചെലവഴിക്കാന്‍ സമയം കിട്ടുമെന്നതിനാലാണ് വെള്ളിയാഴ്ചത്തെ സമ്മേളനം ഒഴിവാക്കിയത്. ആറ്റുകാല്‍ പൊങ്കാലയായതിനാല്‍ തിങ്കളാഴ്ച സഭയ്ക്ക് അവധിയാണ്. ബുധനാഴ്ച നടന്ന നിയമസഭയുടെ കാര്യോപദേശക സമിതി യോഗത്തിലാണു തീരുമാനം. മണ്ഡലത്തില്‍ ചെലവഴിക്കാം എന്നതിനാല്‍ വെള്ളിയാഴ്ച കൂടി അവധി അനുവദിക്കണമെന്ന് ഭരണ- പ്രതിപക്ഷ ഭേദമന്യേ എംഎല്‍എമാര്‍ ആവശ്യം ഉന്നയിച്ചിരുന്നു.

ധനകാര്യ ബില്‍ ഈ മാസം 17ന് അവതരിപ്പിക്കും. 26ന് ധനകാര്യ ബില്‍ പാസാക്കും. ബജറ്റിന്റെ നടപടിക്രമങ്ങള്‍ 30ന് പൂര്‍ത്തിയായ ശേഷം കാര്യോപദേശകസമിതി ചേര്‍ന്നാകും ഏതൊക്കെ ബില്ലുകള്‍ പരിഗണിക്കണമെന്ന് തീരുമാനിക്കുക.