നന്ദനത്തിലെ പൊന്നു, വീട്ടുകാർക്ക് അവൾ ദേവനന്ദ എന്ന ദേവതയായിരുന്നു. അച്ഛൻ പ്രതീപ് കുമാർ ചുമരിലേക്ക് നോക്കി വിതുമ്പുകയാണ്. ദേവനന്ദ എന്ന കൊച്ചു പൈതൽ പ്രായത്തിന്റെ കുസൃതിയിൽ ചുമരിലൊക്കെ എന്തോ കുത്തികുറിച്ചിരിക്കുകയാണ്. വെറുതെ ഒരു കുത്തികുറിക്കൽ മാത്രമല്ല ആ ചുമരുകളിൽ. വരകൾക്കപ്പുറം അഗാതമായതെന്തോ ആ ചുമരിൽ കോറിയിട്ടിരിക്കുന്നു.

പ്രായത്തിനും ചിന്തകൾക്കും അപ്പുറം ഭാവനയുടെ ഒരു ലോകം. ദേവനന്ദ എന്ന മാലാഖ പറയാൻ കൊതിച്ചത് എന്തെല്ലാമാണോ അതെല്ലാം ആ ചുമരുകളിൽ ഉണ്ട്. ചുമരിൽ കോറിയിട്ടിരിക്കുന്ന ഓരോ വരയും അതിശയിപ്പിക്കുന്നതാണ്. അവളിൽ അസാധാരണമായോ എന്തോ ഒന്ന് ഉണ്ടെന്നുറപ്പിക്കുന്നതുതന്നെയാണ് അവളുമായി ചുറ്റപ്പെട്ട ഓരോ കാര്യങ്ങളും. അതുതന്നെയാണ് ദേവാനന്ദയുടെ ടീച്ചർമാരും അയൽക്കാരുമൊക്കെ പറയുന്നതും.

ഒരുപാട് സംസാരിക്കുന്ന പ്രകൃതക്കാരി. പ്രായത്തിനപ്പുറം ഒരുപാട് കാര്യങ്ങൾ ശ്രദ്ധിക്കുന്ന കുട്ടി, ശ്രദ്ധയോടെ ഓരോ കാര്യങ്ങളും അവൾ നിരീക്ഷിക്കുമായിരുന്നു. നന്ദനത്തിലെ കിലുക്കാംപെട്ടിയെ പറ്റി അച്ഛനും അമ്മയ്ക്കും ഓർത്തെടുക്കാൻ ഒരുപാടുണ്ട്. എപ്പോളും കിലുക്കാംപെട്ടിപോലെ സംസാരിച്ചുകൊണ്ടിരിക്കുന്ന ഒരുകുട്ടി. അതുകൊണ്ടുതന്നെ വീട്ടുകാർക്കും അയൽക്കാർക്കും കൂട്ടുകാർക്കുമൊക്കെ ദേവാനന്ദയെ ഒരുപാട് ഇഷ്ടമായിരുന്നു. ഇപ്പോൾ കേരളം അവളെ നെഞ്ചിലേറ്റുന്നതിനും അസാധാരണമായ എന്തോ ആ കുട്ടിയിൽ ഉള്ളതുകൊണ്ടാകാം. ദേവനന്ദയെ കാണാതാകുന്നതും, ഒരു അമ്മുമ്മയുടെ ഇടപെടലും, പട്ടിയുടെ കുരയും, വിരണ്ടു വിറച്ച ദേവാനന്ദയുടെ ഓട്ടവും എല്ലാം ഈ കുട്ടിയിലുള്ള അസാധാരണത്വം വർധിപ്പിക്കുന്നു.

സംഭവത്തെ പറ്റി വീട്ടുകാർ പറയുന്നത് ഈ സംഭവങ്ങളോക്കെ ഒറ്റപ്പെട്ട ഒന്നാണെന്നാണ്. ദേവനന്ദക്ക് ദേവദത്തൻ എന്ന അനിയനെ ലഭിച്ചപ്പോൾ താൻ ഒറ്റപെട്ടു എന്ന ഒരു ചിന്ത ഉണ്ടായോ എന്ന് ആൾക്കാർക്ക് ഒരു സംശയം ഉണ്ട്. എന്നാൽ മറ്റുള്ളവരുടെ സംശയങ്ങൾക്കൊന്നും ഒരു അടിസ്ഥാനവും ഇല്ല. ദേവദത്തൻ എന്ന പൊന്നനിയനെ അവൾക്ക് അത്രത്തോളം പ്രിയമായിരുന്നു. കാണാതാകുന്നതിനു അന്നു രാവിലെപ്പോലും ദേവനന്ദ അനിയന്റെ അടുക്കലേക്ക് എത്തി കെട്ടിപിടിച്ച് ഒരുപാട് നേരം കിടന്നു. പൊന്നനിയനോട് അത്രക്ക് കരുതലായിരുന്നു ഈ മാലാഖകുട്ടിക്. ദേവൂട്ടിയുടെ കളിചിരി മാറിയെങ്കിലും നന്ദനത്തിലെ ചുവരുകൾക്ക് ഇപ്പോഴും എന്തൊക്കെയോ പറയാനുണ്ട്.

വീടിനു പുറത്തേക്ക് പോകുമ്പോൾ ദേവനന്ദ മുടിചീകി വസ്ത്രമണിഞ്ഞ് ചെരുപ്പൊക്കെ ഇട്ടുമാത്രമേ ഇറങ്ങുകയുള്ളു എന്നാണ് മാതാപിതാക്കൾ പറയുന്നത്. ഈ കാരണം തന്നെയാണ് മരണത്തിലെ ദുരൂഹതക്ക് ആക്കം കൂട്ടുന്നതും. സ്‌കൂളിൽ ടീച്ചറുമാരുടെ കണ്ണിലുണ്ണി. ഒരുപാട് സംസാരിക്കുന്ന കുട്ടി. പലപ്പോഴും ക്ലാസ് തുടങ്ങുന്നതിനു മുൻപ് ടീച്ചർമാരുടെ അടുക്കലെത്തി തലേ ദിവസത്തെ വിശേഷങ്ങളെല്ലാം പങ്കുവെക്കും. ഈ കുട്ടിയുടെ മനസ്സിൽ എന്തെങ്കിലും അരുതായ്മകലോ വിഷമമോ ഉണ്ടായിരുന്നുവെങ്കിൽ അതൊക്കെ തീർച്ചയായും അവൾ ടീച്ചര്മാരോട് പങ്കുവക്കുമായിരുന്നു എന്നുതന്നെയാണ് എല്ലാവരും വിശ്വാസിക്കുന്നതും .

പോസ്റ്റുമാർട്ടം റിപ്പോർട്ടിന്റെ അടിസ്ഥാനത്തിലെ പ്രാഥമിക നിഗമനങ്ങളുടെ അടിസ്ഥാനത്തിൽ ഇതൊരു മുങ്ങിമരണമാണ് എന്നുപറയുമ്പോൾ ദേവൂട്ടിയെ അടുത്തറിഞ്ഞവർക്ക് അതിൽ ദുരൂഹത ഉറപ്പാണ്. ദേവൂട്ടി സാധാരണ ഈ പ്രായത്തിലെ കുട്ടികളിൽ നിന്നും വ്യത്യസ്തമായി ചിന്തിക്കുകയും പ്രവർത്തിക്കുകയുമൊക്കെ ചെയ്യുമായിരുന്നു. സ്‌കൂളിൽ നിറത്തിലും മറ്റു പാഠ്യേതര കലാ വിഷയങ്ങളിലും ഏറ്റവും മികച്ച കുട്ടി. അതുകൊണ്ടുതന്നെ സഹപാഠികളും ഏറെ അസൂയയോടെ നോക്കികണ്ടിരുന്നു ഈ മാലാഖയെ.

ഗൾഫിലായിരുന്ന അച്ഛന്റെ സാമീപ്യം ആ കുഞ്ഞ് എപ്പോളും ആഗ്രഹിച്ചിരുന്നു. എല്ലാ ദിവസവും രാവിലെ അച്ഛൻ പ്രതീപ് കുമാർ ദേവാനന്ദയെ വിളിക്കുമായിരുന്നു. ഒരുപാടുനേരം അവർ പരസ്പരം സംസാരിക്കുകയും വിശേഷങ്ങൾ പങ്കുവെക്കുകയും ചെയ്യുമായിരുന്നു.

ദേവാനന്ദയുടെ കഥ മനഃശാസ്ത്രപരമായും സാമൂഹിക ചുറ്റുപാടുകളുടെ അടിസ്ഥാനത്തിലും വിലയിരുത്തപ്പെടേണ്ട ഒന്നാണ്. ഇതിൽ മുത്തശ്ശിക്കഥകളും പ്രവാസ ജീവിതവും ഗ്രാമത്തിലെ അസ്വാഭാവികതാഴുമെല്ലാം ഇടച്ചെന്നിരിക്കുന്നു. ഈ കുട്ടിയുടെ മാനസിക ചിന്തകളോ മാനസിക വ്യാപാരങ്ങളോ മാത്രമല്ല അതിനും അപ്പുറം ഒരുപാട് തലങ്ങളുണ്ട് ദേവാനന്ദയുടെ മരണത്തിലെ ഈ ദുരൂഹതക്ക്. കൃത്യമായ അപഗ്രഥനവും പഠനവും വിശദമായ പരിശോധനയും ഈ സംഭവത്തിൽ വേണം.

ദേവനന്ദ നമ്മുടെ കുഞ്ഞുങ്ങളുടെ ഒരു പ്രതീകമാണ്. കരുതലിന്റെ ഒരു പ്രതീകമാണ്. പ്രവാസ ജീവിതത്തിന്റെ ഒരു പ്രതീകമാണ്. നമ്മുടെ ഗ്രാമങ്ങളിലെ വിശ്വാസത്തിന്റെയും സംബ്രദായങ്ങളുടെയും ഒരു പ്രതീകമാണ്. ലോകത്തെവിടെയുമുള്ള മലയാളികൾ നെഞ്ചേറ്റിയ മാലാഖയാണ് ദേവനന്ദ. അതുകൊണ്ടുതന്നെ ഈ കേസിൽ കൃത്യമായ അന്വേഷണവും പഠനവും ഉണ്ടാകണം. അതുകൊണ്ടുതന്നെ ദേവനന്ദ എന്ന മാലാഖയിൽ അസാധാരണമായ എന്തോ ഒന്ന് ഉണ്ടെന്ന് തറപ്പിച്ചു തന്നെ പറയാനാകും .