ഹോട്ടലില്‍ വ്യാജ വാറ്റ് നടത്തിയ മൂന്നു പേര്‍ എക്‌സൈസ് സംഘത്തിന്റെ പിടിയില്‍
കോഴിക്കോട് ബാലുശ്ശേരിയിലെ ഒരു ഹോട്ടല്‍ മുറിയില്‍ വ്യാജ വാറ്റ് നടത്തിയ സംഘം എക്‌സൈസ് സംഘത്തിന്റെ പിടിയിലായി.
ബാലുശ്ശേരി മുക്കില്‍ ഗവ.ആശുപത്രിക്കു മുന്‍വശമുള്ള ഹോട്ടലിന്റെ മുറിയില്‍ വച്ചായിരുന്നു ചാരായ നിര്‍മാണം.
ഇതേ ഹോട്ടലിലെ ജീവനക്കാരനായ ഇടുക്കി രാജാക്കാട് കണ്ടത്തില്‍ പറമ്പില്‍ വിപിന്‍ കുമാര്‍ (30), കിനാലൂര്‍ കാവുംപുറത്ത് അശ്വന്ത് മിഥുന്‍ (29), വടക്കേടത്ത് വീട്ടില്‍ റിജേഷ് (36) എന്നിവരാണ് കോഴിക്കോട് എക്‌സൈസ് ഇന്റലിജന്‍സും താമരശ്ശേരി റേഞ്ച് സംഘവും സംയുക്തമായി നടത്തിയ പരിശോധനയില്‍ പിടിയിലായത്.
8 ലീറ്റര്‍ ചാരായവും വാഷും വാറ്റുപകരണങ്ങളും മുറിയില്‍ നിന്നു പിടികൂടി. ഗ്യാസ് അടുപ്പും കുക്കറും ഉപയോഗിച്ച് ശുചിമുറിക്കുള്ളിലായിരുന്നു ചാരായ നിര്‍മാണം.
ഇന്റലിജന്‍സ് പ്രിവന്റീവ് ഓഫിസര്‍ യു.പി.മനോജിനു ലഭിച്ച രഹസ്യ വിവരത്തെത്തുടര്‍ന്ന് കഴിഞ്ഞ രാത്രിയിലായിരുന്നു പരിശോധന. പരിശോധനയില്‍ പ്രിവന്റീവ് ഓഫിസര്‍മാരായ പി.കെ.അനില്‍ കുമാര്‍, ചന്ദ്രന്‍ കുഴിച്ചാലില്‍, എന്‍.രാജു, സിവില്‍ ഓഫിസര്‍മാരായ ശ്യാംപ്രസാദ്, ദീപേഷ് എന്നിവര്‍ പങ്കെടുത്തു. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.
https://www.facebook.com/Malayalivartha
