കേരള കര്‍ണാടക അതിര്‍ത്തിയായ തലപ്പാടി ചെക്ക് പോസ്റ്റിൽ വെഹിക്കിള്‍ സാനിറ്റൈസേഷന്‍ ചേംബര്‍ സജ്ജമാക്കി മോട്ടോര്‍വാഹന വകുപ്പ്. വാഹനങ്ങള്‍ കടന്നുപോകുമ്ബോള്‍ 40 ചെറുദ്വാരങ്ങളിലൂടെ അണുനാശിനി കലര്‍ന്ന വെള്ളം സ്‌പ്രേ ചെയ്യും. 16 അടി ഉയരവും 13 അടി വീതിയും എട്ടടി നീളവുമുണ്ട് ഈ ഇടനാഴിക്ക്.

ഇടനാഴിയിലേക്ക് ഒരു വാഹനം പ്രവേശിക്കാന്‍ തുടങ്ങുന്നതിന് അരമീറ്റര്‍ അകലെയായി രണ്ടുഭാഗത്തും സെന്‍സറുണ്ട്. വാഹനം പ്രവേശിച്ചുതുടങ്ങുമ്ബോള്‍ ഈ സെന്‍സര്‍ പ്രവര്‍ത്തിക്കുകയും പമ്ബിങ് നടക്കുകയും ചെയ്യും. ഒരുതവണ ടാങ്ക് നിറയുമ്ബോള്‍ അതില്‍ അഞ്ചുലിറ്ററോളം സോഡിയം ഹൈപ്പോ ക്ലോറൈഡ് ചേര്‍ക്കും. ഈ മിശ്രിതമാണ് അണുനാശിനിയായി സ്‌പ്രേ ചെയ്യുന്നത്. വശങ്ങളില്‍ ഇരുഭാഗത്തും നാലു തട്ടുകളിലായും മുകളില്‍ മൂന്നു വരികളിലായും നിര്‍മിച്ച പൈപ്പുകളില്‍നിന്നാണ് വെള്ളം പമ്ബുചെയ്യുക.

ഒന്നരമുതല്‍ രണ്ടു വരെ മിനിറ്റെടുത്താകും വാഹനങ്ങള്‍ ഇടനാഴിയിലൂടെ പുറത്തെത്തുക. വാഹനം കടന്നുപോയി കഴിയുമ്ബോള്‍ പമ്ബിങ് തനിയെ നിലയ്ക്കും. ഈ ഇടനാഴിക്ക് അഞ്ചുമീറ്റര്‍ തെക്കുമാറി ആയിരം ലിറ്ററിന്റെ ഒരു സിന്തറ്റിക് ടാങ്കും സ്ഥാപിച്ചു. ചെക്ക് പോസ്റ്റിലെ മോട്ടോര്‍വാഹന ഓഫീസിന്റെ ശുദ്ധജല ടാങ്കില്‍ നിന്ന് ഈ സിന്തറ്റിക് ടാങ്കിലേക്ക് വെള്ളമെത്തിക്കുകയാണ് ചെയ്യുക. ലോക് ഡൗണ്‍ കാലത്ത് പ്രതിദിനം 350 വാഹനങ്ങള്‍ ഇതുവഴി കടന്നുപോകുന്നുണ്ടെന്നും ഇതിന് പ്രതിദിനം 2000 ലിറ്റര്‍ വെള്ളം വേണ്ടിവരുമെന്നുമാണ് കണക്കാക്കുന്നത്.

രണ്ടുലക്ഷത്തിലധികം രൂപ ചെലവുള്ള ഈ സംവിധാനം പയ്യന്നൂര്‍ റോട്ടറി ക്ലബ്ബാണ് സ്‌പോണ്‍സര്‍ ചെയ്തത്. കാഞ്ഞങ്ങാട്ടെ കൃപാസ് ഇന്നൊവേറ്റീവ് ടെക്‌നോളജിയാണ് ഈ ഇടനാഴിയുടെ നിർമാതാക്കൾ.