മൊട്ടുസൂചി വാങ്ങാന്‍ കാറുമായി ഇറങ്ങിയ ആള്‍ അടൂരില്‍ പിടിയിലായി, വാഹനം പൊലീസ് കസ്റ്റഡിയിലും
ആവശ്യമില്ലാതെ നിരത്തിലിറങ്ങരുതെന്ന് ആവര്‍ത്തിച്ചിട്ട് പറഞ്ഞിട്ടും മൊട്ടുസൂചി വാങ്ങാന്‍ കാറുമായി ഇറങ്ങിയ ആള്‍ വെള്ളിയാഴ്ച രാവിലെ അടൂരില്‍ പിടിയിലായി. കെഎസ്ആര്‍ടിസി ജംക്ഷനില്‍ പൊലീസ് പരിശോധനയ്ക്കിടയിലാണു പിടിലായത്. എവിടെ പോകാന്‍ ഇറങ്ങിയതാണെന്ന് പൊലീസ് ചോദിച്ചപ്പോഴാണ് വീട്ടിലെ ചില അത്യാവശ്യങ്ങള്‍ക്ക് മൊട്ടുസൂചി ആവശ്യമുണ്ടെന്നും അതു വാങ്ങാന്‍ ഇറങ്ങിയതാണെന്നു പറഞ്ഞത്. തുടര്‍ന്ന് ഇയാള്‍ക്കെതിരെ കേസെടുത്തു. വാഹനം കസ്റ്റഡിയില്‍ എടുത്തു.
ജില്ലയില്‍ അതിര്‍ത്തി പങ്കിടുന്ന 15 ഇടങ്ങളിലും മോട്ടര്‍ വാഹന വകുപ്പിന്റെ സഹകരണത്തോടെ വാഹന പരിശോധന ശക്തമാക്കി. യാത്ര അനാവശ്യമെന്നു കണ്ടാല്‍ വാഹനം കസ്റ്റഡിയില്‍ എടുത്തു പൊലീസിനു കൈ മാറും. ഒപ്പം റജിസ്‌ട്രേഷന്‍ റദ്ദാക്കുന്നതു ഉള്‍പ്പെടെയുളള നടപടി സ്വീകരിക്കുമെന്ന് അധികൃതര്‍ പറഞ്ഞു. പന്തളത്തിന് പുറമേ പന്തളം തെക്കേക്കര, തുമ്പമണ്‍, കുളനട എന്നീ പഞ്ചായത്തുകളിലും വാഹന പരിശോധന കര്‍ശനമാക്കിയിട്ടുണ്ട്.
ആശുപത്രികളുടെ കേന്ദ്രമായ പന്തളത്ത് രോഗികളെയും കൊണ്ടു പോകുന്നവരും മരുന്നുകള്‍ വാങ്ങാന്‍ വേണ്ടി ഇറങ്ങുന്നവരുമാണ് അധികം പേരും. റോഡിലെ വാഹനയാത്രക്കാരുടെ എണ്ണത്തില്‍ കുറവ് ഉണ്ടെങ്കിലും മതിയായ ആവശ്യമില്ലാതെ റോഡിലിറങ്ങിയ 50 പേര്‍ക്കെതിരെ കേസ് എടുത്തതായി പൊലീസ് പറഞ്ഞു. പന്തളം ജംക്ഷനിലെ ഗതാഗതം നിയന്ത്രിക്കുന്നതിനു വേണ്ടി പൊലീസ് എംസി റോഡില്‍ വലിയ ബാരിക്കേഡുകള്‍ സ്ഥാപിച്ചു. മെഡിക്കല്‍ സ്റ്റോറുകള്‍ തുറന്നു പ്രവര്‍ത്തിക്കുന്നുണ്ടെങ്കിലും പ്രമേഹ രോഗത്തിനുള്ള മരുന്നിനു ക്ഷാമം അനുഭവപ്പെടുന്നതായി കടയുടമകള്‍ പറഞ്ഞു.
എന്നാല്‍ ഇരുചക്ര വാഹനങ്ങളില്‍ റോന്തുചുറ്റുന്നവരുടെ എണ്ണത്തില്‍ കുറവുണ്ടായില്ല. വടശേരിക്കര ടൗണിലും ഇന്നലെ രാവിലെ നിയന്ത്രണങ്ങളില്ലാതെ വാഹനങ്ങള്‍ ഓടി.ഇതോടെ പൊലീസ് കര്‍ശനമായി രംഗത്തിറങ്ങി. ഇട്ടിയപ്പാറ, മാമുക്ക്, ബ്ലോക്കുപടി, മന്ദമരുതി, പ്ലാച്ചേരി, വടശേരിക്കര, മഠത്തുംമൂഴി, അത്തിക്കയം എന്നിവിടങ്ങളില്‍ വാഹനങ്ങള്‍ തടഞ്ഞു നിര്‍ത്തി പൊലീസ് പരിശോധന നടത്തി.
വെച്ചൂച്ചിറ പൊലീസ് സ്റ്റേഷന്‍ പരിധിയില്‍ ഇന്നലെയും ലോക്കഡൗണ്‍ നിയമലംഘനം തുടര്‍ന്നു.10 വാഹന ഉടമകള്‍ക്കെതിരെ കേസെടുത്തു. ബൈക്കുകളും ഓട്ടോയുമാണ് പിടികൂടിയത്. ഇരുചക്ര വാഹനക്കാര്‍ മിക്ക സമയങ്ങളിലും പഞ്ചായത്ത് പ്രദേശത്തു കൂടി പായുന്നുണ്ട്. പൊലീസ് പല ഭാഗങ്ങളിലായി പെട്രോളിങ് നടത്തി നിയമലംഘകരെ കയ്യോടെ പിടികൂടുന്നുണ്ട്. പഞ്ചായത്ത് പ്രദേശത്ത് തുറന്നു പ്രവര്‍ത്തിക്കുന്ന വ്യാപാര സ്ഥാപനങ്ങളിലും തിരക്ക് കുറഞ്ഞു.
ജില്ലാ അതിര്‍ത്തിയായ ഏനാത്തു പാലത്തിനു സമീപം സ്‌ക്വാഡിന്റെ നേതൃത്വത്തില്‍ പരിശോധന ശക്തമാണ്. ഇവിടെ തങ്ങുന്ന ഇതര സംസ്ഥാന തൊഴിലാളികളില്‍ തമിഴ്‌നാട് സ്വദേശികള്‍ ഇരു ചക്ര വാഹനങ്ങളിലും ചരക്കു ലോറികളിലും കയറി സംസ്ഥാനം വിടാന്‍ ശ്രമം നടത്തുന്നുണ്ട്. ഇവരെ ജില്ലാ അതിര്‍ത്തിയില്‍ തടഞ്ഞ് തിരിച്ചു വിടുകയും ഇതുവരെ തങ്ങിയ സ്ഥലത്തെ പൊലീസ് സ്റ്റേഷനില്‍ അറിയിച്ച് സഹായം തേടാനും ഉപദേശിക്കുകയാണ്. ഏനാത്ത് ജംക്ഷനിലെ വാടക കെട്ടിടത്തില്‍ ഭക്ഷണമില്ലാതെ പ്രയാസത്തിലായ ഇതര സംസ്ഥാന തൊഴിലാളികള്‍ക്ക് ഭക്ഷണം എത്തിച്ചു നല്‍കാന്‍ അധികൃതര്‍ നടപടി തുടങ്ങി.
അടൂരില്‍ ജനങ്ങള്‍ വീട്ടിലിരിക്കാന്‍ പഠിച്ചു തുടങ്ങിയതോടെ അടൂരില്‍ പൊലീസിനു തലവേദന കുറഞ്ഞു തുടങ്ങി. എങ്കിലും ചിലര്‍ ഒരാവശ്യവുമില്ലാതെ ഇരുചക്രവാഹനവും കാറുമായി നിരത്തിലിറങ്ങുന്നതായി പൊലീസ് പറഞ്ഞു. ഇന്നലെ ഉച്ചവരെ ഇത്തരത്തിലുള്ള 16 വാഹനങ്ങള്‍ പൊലീസ് കസ്റ്റഡിയില്‍ എടുത്തു. വാഹനങ്ങളെ നിയന്ത്രിക്കാന്‍ കെഎസ്ആര്‍ടിസി ജംക്ഷനിലും നെല്ലിമൂട്ടില്‍പ്പടിയിലും പൊലീസ് ബാരിക്കേഡ് വച്ചു.
https://www.facebook.com/Malayalivartha
