കോവിഡ്-19ന് കാരണമായ കൊറോണ വൈറസിന്റെ ഉത്ഭവം മൃഗങ്ങളില്‍ നിന്നാണെന്നും, ഇത് ലാബുകളില്‍ കൃത്രിമമായി ഉണ്ടാക്കിയതല്ലെന്നും ലോകാരോഗ്യ സംഘടന. ലഭ്യമായ തെളിവുകള്‍ സൂചിപ്പിക്കുന്നത് മൃഗങ്ങളില്‍ നിന്നുണ്ടായതാണ് ഈ വൈറസ് എന്നാണെന്ന്എന്നാല്‍ ഇത് എങ്ങനെ മനുഷ്യരിലേക്കെത്തി എന്നത് ഇപ്പോളും ചോദ്യമായി തുടരുകയാണ്. വവ്വാലുകള്‍ ഈ വൈറസുകളുടെ സ്വാഭാവിക വാഹകരാണ്. പക്ഷെ അപ്പോഴും വവ്വാലുകളില്‍ നിന്ന് മനുഷ്യരിലേക്കെത്തിയതെങ്ങനെ എന്ന് കണ്ടെത്തേണ്ടിയിരിക്കുന്നു.

കേരളത്തിലെ വവ്വാലുകളിലും കൊറോണ വൈറസ് കണ്ടെത്തി. കേരളമുള്‍പ്പെടെ നാല് സംസ്ഥാനങ്ങളിലെ വവ്വാലുകളിലാണ് കൊറോണ വൈറസിന്റെ സാന്നിധ്യം കണ്ടെത്തിയത്. ഇന്ത്യന്‍ കൗണ്‍സില്‍ ഓഫ് മെഡിക്കല്‍ റിസര്‍ച്ച് നടത്തിയ പരിശോധനയിലാണ് വവ്വാലുകളില്‍ കൊറോണ വൈറസിന്റെ സാന്നിധ്യമുണ്ടെന്ന് കണ്ടെത്തിയത്. വവ്വാലുകള്‍ കൊറോണ വൈറസ് വാഹകരാകാമെന്നും മനുഷ്യരിലേക്ക് വൈറസ് പകരാന്‍ സാധ്യതയുണ്ടെന്നും ഐസിഎംആറിന്റെ കണ്ടെത്തലില്‍ പറയുന്നു. 2018-19 വര്‍ഷങ്ങളില്‍ ശേഖരിച്ച സാംപിളുകളാണ് പരിശോധനക്ക് വിധേയമാക്കിയത്.

വിവിധ തരം വവ്വാലുകളില്‍ കൊറോണവൈറസിന്റെ സാന്നിധ്യം കണ്ടെത്തിയിട്ടുണ്ടെന്നും പഠനത്തില്‍ പറയുന്നു. ദശലക്ഷക്കണക്കിന് വര്‍ഷങ്ങളായി വവ്വാലുകള്‍ കൊറോണവൈറസിനെ ശരീരത്തില്‍ വഹിക്കുന്നു. ജേണല്‍ സയന്റിഫിക് റിപ്പോര്‍ട്ടില്‍ പ്രസിദ്ധീകരിച്ച പഠനത്തിലാണ് ഇക്കാര്യം പറയുന്നത്.

സസ്യങ്ങളില്‍ പരാഗണം നടത്തുക, രോഗാണുക്കളെ വഹിക്കുന്ന പ്രാണികളെ ഭക്ഷിക്കുക, ഉഷ്ണമേഖലാവനങ്ങളിലെ മരങ്ങളുടെ വിത്തുകള്‍ വിതരണം ചെയ്യുക തുടങ്ങിയ പല ഉപകാരങ്ങളും വവ്വാലുകളെക്കൊണ്ടുണ്ടെങ്കിലും, അവര്‍ കൊറോണാവൈറസുകളുടെ സ്വാഭാവിക വാഹകര്‍ കൂടിയാണ് എന്നതും ഒരു യാഥാര്‍ത്ഥ്യമാണെന്നും പഠനത്തില്‍ പറയുന്നു.

വവ്വാലുകളുടെ തൊണ്ടയില്‍നിന്നും മലാശയത്തില്‍നിന്നുമാണ് സാംപിളുകള്‍ ശേഖരിച്ചതും പരിശോധനക്ക് വിധേയമാക്കിയതും. ഇവയുടെ തൊണ്ടയില്‍ നിന്നു ശേഖരിച്ച സാംപിളുകളുടെ ഫലം നെഗറ്റീവ് ആണെന്ന് പറയുന്നു. കേരളത്തിലെ പെറ്ററോപസ് വവ്വാലുകളുടെ മലാശയത്തില്‍നിന്നുള്ള 217 സ്രവ സാംപിളുകള്‍ പരിശോധിച്ചതില്‍ 12-ഉം റൂസെറ്റസ് വവ്വാലുകളുടെ മലാശയത്തില്‍നിന്നുള്ള 42 സ്രവ സാംപിളുകളില്‍ നാലും പോസിറ്റീവായിരുന്നു.

വവ്വാലുകളില്‍ വൈറസ് സാന്നിധ്യം കണ്ടെത്തിയ സാഹചര്യത്തില്‍ അതീവ ജാഗ്രത പുലര്‍ത്താന്‍ നിര്‍ദേശമുണ്ട്. മറ്റു സസ്തനികളിലേക്ക് രോഗം പകരാന്‍ സാധ്യതയുണ്ട്. അതുകൊണ്ട് സസ്തനികളെ കൂടുതല്‍ പരിശോധനക്ക് വിധേയമാക്കും. വവ്വാലുകളുടെ ആവാസകേന്ദ്രം ധാരാളം ഉള്ളതിനാല്‍ കേരളത്തില്‍ അതീവ ജാഗ്രത വേണമെന്ന് ഐസിഎംആര്‍ റിപ്പോര്‍ട്ടില്‍ പറയുന്നു.

കൊറോണവൈറസ് കാലങ്ങളായി വവ്വാലുകളുടെ ശരീരത്തിലുണ്ട്. ഇരുവരുടെയും വളര്‍ച്ച ഒരുമിച്ച് തന്നെയാണ് നടന്നതെന്ന് ചിക്കാഗോയിലെ ഫീല്‍ഡ് മ്യൂസിയത്തിലെ ഗവേഷകന്‍ സ്റ്റീവ് ഗുഡ്മാന്‍ പറഞ്ഞു. വവ്വാലുകളിലെ വ്യത്യസ്തമായ 36 വിഭാഗങ്ങളെയാണ് പഠന വിധേയമാക്കിയത്. പശ്ചിമ ഇന്ത്യന്‍ മഹാസമുദ്രത്തിലെയും ആഫ്രിക്കയുടെ സമീപ പ്രദേശങ്ങളിലുമുള്ള വവ്വാലുകളെയാണ് ഇതിനായി ഉപയോഗിച്ചത്. ഇതില്‍ നിന്നാണ് കാലങ്ങളായി വവ്വാലുകളും കൊറോണ വൈറസും തമ്മില്‍ ബന്ധമുണ്ടെന്ന് കണ്ടെത്തിയതെന്ന് സ്റ്റീവ് ഗുഡ്മാന്‍ പറഞ്ഞു.

പലതരത്തിലുള്ള കൊറോണ വൈറസുകളുണ്ട്. വിവിധ തരത്തിലാണ് ഇവ പെരുമാറുക. ഇവയെല്ലാം വസിക്കുന്നത് വവ്വാലുകളുടെ ശരീരത്തിലാണ്. ഇതുവരെ ഇവയെല്ലാം മനുഷ്യ ശരീരത്തിലേക്ക് പ്രവേശിക്കുന്നതായോ പടരുന്നതായോ കണ്ടെത്തിയിട്ടില്ല. അതുകൊണ്ട് തന്നെ അപകടസാധ്യതയുണ്ടെന്ന് പറയാനാവില്ല. ഒരു വൈറസ് ശരീരത്തില്‍ എത്താന്‍ ആ ശരീരത്തിന്റെ ആവാസ വ്യവസ്ഥ വളരെ പ്രധാനമാണെന്നും സ്റ്റീവ് പറയുന്നു.

എന്നാല്‍ വവ്വാലുകളുടെ ശരീരത്തില്‍ ഇത് അപകടകരമല്ലെന്ന് ഡോക്ടര്‍മാര്‍ പറഞ്ഞു. എന്നാല്‍ ഇത് മറ്റ് മൃഗങ്ങളില്‍ വലിയ പ്രശ്നങ്ങളുണ്ടാക്കുമെന്നും പഠനത്തില്‍ പറയുന്നു. ഈ വൈറസുകള്‍ വവ്വാലുകള്‍ക്ക് തീര്‍ത്തും നിരുപദ്രവകരമായിരിക്കെത്തന്നെ, അവയില്‍ നിന്ന് മറ്റു ജീവിവര്‍ഗ്ഗങ്ങളിലേക്ക് പകരാന്‍ ഇടയായാല്‍ അത് അവരെ വളരെ മാരകമായി ആക്രമിക്കാനുള്ള സാധ്യത നിലനില്‍ക്കുന്നുണ്ട് എന്ന് ഗവേഷകര്‍ മുന്നറിയിപ്പ് നല്‍കുന്നുണ്ട്. വുഹാനിലെ ഒരു വെറ്റ് മാര്‍ക്കറ്റില്‍ നിന്നാണ് കൊവിഡ് 19 മനുഷ്യരിലേക്ക് പകര്‍ന്നതെന്ന് റിപ്പോര്‍ട്ടുകള്‍ ഉണ്ടായിരുന്നു.