സ്പ്രിന്‍ക്ലർ കരാർ ഉൾപ്പെടെ തനിക്കെതിരെ ഉയരുന്ന ആരോപണങ്ങള്‍ക്കു പിന്നിൽ സിപിഎം നേതാക്കൾക്കു പങ്കുണ്ടെന്ന സംശയവുമായി മുഖ്യമന്ത്രി പിണറായി വിജയൻ. പാർട്ടിക്കുള്ളിൽ പിണറായിക്കെതിരെ നീങ്ങിയവർക്ക് ഇപ്പോൾ നേരിട്ടുള്ള യുദ്ധത്തിനു ശേഷിയില്ല. അവരിൽ പലരും അദ്ദേഹത്തിന്റെ പക്ഷത്തേക്കു മാറുകയോ നിർജീവമാകുകയോ ചെയ്തു. ഉള്ളിൽ നിന്നൊരു പട ഉണ്ടാകില്ലെന്ന് ഉറപ്പാക്കിയശേഷമാണു പിണറായി വിജയൻ മുഖ്യമന്ത്രി സ്ഥാനത്ത് എത്തുന്നത്. എന്നാൽ പ്രതിപക്ഷ നേതാവ് രമേശ് ചെന്നിത്തല ഉയർത്തുന്ന ആരോപണങ്ങൾ പിണറായിയുടെ ആത്മവിശ്വാസത്തിൽ വിള്ളൽ സൃഷ്ടിച്ചിട്ടുണ്ട്.

ബ്രൂവറി മുതൽ സ്പ്രിന്‍ക്ലർവരെയുള്ള അഴിമതികളെക്കുറിച്ചു ചെന്നിത്തല അക്കമിട്ടാണ് ആരോപണങ്ങൾ ഉന്നയിച്ചത്. ഏറ്റെടുക്കുന്ന വിഷയത്തിൽ ഓരോ ദിവസവും അദ്ദേഹം പുതിയ വെളിപ്പെടുത്തലുകള്‍ നടത്തുന്നു. എല്ലാ വിഷയങ്ങളും എത്രത്തോളം പൊതുമധ്യത്തിൽ ചർച്ചയാകുന്നുണ്ടെന്ന ചോദ്യം സിപിഎമ്മിലെ പലരും ചോദിക്കുന്നുണ്ടെങ്കിലും മുഖ്യമന്ത്രിക്ക് അത് ഉൾക്കൊള്ളാനാവുന്നില്ല. ഭരണപരമായോ രാഷ്ട്രീയമായോ മുഖ്യമന്ത്രിക്കു നേരിട്ടു മറുപടി പറയാൻ സാധിക്കാത്ത ചോദ്യങ്ങളാണു ചെന്നിത്തല ഉയർത്തുന്നത്. ഭരണത്തിൽ എടുക്കുന്ന തീരുമാനങ്ങളും സിപിഎം നയങ്ങളും ഒത്തുപോകുന്നതാണോയെന്ന ചോദ്യമാണു മുഖ്യമന്ത്രിക്കു തലവേദനയാകുന്നത്. സ്പ്രിന്‍ക്ലർ ഉൾപ്പെടെ പാർട്ടിയുടെ നയസമീപനത്തിനു വിരുദ്ധമായ വിഷയങ്ങളിൽ സർക്കാർ തീരുമാനം എടുക്കുമ്പോൾ ഉടൻ ആ വിവരം ചെന്നിത്തലയ്ക്കു ലഭിക്കുന്നുണ്ട്. ചെന്നിത്തലയാകട്ടെ സിപിഎം നയത്തിനു വിരുദ്ധമായ പിണറായിയുടെ സമീപനത്തെക്കുറിച്ചു മറുപടി ആവശ്യപ്പെട്ടുകൊണ്ടിരിക്കുന്നു. സിപിഎമ്മിനുള്ളിൽ നിന്നു വിവരങ്ങൾ ലഭിക്കുന്നതിനാലാണ് പ്രതിപക്ഷ നേതാവ് ആ മട്ടിൽ ചോദ്യം ഉന്നയിക്കുന്നതെന്നാണു പിണറായി കരുതുന്നത്.

സ്പ്രിന്‍ക്ലർ വിഷയത്തിൽ ഒരിക്കൽ മാതമേ ചെന്നിത്തലയ്ക്കു മുഖ്യമന്ത്രി മറുപടി പറഞ്ഞിട്ടുള്ളൂ. പിറ്റേന്നു തന്നെ ചെന്നിത്തല പുതിയ ആരോപണവുമായി എത്തി. അതോടെ പിണറായി ചെന്നിത്തലയ്ക്കുള്ള മറുപടി അവസാനിപ്പിച്ചു. പിന്നീടു മുസ്‌ലിം ലീഗ് എംഎൽഎ കെ.എം.ഷാജിക്കെതിരെ തിരിഞ്ഞ അദ്ദേഹം തുടർന്നുള്ള ദിവസങ്ങളിൽ സിപിഎമ്മിലെ ചെങ്കൊടിപുതച്ച കലാപങ്ങളെക്കുറിച്ച് ഓർമപ്പെടുത്തുകയായിരുന്നു. അതിനാലാണ് സേവ് സിപിഎം ഫോറം പോലുള്ള പഴയ വിഷയങ്ങളിലേക്കു പിണറായി ശ്രദ്ധ മാറ്റുന്നത്. സിഐടിയു സംസ്ഥാന നേതൃത്വവും വി.എസ്.അച്യുതാനന്ദനും തമ്മിലുള്ള പോരാട്ടമാണ് സേവ് സിപിഎം ഫോറത്തിന്റെ കാതൽ. പക്ഷേ, പാർട്ടിക്കുള്ളിലെ എല്ലാ കലാപങ്ങളുടെയും ഇരകളുടെ പട്ടികയിൽ സ്വയം കയറിനിൽക്കുകയാണ് ഇപ്പോൾ പിണറായി വിജയൻ.

സേവ് ഫോറത്തിനുശേഷം അദ്ദേഹം ലാവലിൻ അഴിമതി കേസിലേക്കു കടന്നു. ഈ കേസിന്റെ ആരംഭം മുതൽ പ്രതിപക്ഷം ആയുധമാക്കിയെങ്കിലും പാർട്ടിക്കുള്ളിൽ നിന്നാണു പിണറായിക്കെതിരെ വെല്ലുവിളികൾ ഉയർന്നത്. തന്റെ കുടുംബത്തെ വെട്ടിലാക്കുന്ന വിഷയങ്ങൾ ഇപ്പോഴും ഉയർത്തിക്കൊണ്ടുവരുന്നതിനു പിന്നിൽ സ്വന്തം കൂടാരത്തിൽ ഉള്ളവർ ഉണ്ടോയെന്ന ചോദ്യമാണ് അദ്ദേഹത്തെ അലട്ടുന്നത്.