എന്തൊരു അവസ്ഥയാണ് കെ.എസ്.ആര്‍.ടി.സിയ്ക്ക്. ഒരു സ്വകാര്യ ബസ് തങ്ങളുടെ യാത്രക്കാരെ തട്ടിയെടുക്കുന്നെന്നാരോപിച്ച് കെഎസ്ആര്‍ടിസി ജീവനക്കാര്‍ നഷ്ടപ്പെടുത്തിയത് ഒരു ദിവസത്തെ ലക്ഷങ്ങളുടെ കലക്ഷനാണ്. കെഎസ്ആര്‍ടിസി സര്‍വ്വീസ് നിര്‍ത്തിയതോടെ സ്വകാര്യ ബസുകള്‍ ഈ റൂട്ടുകള്‍ കൈയടക്കി. ഫലത്തില്‍ മിന്നല്‍ പണിമുടക്ക് സ്വകാര്യ ബസുകള്‍ക്ക് ചാകരയാകുന്നത്

അവശ്യ സര്‍വ്വീസുകളുടെ വിഭാഗത്തില്‍ പെടുന്ന കെഎസ്ആര്‍ടിസിയില്‍ മിന്നല്‍ പണിമുടക്ക് നിയമ വിരുദ്ധമാണ്. കുടുംബശ്രീക്ക് ടിക്കറ്റ് റിസര്‍വേഷന്‍ ചുമതല നല്‍കാനുള്ള നീക്കത്തിനെതിരെ 2018 ഒക്ടോബര്‍ 16 നാണ് ഏറ്റവും ഒടുവിലത്തെ മിന്നല്‍ പണിമുടക്ക് നടത്തിയത്. മൂന്നരമണിക്കൂര്‍ നടന്ന പണിമുടക്കില്‍ അന്ന് നഷ്ടമുണ്ടായത് 1.5 കോടി രൂപയാണ് . അതായത് കേവലം 1000 രൂപയ്ക്ക് വേണ്ടി 1.5 കോടിയാണ് നഷ്ടപ്പെടുത്തിയത്. സമരത്തില്‍ പങ്കെടുത്ത 200 ഓളം ജീവനക്കാരില്‍ നിന്ന് ഈ തുക ഈടാക്കാന്‍ മാനേജ്‌മെന്റ് അന്ന് നിര്‍ദ്ദേശിക്കുകയും ചെയ്തിരുന്നു.

മൂന്നരമണിക്കൂര്‍ നടന്ന സമരത്തില്‍ ഇത്ര നഷ്ടമുണ്ടായെങ്കില്‍ അഞ്ചര മണിക്കൂറിലേറെ നീണ്ട പണിമുടക്ക് വലിയ നഷ്ടമാണ് വരുത്തിയിട്ടുണ്ടാവുക. നിയമസഭ നടക്കുന്ന സമയമായതിനാല്‍ സംസ്ഥാനത്തെ മുഴുവന്‍ ഭരണ പ്രതിപക്ഷ എംഎല്‍എമാരും മന്ത്രിമാരും തലസ്ഥാനത്തു തന്നെയുണ്ടായിരുന്നു . സംസ്ഥാന ഭരണ സിരാകേന്ദ്രത്തിന് കിലോമീറ്റര്‍ അകലെ മാത്രം നടന്ന സംഭവത്തില്‍ കൃത്യമായി ഇടപെടാന്‍ കഴിയാത്തതില്‍ പ്രതിഷേധമുയര്‍ന്നു, സംഭവം നടന്ന് അഞ്ചു മണിക്കൂറിന് ശേഷമാണ് ഗതാഗതം നിയന്ത്രിക്കാനായതും പരിഹാരമുണ്ടായതും . ഒരു ജീവന്‍ നഷ്ടപ്പെട്ടതിനുശേഷമാണ് ഇടപെടലുണ്ടായത്.

അതേസമയം നഷ്ടത്തില്‍ നിന്നും കെ.എസ്.ആര്‍.ടി.സിയെ ലാഭത്തിലെത്തിച്ച് യൂണിയന്‍കാരെ നിലയ്ക്ക് നിര്‍ത്തിയ ടോമിന്‍ തച്ചന്‍കരിയെ വീണ്ടും വിളിക്കാന്‍ നീക്കം. നേരത്തെ തന്നെ തച്ചങ്കരിയെ വിളിക്കാനുള്ള ശ്രമം നടന്നിരുന്നു. എന്നാല്‍ യൂണിയന്‍കാര്‍ തടയിട്ടതോടെ അത് മങ്ങിയിരുന്നു. മിന്നല്‍ പണിമുടക്കിന്റെ പശ്ചാത്തലത്തില്‍ മുഖ്യമന്ത്രി തന്നെ നേരിട്ടിടപെട്ടിരിക്കുകയാണ്. അതോടെയാണ് തച്ചങ്കരിയുടെ റോള്‍ വീണ്ടും ഉയര്‍ന്ന് വന്നത്.

അതേസമയം കെഎസ്ആര്‍ടിസി സമരത്തിനിടയില്‍ ജീവന്‍ പൊലിഞ്ഞ കുമാരപുരം സ്വദേശി സുരേന്ദ്രന്റെ പോസ്റ്റുമോര്‍ട്ടം ഇന്ന് നടത്തും. തിരുവനന്തപുരം ജനറല്‍ ആശുപത്രി മോര്‍ച്ചറിയില്‍ സൂക്ഷിച്ചിരിക്കുന്ന മൃതദേഹം പോസ്റ്റുമോര്‍ടത്തിനുശേഷം സ്വദേശമായ കുമാരപുരത്ത് സംസ്‌കരിക്കും.

ജോലികഴിഞ്ഞെത്തുന്ന ഭര്‍ത്താവിനെ കാത്തിരുന്ന പ്രമീള കേട്ടത് ദുരന്തവാര്‍ത്ത. മൂന്നു തവണ ഹ!ൃദയാഘാതത്തെ അതിജീവിച്ച സുരേന്ദ്രനെ മരണം കവര്‍ന്നെന്ന് വിശ്വസിക്കാന്‍ പ്രമീളയ്ക്കാകുമായിരുന്നില്ല.

കുമാരപുരം ചെന്നിലോട് സ്വദേശിയായ സുരേന്ദ്രന്‍ നാലു വര്‍ഷമായി ഇറയന്‍കോട് എല്‍.പി. സ്‌കൂളിനു സമീപത്തെ വീട്ടിലായിരുന്നു താമസം. ബെവ്‌റേജസ് ഔട്ട്ലെറ്റുകളില്‍ ലോഡ് എത്തിക്കുന്ന വാഹനത്തിന്റെ െ്രെഡവറായിരുന്നു സുരേന്ദ്രന്‍. കഴിഞ്ഞ പത്ത് വര്‍ഷമായി ഹൃദയസംബന്ധമായ രോഗത്തെ തുടര്‍ന്ന് ചികില്‍സയിലായിരുന്നു. രണ്ടുവര്‍ഷം മുമ്പ് ഉണ്ടായ ഹൃദയാഘാതത്തെ തുടര്‍ന്ന് ജോലിക്ക് പോയിരുന്നില്ല.

ഒരുമാസം മുമ്പ് വീണ്ടും ജോലിയില്‍ പ്രവേശിച്ച സുരേന്ദ്രന്‍ ജോലികഴിഞ്ഞ് ചൊവ്വാഴ്ച്ച വളരെ വൈകിയെത്തിയതിനാല്‍ വീട്ടിലേക്ക് പോയില്ല. ഇന്നലെ രാവിലെ വീട്ടിലേക്കുള്ള പോകാനിറങ്ങിയ യാത്ര അന്ത്യയാത്രയുമായി. തിരുവനന്തപുരം ജനറല്‍ ആശുപത്രിയില്‍ സൂക്ഷിച്ചിരിക്കുന്ന മൃതദേഹം ഇന്ന് പോസ്റ്റുമോര്‍ട്ടത്തിനുശേഷം ബന്ധുക്കള്‍ക്ക് വിട്ടുകൊടുക്കും.