വെറസ് വ്യാപനം ഗുരുതരമായ ന്യൂയോര്‍ക്കിലെ മൗണ്ട് സീനായ് ആശുപത്രിയിലെ ഡോക്ടര്‍മാരുടെ അഭിപ്രായം ഞെട്ടിപ്പിക്കുന്നതാണ്. കോവിഡ് രോഗികളില്‍ രക്തത്തിന് കട്ടി കൂടാനും രക്തം കട്ടപിടിക്കാനും സാധ്യതയുണ്ടെന്നാണ് ഡോക്ടര്‍മാര്‍ പറയുന്നത്. ഇവിടെ പ്രവേശിപ്പിക്കപ്പെട്ട കോവിഡ് രോഗികളില്‍ ചിലരുടെ അവസ്ഥകള്‍ നിരീക്ഷിച്ചതില്‍ നിന്നാണ് ഇവര്‍ ഈ നിഗമനത്തിലെത്തിയത്. രക്തത്തിന്റെ കട്ടി കൂടുക, വിവിധ അവയവങ്ങളില്‍ രക്തം കട്ട പിടിക്കുക തുടങ്ങിയ ലക്ഷണങ്ങള്‍ ചില കോവിഡ് രോഗികളില്‍ കാണപ്പെട്ടുവെന്നാണ് ഇവര്‍ പറയുന്നത്. ഇത്തരത്തില്‍ രക്തം കട്ട പിടിക്കുന്നത് രോഗികളില്‍ മസ്തിഷ്‌കാഘാതത്തിന് കാരണമാകാമെന്നാണ് ഡോക്ടര്‍മാര്‍ അഭിപ്രായപ്പെടുന്നത്.

മറ്റൊരു വസ്തുത കൊറോണ രോഗികളില്‍ ഈ അവസ്ഥ ഉണ്ടായവരില്‍ പകുതിയും യുവാക്കളായിരുന്നുവെന്നും ന്യൂറോ സര്‍ജനായ ഡോ.ജെ. മോക്കൊ വ്യക്തമാക്കുന്നു. കോവിഡ് വെറുമൊരു ശ്വാസകോശ രോഗമാണെന്ന് മാത്രം കരുതരുതെന്നാണ് ഇത് സൂചിപ്പിക്കുന്നത്. നിലവില്‍ രക്തം കട്ടിയാവുകയോ കട്ട പിടിക്കുകയോ ചെയ്യുന്നതിന്റെ ലക്ഷണങ്ങള്‍ പ്രകടിപ്പിക്കുന്നതിന് മുമ്പ് തന്ന ഇതിനുള്ള മരുന്നുകള്‍ നല്‍കുന്ന ചികിത്സാ രീതിയാണ് തങ്ങള്‍ സ്വീകരിച്ചിരിക്കുന്നതെന്നാണ് ഡോക്ടര്‍മാര്‍ പറയുന്നത്.

അതുപോലെതന്നെ മാര്‍ച്ച് പകുതിയോടെ ഈ ആശുപത്രിയില്‍ സ്ട്രോക്ക് വന്ന 32 പേരെയാണ് മൂന്നാഴ്ചക്കിടെ ചികിത്സിക്കേണ്ടി വന്നത്. തലച്ചോറിലെ ഞരമ്പുകളില്‍ വലിയ ബ്ലോക്കുകളാണ് ഇവരില്‍ ഉണ്ടായത്. ഇവരില്‍ അഞ്ചുപേര്‍ 49 വയസിന് താഴെയുള്ള സ്ട്രോക്ക് വരാന്‍ സാധ്യത കുറവുള്ളവരായിരുന്നു. ഇത്തരത്തില്‍ സ്ട്രോക്ക് വന്ന പകുതിയോളം ആളുകളിലും കോവിഡ്-19 സ്ഥിരീകരിക്കുകയും ചെയ്തു.

ചില കോവിഡ് രോഗികളില്‍ ശ്വാസകോശത്തിലേക്ക് രക്തം സുഗമമായി സഞ്ചരിക്കുന്നില്ലെന്ന് കണ്ടെത്തിയിരുന്നു. ഓരോതവണ ഓക്സിജന്‍ ഉള്ളിലെത്തിയിട്ടും അതിനനുസരിച്ച് രക്തത്തിലേക്ക് അത് എത്തിച്ചേര്‍ന്നില്ല. സമാനമായ സാഹചര്യം ചിലരില്‍ വൃക്കയിലാണ് കണ്ടത്. ഇവിടെയെല്ലാം രക്തം കട്ടപിടിക്കുന്നതാണ് കാരണമെന്നാണ് ഡോക്ടര്‍മാര്‍ പറയുന്നത്. ദീര്‍ഘകാലം വെന്റിലേറ്റര്‍ സഹായത്തോടെ ചലനമറ്റ് ചികിത്സയില്‍ കഴിയുന്നവരില്‍ രക്തം കട്ട പിടിക്കാനുള്ള സാധ്യത കൂടുതലാണ്. എന്നാല്‍ കോവിഡ്-19 ബാധിച്ചവരില്‍ ഇത് വളരെ നേരത്തെയുണ്ടാകുന്നു. വെറസ് ബാധ ഏറ്റവും അധികമായ ചൈനയിലും സമാനമായ ലക്ഷണങ്ങള്‍ റിപ്പോര്‍ട്ട് ചെയ്തിരുന്നുവെന്നാണ് ഇവര്‍ പറയുന്നത്.