കൊറോണ വൈറസ് വ്യാപനത്തിനെതിരായ പോരാട്ടത്തിന് കരുത്തുപകര്‍ന്ന് സാമ്ബത്തിക സഹായവുമായി മാസ്റ്റര്‍ ബ്ലാസ്റ്റര്‍ സച്ചിന്‍ തെന്‍ഡുല്‍ക്കര്‍. 50 ലക്ഷം രൂപയാണ് സച്ചിന്‍ സംഭാവന നല്‍കിയത്.

ഇന്ത്യയിലെ കായിക താരങ്ങളില്‍ കൊറോണ വൈറസിനെതിരായ പോരാട്ടത്തിന് നല്‍കുന്ന ഉയര്‍ന്ന സംഭാവനയാണ് സച്ചിന്റേത്. ആകെ നല്‍കുന്ന 50 ലക്ഷത്തില്‍ 25 ലക്ഷം രൂപവീതം പ്രധാനമന്ത്രിയുടെയും മഹാരാഷ്ട്ര മുഖ്യമന്ത്രിയുടെയും ദുരിതാശ്വാസനിധികളിലേക്കു നല്‍കും. 'കൊറോണ വൈറസിനെതിരായ പോരാട്ടത്തിന് കരുത്തുപകരാന്‍ പ്രധാനമന്ത്രിയുടെയും മുഖ്യമന്ത്രിയുടെയും ദുരിതാശ്വാസനിധികളിലേക്ക് 25 ലക്ഷം രൂപ വീതം സംഭാവന നല്‍കാന്‍ സച്ചിന്‍ തെന്‍ഡുല്‍ക്കര്‍ തീരുമാനിച്ചിരിക്കുന്നു.

ഇരുവരുടെയും ദുരിതാശ്വാസ നിധികളിലേക്ക് സംഭാവന നല്‍കണമെന്നത് സച്ചിന്റെ സ്വന്തം തീരുമാനാണ്' ഇതേക്കുറിച്ച്‌ അറിയാവുന്ന ഒരാള്‍ വാര്‍ത്താ ഏജന്‍സിയായ പിടിഐയോടു പറഞ്ഞു. കൊറോണ വൈറസ് ബാധയ്‌ക്കെതിരായ പോരാട്ടത്തില്‍ സഹായവുമായി രംഗത്തെത്തുന്ന ആദ്യ ഇന്ത്യന്‍ താരമല്ല സച്ചിന്‍. ബംഗാളിന്റെ വിവിധ ഭാഗങ്ങളില്‍ ദുരിതമനുഭവിക്കുന്നവരെ സഹായിക്കാന്‍ 50 ലക്ഷം രൂപയുടെ അരി വിതരണം ചെയ്യുമെന്ന് മുന്‍ താരവും ബിസിസിഐ പ്രസിഡന്റുമായ സൗരവ് ഗാംഗുലി അറിയിച്ചിരുന്നു. മുന്‍ താരങ്ങളും സഹോദരങ്ങളുമായ ഇര്‍ഫാന്‍ പഠാന്‍, യൂസഫ് പഠാന്‍ എന്നിവര്‍ 4000 മാസ്‌കുകള്‍ ബറോഡ പൊലീസുമായും ആരോഗ്യ പ്രവര്‍ത്തകരുമായും സഹകരിച്ച്‌ വിതരണം ചെയ്തിരുന്നു. പുണെ ആസ്ഥാനമായുള്ള ഒരു എന്‍ജിഒ വഴി ക്രൗഡ് ഫണ്ടിങ്ങിലേക്ക് മുന്‍ നായകന്‍ മഹേന്ദ്രസിങ് ധോണി ഒരു ലക്ഷം രൂപയാണ് നല്‍കിയത്. ഇതുകൂടാതെ, ഗുസ്തി താരമായ ബജ്രംഗ് പൂനിയ, സ്പ്രിന്റര്‍ ഹിമ ദാസ് എന്നിവര്‍ തങ്ങളുടെ ഒരുമാസത്തെ ശമ്ബളം കൊറോണ പ്രതിരോധ പ്രവര്‍ത്തനങ്ങള്‍ക്ക് നല്‍കുമെന്ന് അറിയിച്ചു കഴിഞ്ഞു.