മാസപ്പടി ഇടപാടുമായി ബന്ധപ്പെട്ട കേസില്‍ പ്രതിപക്ഷ നേതാവ് പിണറായി വിജയന്‍, മകള്‍ വീണ, ഭര്‍ത്താവും മുന്‍മന്ത്രിയുമായ മുഹമ്മദ് റിയാസ് എന്നിവര്‍ നല്‍കിയ ഹര്‍ജികള്‍ ഇന്ന് ഹൈക്കോടതി പരിഗണനയിൽ
മാസപ്പടി ഇടപാടുമായി ബന്ധപ്പെട്ട കേസില്‍ പ്രതിപക്ഷ നേതാവ് പിണറായി വിജയന്‍, മകള്‍ വീണ, ഭര്‍ത്താവും മുന്‍മന്ത്രിയുമായ മുഹമ്മദ് റിയാസ് എന്നിവര്‍ നല്‍കിയ ഹര്‍ജികള്‍ ഇന്ന് ഹൈക്കോടതി പരിഗണിക്കും. തങ്ങളുടെ ഭാഗം കേള്‍ക്കാതെയാണ് സിംഗിള്‍ ബഞ്ച് ഉത്തരവെന്നും മുഖ്യമന്ത്രിയെന്ന നിലയില്‍ സി എം ആര്‍ എല്‍ കമ്പനിക്ക് ഏതെങ്കിലും സഹായം ചെയ്തതായി ഇ ഡി കത്തില്‍ വ്യക്തമാക്കിയിട്ടില്ലെന്നും പിണറായി വിജയന്‍ ഹര്‍ജിയില്‍ വാദിക്കുകയും ചെയ്യുന്നു. തെളിവുകളും വിവരങ്ങളുമുണ്ടെങ്കില്‍ എഫ് ഐ ആര്‍ ഇടാന്‍ പ്രതികളെ കേള്‍ക്കേണ്ടതുണ്ടോ എന്ന് ഹൈക്കോടതി ഡിവിഷന്‍ ബഞ്ച് ഇന്നലെ ചോദിച്ചിരുന്നു.
അപ്പീല്‍ നിലനില്‍ക്കില്ലെന്നും പിണറായി അടക്കമുള്ളവര്‍ക്കെതിരെ വിജിലന്‍സ് കേസ് എടുത്തെന്നും സര്‍ക്കാര്‍ കോടതിയെ അറിയിക്കുകയം ചെയ്തു. സിംഗിള്‍ ബഞ്ച് കേസില്‍ പിണറായി അടക്കമുള്ളവര്‍ എതിര്‍ കക്ഷി അല്ലാത്തതിനാല്‍ അപ്പീല്‍ നല്‍കണമെങ്കില്‍ പ്രത്യേക അനുമതി ആവശ്യമാണെന്ന് ഹൈക്കോടതി ചൂണ്ടിക്കാട്ടി. ഇതേ തുടര്‍ന്ന് നല്‍കിയ പുതിയ അനുമതി അപേക്ഷയാണ് ഇന്ന് ഹൈക്കോടതി പരിഗണിക്കുക.
പൊതുതാത്പര്യ സ്വഭാവമുള്ള ഹര്‍ജിയില്‍ സിംഗിള്‍ ബെഞ്ച് ഉത്തരവ് നിലനില്‍ക്കില്ലെന്ന് പിണറായി ഹര്‍ജിയില്‍ വാദിക്കുന്നു.
ഈ വിഷയത്തില്‍ തനിക്കെതിരേ കേസില്ലെന്ന് സുപ്രീംകോടതി വ്യക്തമാക്കിയതാണ്. വീണയ്ക്കും എക്സാലോജിക് സൊല്യുഷന്‍സിനും കൊടുത്ത പണം തനിക്ക് നല്‍കിയതാണെന്ന് എങ്ങനെ പറയാനാകും.
ഇ ഡി റിപ്പോര്‍ട്ടില്‍ തനിക്കെതിരേ അഴിമതി തടയല്‍ നിയമപ്രകാരമുള്ള കുറ്റം നിലനില്‍ക്കുന്ന വിവരങ്ങള്‍ ഉണ്ടെന്ന കണ്ടെത്തല്‍ തെറ്റാണ്. പ്രാഥമികാന്വേഷണമില്ലാതെ എഫ്‌ഐആര്‍ രജിസ്റ്റര്‍ ചെയ്യാന്‍ നിര്‍ദേശിച്ചതും തെറ്റാണെന്ന് പിണറായി വിജയന്‍ ഹര്‍ജിയില്‍ ഉന്നയിക്കുകയും ചെയ്യുന്നു.
"
https://www.facebook.com/Malayalivartha
