നെടുമ്പാശ്ശേരിയില്‍ മദ്യലഹരിയില്‍ പത്തൊന്‍പതുകാരന്‍ ഓടിച്ച ആഡംബര കാര്‍ ഇടിച്ച് മൂന്നു പേരുടെ ദാരുണാന്ത്യം സംഭവിച്ച അപകടമുണ്ടാക്കിയ പ്രതി സുഹൈല്‍ സജീവിനെതിരെ കേസ് എടുക്കണമെന്ന് അപകടത്തില്‍ മരിച്ച കല്‍പറ്റ മടക്കിമല സന്തോഷ് ഭവനില്‍ കെ.വി.ദേവികയുടെ കുടുംബം. നീതിക്കൊപ്പം സര്‍ക്കാര്‍ നില്‍ക്കുമെന്ന ഉത്തമ വിശ്വാസം ഉണ്ടെന്നും സന്തോഷ് പറഞ്ഞു.

അപകടം ഉണ്ടാക്കിയ കാര്‍ ഓടിച്ച സുഹൈല്‍ സജീവിനെ കുട്ടികളെ പാര്‍പ്പിക്കുന്ന ജയിലില്‍ ആണ് റിമാന്‍ഡ് ചെയ്തതെന്ന് അറിഞ്ഞു. 19 വയസ്സുള്ളയാളെ ഏങ്ങനെ ഒരു കുട്ടിയായി കാണാനാകും. ഇത്ര വലിയ കുറ്റം ചെയ്തയാളെ കുട്ടികളുടെ ജയിലാണോ ഇടേണ്ടത്. പ്രതിയായ മകനെ രക്ഷിക്കാന്‍ സുഹൈലിന്റെ പിതാവിന്റെ ഇടപെടല്‍ തുടങ്ങിയെന്നാണ് കരുതുന്നതെന്നും ദേവികയുടെ പിതാവ് സന്തോഷ് പറഞ്ഞു.

സുഹൈല്‍ മദ്യത്തിനു പുറമേ ലഹരിയും ഉപയോഗിച്ചിരുന്നോ എന്നു സംശയമുണ്ട്. അമിത വേഗത്തില്‍ കാറോടിച്ച സുഹൈല്‍ മൂന്നു കുടുംബങ്ങളുടെ പ്രതീക്ഷകളാണ് ഇല്ലാതാക്കിയത്. സാമ്പത്തികമായി ഏറെ പിന്നാക്കമായ കുടുംബമാണ് ഞങ്ങളുടേത്. സ്ഥലം വിറ്റും വായ്പയെടുത്തും മറ്റുമാണ് ദേവികയെ പഠിപ്പിച്ചത്. മൂന്നുനാലു മാസത്തിനകം ഗള്‍ഫിലേക്ക് പോകാനാകുമെന്ന പ്രതീക്ഷയിലായിരുന്നു ദേവിക.

സുഹൈല്‍ സജീവ് മൂന്നു ബാറില്‍ കയറി മദ്യപിച്ചെന്നും മാധ്യമങ്ങളിലൂടെ അറിഞ്ഞു. അതിവേഗത്തിലാണ് സുഹൈല്‍ കാറോടിച്ചതെന്ന് നാട്ടുകാരും പറഞ്ഞു. എന്നാല്‍ സുഹൈലിന്റെ പേരില്‍ മനഃപൂര്‍വമല്ലാത്ത നരഹത്യയ്ക്കാണ് കേസ് എടുത്തത്. സുഹൈലിനെതിരെ കൊലക്കുറ്റത്തിന് കേസ് എടുക്കണം. എല്ലാം വാപ്പച്ചി നോക്കിക്കൊളളും എന്നു സുഹൈല്‍ പറയുമ്പോള്‍ പണത്തിന്റെ ഹുങ്കും ധിക്കാരവുമാണ് പ്രകടമായത്.

ഇനി ആര്‍ക്കും നമ്മുടെ കുടുംബത്തിന്റെ അവസ്ഥ ഉണ്ടാകരുത്. പൊലീസ് ഇതുവരെയും നല്ല രീതിയിലാണ് പെരുമാറിയത്. വീടിന്റെ വിളക്കാണ് ഞങ്ങള്‍ക്ക് നഷ്ടമായത്. കോടീശ്വരിയായ അമ്മ മകന് പിറന്നാള്‍ സമ്മാനമായി മകനു നല്‍കിയതാണ് ആഡംബര കാര്‍ എന്നറിഞ്ഞു. നമ്മുടെ മകള്‍ പഠിത്തത്തിലും കലാപരിപാടികളിലും മിടുക്കിയായിരുന്നു. ബിബിഎയും ഏവിയേഷന്‍ കോഴ്‌സും നല്ല നിലയില്‍ പാസായി നല്ല ജോലിക്കു ശ്രമിക്കുമ്പോഴാണ് അപകടമുണ്ടായത്. സുഹൈലിനെതിരെ കൂടുതല്‍ വകുപ്പുകള്‍ ചുമത്തി കേസ് എടുക്കണമെന്ന് ദേവിയുടെ അമ്മയുടെ സഹോദരന്‍ സന്ദീപും പ്രതികരിച്ചു.