സ്പ്രിംഗ്ളർ ഇടപാട് സംബന്ധിച്ച് വിവാദം കൊഴുക്കുമ്പോൾ മുഖ്യമന്ത്രി പിണറായി വിജയൻ വീണ്ടും വി.എസിന്റെ വിഭാഗീയ പ്രവർത്തനങ്ങൾക്കെതിരെ തിരിയുന്നു. വി.എസ് ആരാഗ്യവാനല്ലെങ്കിലും അദ്ദേഹത്തിന്റെ അനുഗ്രഹവും ആശീർവാദവും സ്പ്രിംഗ്ലർ വിവാദത്തിന് പിന്നിലുണ്ടെന്ന് പിണറായി കരുതുന്നു. വി.എസിന്റെ പഴയ സഹപ്രവർത്തകർ ആരോപണവുമായി രംഗത്തിറങ്ങിയതോടെയാണ് പിണറായിക്ക് സംശയം മൂത്തത്.

സ്പ്രിംഗ്ളർ ഇടപാടിൽ ദിവസേനെ ചാനലുകൾ തോറും കയറിയിറങ്ങി പിണറായിക്കെതിരെ ചർച്ചനയിക്കുന്ന ജോസഫ് സി മാത്യുവിനെയാണ് പിണറായി ലക്ഷ്യം വഹിക്കുന്നത്. വി എസിന്റെ മുൻ പ്രൈവറ്റ് സെക്രട്ടറി കെ.എം. ഷാജഹാനെയും അദ്ദേഹം സംശയത്തിന്റെ മുൾമുനയിൽ നിർത്തുന്നു. എന്നാൽ ഷാജഹാനുമായി വി എസിന് നല്ല ബന്ധമില്ലെന്നാണ് വി എസ് ക്യാമ്പ് നൽകുന്ന സൂചന.

മാധ്യമ സിന്റിക്കേറ്റ് എന്ന് പിണറായി പറഞ്ഞത് വി എസിന്റെ പഴയ അനുയായികൾ ഉൾപ്പെടുന്ന ടീമിനെയാണ്. ഇതിൽ ദേശാഭിമാനിയുടെ മുൻ ലേഖകൻ ജി, ശക്തിധരനെയും പിണറായി ലക്ഷ്യമിടുന്നു. അദ്ദേഹം നേതൃത്വം നൽകുന്ന ജനശക്തി മാസികയിലാണ് പിണറായിയുടെ കണ്ണ്. സർക്കാരിന്റെയും പിണറായിയുടെയും ഏറ്റവും വലിയ വിമർശകരാണ് ജനശക്തി മാസിക .

ജോസഫ് സി മാത്യുവിന് സ്പ്രിംഗ്ളർ കരാറിന്റെ വിശദാംശങ്ങൾ കിട്ടിയത് എവിടെ നിന്നാണെന്ന് അന്വേഷണം നടക്കുന്നുണ്ട്. രമേശ് ചെന്നിത്തലയും ജോസഫ് സി. മാത്യുവും തമ്മിൽ അടുപ്പമുണ്ടോ എന്നും അടുപ്പമുണ്ടെങ്കിൽ അത് എത്രത്തോളം ഉണ്ടെന്നും പിണറായിയും സർക്കാരും അന്വേഷിക്കുന്നുണ്ട്. അതീവ രഹസ്യമായി സൂക്ഷിച്ച രേഖകൾ വരെ പ്രതിപക്ഷം പൊതുജന മധ്യത്തിൽ ചർച്ചക്ക് വച്ചിരിക്കുന്നതിലാണ് സർക്കാരിന് സംശയം.

വി. എസുമായി അടുപ്പം പുലർത്തുന്ന സീതാറാം യച്ചൂരി വിവാദത്തിൽ പിണറായിക്ക് അനുകൂലമായി പ്രതികരിക്കാതിരുന്നതിന് പിന്നിലും മുഖ്യമന്ത്രി സംശയിക്കുന്നത് വി എസിനെ തന്നെയാണ്. വി. എസുമായി അടുപ്പം പുലർത്തുന്ന എം എ ബേബിയുടെ നീക്കങ്ങളും മുഖ്യമന്ത്രി സംശയത്തോടെ കാണുന്നു. തോമസ് ഐസക്കിന്റെ സ്ഥിതിയും വ്യത്യസ്തമല്ല.

സ്പ്രിംഗ്ളർ വിവാദത്തിൽ ഹൈ കോടതിയിൽ പോയ വ്യക്തിയുടെ ഉദ്ദേശലക്ഷ്യങ്ങളും പിണറായി അന്വേഷിക്കുന്നുണ്ട്. ആരും വെറുതെ ഹൈക്കോടതിയിൽ പോകില്ല. പ്രതിപക്ഷമാകട്ടെ പിന്നീടാണ് ഹർജി നൽകിയത്.

വി എസുമായി അടുപ്പം പുലർത്തുന്ന ഒരു മനുഷ്യാവകാശ പ്രവർത്തകനും മുഖ്യമന്ത്രിക്കെതിരെ രംഗത്തെത്തിയിരുന്നു. ഇതെല്ലാം ചേർത്ത് വായിക്കുമ്പോൾ പിണറായിയുടെ ആരോപണങ്ങളെ തള്ളി കളയാൻ കഴിയില്ല.

ഭരണ പരിഷ്ക്കാര കമ്മീഷനെ പിരിച്ചുവിടണം എന്ന ചർച്ചകൾ സജീവമായപ്പോഴാണ് സ്പ്രിംഗ്ളർ വിവാദം ഉണ്ടായതെന്ന കാര്യവും ശ്രദ്ധേയമാണ് .