കൊവിഡ് കാലത്ത് കേരളത്തിൽ കഴിയുന്ന ബന്ധുക്കലെ ഓര്‍ത്ത് പ്രവാസികൾ ആശങ്കപ്പെടേണ്ടന്ന് മുഖ്യമന്ത്രി പിണറായി വിജയൻ.രാജ്യത്തിന് പുറത്തും മറ്റ് സംസ്ഥാനങ്ങളിലുമുള്ള മലയാളികൾ പരിഭ്രാന്തിയിലാണ്. അവരാരും നാട്ടിലെ ബന്ധുമിത്രാദികളെ കുറിച്ചോർത്ത് ആശങ്കപ്പെടേണ്ടതായില്ല . അവര്‍ക്ക് വേണ്ടതൊക്കെ സംസ്ഥാന സര്‍ക്കാര്‍ ഉറപ്പാക്കുന്നുണ്ടെന്ന് മുഖ്യമന്ത്രി പറഞ്ഞു.

അതത് രാജ്യങ്ങളും സംസ്ഥാനങ്ങളും നൽകുന്ന നിർദ്ദേശം അനുസരിച്ച് കൊവിഡിനെ പ്രതിരോധിക്കാൻ എല്ലാവരും ശ്രദ്ധിക്കണം. മുൻകരുതൽ സ്വീകരിക്കാൻ മറക്കരുത്. മനസ് കൊണ്ട് ഞങ്ങളെല്ലാം നിങ്ങളോടൊപ്പം ഉണ്ടെന്നും പിണറായി വിജയൻ കൂട്ടിച്ചേർത്തു.

മറ്റ് സംസ്ഥാനങ്ങളിൽ ഉള്ളവരും പ്രവാസികളും ഇങ്ങോട്ട് വരണം എന്നാഗ്രഹമുണ്ടെങ്കിലും ഇപ്പോൾ അതിന് നിവൃത്തിയില്ല. എവിടെ നിൽക്കുന്നുവോ അവിടെ തന്നെ തുടരാനാണ് പ്രധാനമന്ത്രി നരേന്ദ്രമോദിയും പറയുന്നതെന്ന് മുഖ്യമന്ത്രി ഓര്‍മ്മിപ്പിച്ചു.

വാടകയ്ക്ക് താമസിക്കുന്ന ഇടത്ത് നിന്ന് അതിഥി തൊഴിലാളികളെ ഇറക്കിവിടുന്ന പ്രവണത ശ്രദ്ധയിൽപ്പെട്ടു. അതൊരിക്കലും അനുവദിക്കില്ല. അവർക്ക് വേണ്ട ഭക്ഷണവും മറ്റ് സേവനങ്ങളും ഉറപ്പാക്കാൻ അടിയന്തിര ഇടപെടൽ നടത്താൻ ജില്ലാ കളക്ടർമാർക്ക് നിർദ്ദേശം നൽകി. ജനങ്ങൾ അനാവശ്യ സഞ്ചാരം, കറങ്ങി നടത്തം എല്ലാം ഒഴിവാക്കണമെന്നും പിണറായി വിജയൻ അഭ്യര്‍ത്ഥിച്ചു.