പ്രവാസികളെ തിരികെ എത്തിക്കുന്നതുമായി ബന്ധപ്പെട്ട് ഇടക്കാല ഉത്തരവ് പുറപ്പെടുവിക്കുക നിലവിലെ സാഹചര്യത്തില്‍ പ്രായോഗികമല്ലെന്ന് ഹൈക്കോടതി. തിരികെ എത്തിക്കുന്നതിന് സ്വീകരിച്ചിരിക്കുന്ന തയ്യാറെടുപ്പുകള്‍ അറിയിക്കണമെന്ന് സംസ്ഥാന സര്‍ക്കാരിന് ഹൈകോടതി നിര്‍ദേശം നല്‍കി.വിദേശത്ത് കഴിയുന്ന ഇന്ത്യക്കാരുടെ കാര്യത്തില്‍ എന്തു നടപടി എടുത്തുവെന്ന് സംസ്ഥാന സര്‍ക്കാരും കേന്ദ്രസര്‍ക്കാര്‍ പ്രവാസികളെ തിരികെ എത്തിക്കുന്നതിന് എന്തു നടപടികള്‍ സ്വീകരിച്ചുവെന്നും അറിയിക്കണമെന്നും കോടതി നിര്‍ദേശിച്ചു.
കേസ് മേയ് അഞ്ചിന് വീണ്ടും പരിഗണിക്കും. പ്രവാസികളെ നിലവിലെ അവസ്ഥയില്‍ നാട്ടിലെത്തിക്കുക പ്രായോഗികമല്ലെന്നും ലോക്ഡൗണിന്റെ രീതി മാറുമെന്നും ലക്ഷക്കണക്കിനായ പ്രവാസികളെ തിരികെ എത്തിക്കാന്‍ നിലവിലെ സാഹചര്യത്തില്‍ പ്രായോഗികമല്ലെന്നും കേന്ദ്രസര്‍ക്കാര്‍ അറിയിച്ചിരുന്നു.പ്രവാസികളുടെ കാര്യത്തില്‍ സഹതാപമുണ്ടെന്നും എന്നാല്‍ സര്‍ക്കാരിന്റെ വാദത്തോട് യോജിക്കാനെ നിലവിലെ അവസ്ഥയില്‍ സാധിക്കുവെന്നും കോടതി അറിയിച്ചു.

ലോക്ഡൗണിന് ശേഷം ഹരജി പരിഗണിക്കുന്നതാകും നല്ലതെന്നും ഹൈകോടതി വ്യക്തമാക്കി. ഗര്‍ഭിണികളായ നഴ്‌സുമാര്‍ അടക്കം കുടുങ്ങി കിടക്കുന്ന കാര്യവും കോടതിയെ അറിയിച്ചിരുന്നു. ഇക്കാര്യത്തില്‍ എന്ത് നടപടികളാണ് സ്വീകരിച്ചിരിക്കുന്നതെന്ന് കേന്ദ്രസര്‍ക്കാര്‍ അറിയിക്കണമെന്നും കോടതി അറിയിച്ചു. മേയ് അഞ്ചിന് ഹരജി വീണ്ടും പരിഗണിക്കുമ്പോള്‍ കേന്ദ്രസര്‍ക്കാര്‍ രേഖമൂലം മറുപടി നല്‍കണമെന്നും കോടതി അറിയിച്ചു.