പണത്തിന്റെയും അധികാരത്തിന്റെയും സ്വാധീനത്തില്‍ എന്തു നിയമലംഘനവും നടത്താം എന്ന ചിലരുടെ മനോഭാവത്തിനെതിരെയാണ് ഇപ്പോള്‍ കേരളം ഒന്നടങ്കം ശബ്ദമുയര്‍ത്തിയിരിക്കുന്നത്.നിരകളില്‍ പൊലിയുന്ന ഓരോ ജീവനും വെറുമൊരു കണക്കല്ല, മറിച്ച് പല കുടുംബങ്ങളുടെയും പ്രതീക്ഷകളാണ്. ലഹരിയും അശ്രദ്ധമായ ഡ്രൈവിംഗും നമ്മുടെ റോഡുകളെ കശാപ്പുശാലകളാക്കി മാറ്റുമ്പോള്‍, ഇതിനെതിരെ ശക്തമായ നിയമനടപടികളും പൊതുജനങ്ങളുടെ ജാഗ്രതയും അത്യന്താപേക്ഷിതമാണ്.

വലിയ രാഷ്ട്രീയ-സാമ്പത്തിക സ്വാധീനമുള്ള കുടുംബം. തങ്ങളുടെ കയ്യിലുള്ള രാഷ്ട്രീയ സ്വാധീനം ഉപയോഗിച്ച് എല്ലാ ആരോപണവും ഇല്ലാതാക്കാന്‍ കഴിയുമെന്ന ധാര്‍ഷ്ട്യമാണ് അവരുടെ മകന്റെ വാക്കുകളിലൂടെ ചര്‍ച്ചയാക്കുന്നത്. അതിന്റെ അഹങ്കാരമാണ് 'മൂന്ന് പേരെ വണ്ടിയിടിച്ചുകൊന്നിട്ടും എന്റെ ബാപ്പ നോക്കിക്കോളും' എന്ന് പച്ചയായി വിളിച്ചുപറയാന്‍ പ്രതിയായ സുഹൈല്‍ സജീവിന് ധൈര്യം നല്‍കിയത്.
ഒരുമിച്ചു പഠിച്ചും തമാശകൾ പറഞ്ഞും സ്വപ്നങ്ങൾ പങ്കുവെച്ചും നടന്ന അതേ കലാലയമുറ്റത്തേക്ക് അവർ വീണ്ടും എത്തി. പക്ഷേ, പതിവുപോലെ പുഞ്ചിരിക്കാനോ, വിശേഷങ്ങൾ പങ്കുവെക്കാനോ അവർക്കായില്ല.

എയർപോർട്ട് റോഡിലുണ്ടായ വാഹനാപകടത്തിൽ ജീവൻ പൊലിഞ്ഞ എം.പി. ഗോപികയുടെയും കെ.വി. ദേവികയുടെയും ചേതനയറ്റ ശരീരങ്ങൾക്കു മുന്നിൽ തൃക്കാക്കര കെ.എം.എം. കോളേജ് ഞായറാഴ്ച കണ്ണീരിലായി.അപകടവാർത്ത അറിഞ്ഞതുമുതൽ വിദ്യാർഥികളും അധ്യാപകരും സഹപാഠികളുമെല്ലാം ഗോപികയും ദേവികയും ബിരുദത്തിനു പഠിച്ച കോളേജിലേക്ക് ഒഴുകിയെത്തി. എല്ലാവർക്കും പ്രിയപ്പെട്ടവരായിരുന്നു ഗോപികയും ദേവികയും. ഇവർ പഠിച്ചിരുന്ന കാലത്ത് ജൂനിയർമാരായിരുന്നവരും ഇപ്പോൾ കോളേജിൽ പഠിക്കുന്നവരുമെല്ലാം പ്രിയ ചേച്ചിമാരുടെ വിയോഗവാർത്തയുടെ ഞെട്ടലിലായിരുന്നു.

ഞായറാഴ്ച വൈകീട്ട് 3.15-ഓടെ ഗോപികയുടെയും ദേവികയുടെയും മൃതദേഹങ്ങളുമായുള്ള ആംബുലൻസുകൾ കോളേജിലെത്തി. പ്രിയപ്പെട്ടവരെ അവസാനമായി ഒരുനോക്ക് കാണാൻ വിദ്യാർഥികൾ കരഞ്ഞുകൊണ്ട് ആംബുലൻസുകൾക്കരികിലേക്ക് ഓടി.ഞായറാഴ്ച രാത്രി 8.50-ഓടെ ദേവികയുടെ മൃതദേഹവുമായി ആംബുലൻസ്‌ എത്തിയപ്പോൾ തേങ്ങലുകളുയർന്നു. വീട്ടുമുറ്റത്ത് കത്തിച്ചുവെച്ച നിലവിളക്കിന് മുൻപിൽ ദേവികയെ കിടത്തിയപ്പോൾ പൊട്ടിക്കരിച്ചിലുയർന്നു. ‘എന്റെ മോളേ...’ എന്നുവിളിച്ചുള്ള അമ്മ സരിതയുടെ കരച്ചിൽ നൊമ്പരക്കാഴ്ചയായി.

കണ്ണീരോടെ അമ്മ മകളുടെ മുഖം തലോടിക്കൊണ്ടിരുന്നു. മുഖത്തേക്കുവീണ പൂവിന്റെ ഇതളുകൾ സരിത മാറ്റിവെച്ചു. അച്ഛൻ സന്തോഷ് കുമാർ മകളുടെ അടുത്തുതന്നെ ഇരുന്നു. ദേവികയുടെ സഹോദരൻ ദേവാനന്ദ് മുഖംപൊത്തിക്കരഞ്ഞു. ദേവികയുടെ കൂട്ടുകാർ പരസ്പരം കെട്ടിപിടിച്ച് കരഞ്ഞു. വന്നവരെല്ലാം വരിയായിനിന്ന് ദേവികയ്ക്ക് അന്ത്യാഞ്ജലിയർപ്പിച്ചു.ചുവപ്പും മഞ്ഞയും പൂക്കൾ നിറഞ്ഞ റീത്തുകൾ നിറഞ്ഞു. പ്രിയപ്പെട്ടവർ കണ്ണീരോടെ കവിളിൽ തലോടി. കണ്ണൊന്നു തുറക്ക് മോളേ... ആർക്കും ആരെയും ആശ്വസിപ്പിക്കാനായില്ല.