സമൂഹവ്യാപനം ഉണ്ടായിട്ടുണ്ടോ എന്ന് പരിശോധിക്കാന് റാപ്പിഡ് ടെസ്റ്റ്; സംസ്ഥാനത്ത് ആറ് പേര്ക്ക് കൂടി കൊറോണ സ്ഥിരീകരിച്ചു
സംസ്ഥാനത്ത് ശനിയാഴ്ച ആറ് പേര്ക്ക് കൂടി കൊറോണ സ്ഥിരീകരിച്ചു. തിരുവനന്തപുരം ജില്ലയില് രണ്ടുപേര്ക്കും കൊല്ലം, പാലക്കാട്, മലപ്പുറം, കാസര്കോട് എന്നീ ജില്ലകളില് ഓരോരുത്തര്ക്കുമാണ് രോഗം സ്ഥിരീകരിച്ചത്. മുഖ്യമന്ത്രി പിണറായി വിജയനാണ് തിരുവനന്തപുരത്ത് വാര്ത്താസമ്മേളനത്തില് ഇക്കാര്യം വ്യക്തമാക്കിയത്.
കോവിഡ് രോഗബാധയെ തുടര്ന്ന് സമൂഹവ്യാപനം ഉണ്ടായിട്ടുണ്ടോ എന്ന് പരിശോധിക്കാന് റാപ്പിഡ് ടെസ്റ്റ് നടത്തുമെന്ന് മുഖ്യമന്ത്രി പിണറായി വിജയന് വ്യക്തമാക്കി. സംസ്ഥാനത്ത് വ്യാപകമായ രീതിയിലാവും റാപ്പിഡ് ടെസ്റ്റുകള് നടത്തുക. ഉടന് റിസല്ട്ട് വരുമെന്നതുകൊണ്ടാണ് റാപ്പിഡ് ടെസ്റ്റ് നടത്തുന്നതെന്ന് മുഖ്യമന്ത്രി വാര്ത്താസമ്മേളനത്തില് പറഞ്ഞു.
കേരളത്തിലെ ആദ്യ കോവിഡ് മരണത്തില് മുഖ്യമന്ത്രി ദുഃഖം രേഖപ്പെടുത്തി. കോവിഡ് പശ്ചാത്തലത്തില് സംസ്ഥാനത്തെ എന്ട്രന്സ് പരീക്ഷ മാറ്റിവച്ചതായി മുഖ്യമന്ത്രി പറഞ്ഞു. കോട്ടയത്ത് രണ്ടുപേര്ക്കും തിരുവനന്തപുരം, എറണാകുളം ജില്ലകളില് ഓരോരുത്തര്ക്കും രോഗം ഭേദമായി. നിലവില് ആകെ ചികില്സയിലുള്ളവരുടെ എണ്ണം 165 ആണ്. ആകെ 1,34,370 പേര് നിരീക്ഷണത്തിലുണ്ട്. ഇതില് 1,33,750പേര് വീടുകളിലും 620 പേര് ആശുപത്രികളിലുമാണ് നിരീക്ഷണത്തിലുള്ളത്. 148 പേരെ ഇന്ന് ആശുപത്രിയില് പ്രവേശിപ്പിച്ചു. 6067 സാംപിള് പരിശോധനയ്ക്ക് അയച്ചു. ഇതില് 5276 ഫലങ്ങള് നെഗറ്റീവാണ്.
https://www.facebook.com/Malayalivartha