കൊച്ചിയില്‍ നിന്ന് സ്വദേശമായ തെങ്കാശിയിലേക്ക് നടന്നു പോകാനിറങ്ങിയവര്‍ മൂവാറ്റുപുഴയില് കുഴഞ്ഞുവീണു
കൊച്ചിയിലെ ഫര്‍ണിച്ചര്‍ കടയിലെ ജീവനക്കാരെ തൊഴിലുടമ ഒഴിപ്പിച്ചതോടെ സ്വദേശമായ തമിഴ്‌നാട്ടിലെ തെങ്കാശി വരെ നടന്നു പോകാന്‍ തീരുമാനിച്ചു അഞ്ചംഗ സംഘം.
എന്നാല്‍ അവരില്‍ രണ്ടുപേര്‍ മൂവാറ്റുപുഴയിലെത്തിയപ്പോഴേക്കും അവശരായി തളര്‍ന്നു വീണു.
ലോക്ഡൗണിനെത്തുടര്‍ന്നു ബുധനാഴ്ച കടയടച്ചു പൂട്ടിയ ഉടമ ,1000 രൂപ വീതം ഓരോരുത്തര്‍ക്കും നല്‍കിയ ശേഷം വൈകിട്ട് യുവാക്കളോട് നാട്ടിലേക്ക് മടങ്ങാന്‍ നിര്‍ദേശിക്കുകയായിരുന്നു. ഫര്‍ണിച്ചര്‍ കടയില്‍ തന്നെയായിരുന്നു ഇവരുടെ താമസം.
2 ദിവസമായി കാര്യമായി ഭക്ഷണമൊന്നും കിട്ടാതിരുന്ന ഇവരെ കടയില്‍ നിന്നൊഴിവാക്കിയതോടെ നാട്ടിലേക്കു മടങ്ങുകയല്ലാതെ മാര്‍ഗമില്ലായിരുന്നു.
വാഹനങ്ങളൊന്നുമില്ലാത്തതിനാല്‍ എറണാകുളത്തു നിന്ന് ഇവര്‍ നടക്കാനാരംഭിച്ചു. പച്ചക്കറി കയറ്റാന്‍ തമിഴ്‌നാട്ടിലേക്ക് പോകുന്ന ലോറിയോ മറ്റോ കിട്ടിയാല്‍ അതില്‍ പോകാമെന്ന പ്രതീക്ഷയിലാണ് ഇവര്‍ നടപ്പാരംഭിച്ചത്.
രാത്രി 12-ന് മൂവാറ്റുപുഴയിലെത്തിയെങ്കിലും ഭക്ഷണവും വെള്ളവും കിട്ടാതെ അവശരായി 2 പേര്‍ കുഴഞ്ഞു വീണു. സംഭവമറിഞ്ഞെത്തിയ നാട്ടുകാര്‍ ഇവര്‍ക്ക് ഭക്ഷണവും വെള്ളവും നല്‍കി. ഇവിടെയുള്ള ഇതര സംസ്ഥാന ക്യാംപില്‍ പ്രവേശിപ്പിച്ചു.
https://www.facebook.com/Malayalivartha
