വാഹനപരിശോധനയ്ക്കിടെ മുണ്ടക്കയത്ത് ലോറി ഡ്രൈവര്‍ ആറ്റില്‍ ചാടി; കണ്ടെത്താന്‍ പരിശോധന തുടരുന്നു
കഴിഞ്ഞ രാത്രി 11.30-ഓടെ മുണ്ടക്കയത്ത് പോലീസിന്റെ വാഹന പരിശോധനയ്ക്കിടെ തമിഴ്‌നാട് അതിര്‍ത്തിയില്‍ നിന്നും വന്ന മിനിലോറിയിലെ ഡ്രൈവര്‍ ആറ്റില്‍ ചാടി. ഇടുക്കി-കോട്ടയം ജില്ലാ അതിര്‍ത്തിയായ കല്ലേപാലത്തിലാണ് സംഭവം.
കോവിഡ് 19 രോഗഭീതിയുടെ പശ്ചാത്തലത്തില്‍ ഇടുക്കി ജില്ലാ അതിര്‍ത്തിയില്‍ പോലീസ് പരിശോധന ശക്തമാക്കിയിരുന്നു. രാത്രി പച്ചക്കറിയുമായി വന്ന ലോറി പോലീസ് തടഞ്ഞ് ഡ്രൈവറോട് വിവരങ്ങള്‍ തിരക്കി.
കുമളിയില്‍ നിന്നു പത്തനംതിട്ടയിലേക്ക് പച്ചക്കറിയുമായി പോകുന്നുവെന്നാണ് ഡ്രൈവര്‍ പോലീസിനോട് പറഞ്ഞത്. തുടര്‍ന്ന് വിശദമായി വാഹനം പരിശോധിക്കാന്‍ തുനിഞ്ഞതോടെ ഡ്രൈവര്‍ പോലീസിനെ വെട്ടിച്ച് പാലത്തില്‍ നിന്ന് ആറ്റിലേക്ക് ചാടുകയായിരുന്നു.പിന്നാലെ പോലീസ് പരിസരങ്ങളിലെല്ലാം തെരച്ചില്‍ നടത്തിയെങ്കിലും ഫലമുണ്ടായില്ല. പാലത്തില്‍ നിന്ന് ഇയാള്‍ താഴെയുള്ള കുറ്റിക്കാട്ടിലേക്കാണ് വീണതെന്ന് പോലീസ് സംശയിക്കുന്നുണ്ട്.
പിന്നീട് പോലീസ് നടത്തിയ വിശദ പരിശോധനയില്‍ ലോറിയില്‍ നിന്നും 400 ഗ്രാം കഞ്ചാവ് കണ്ടെത്തി. ലോറി മുണ്ടക്കയം പോലീസ് കസ്റ്റഡിയിലെടുത്ത് കേസ് രജിസ്റ്റര്‍ ചെയ്തു. തിരുവല്ല രജിസ്‌ട്രേഷനിലുള്ള വാഹനമാണ് പോലീസിന്റെ കസ്റ്റഡിയിലുള്ളത്. മുങ്ങിയ ഡ്രൈവറെ കണ്ടെത്താന്‍ വാഹന പരിശോധനയടക്കം കര്‍ശന നടപടികള്‍ പോലീസ് സ്വീകരിച്ചിട്ടുണ്ട്.
അതിനിടെ കഴിഞ്ഞ രാത്രിയില്‍ മുണ്ടക്കയം സിഎസ്‌ഐ പള്ളിയില്‍ എത്തി ഒരാള്‍ കപ്യാരോട് വെള്ളം ചോദിച്ചുവെന്ന വിവരം പോലീസിന് ലഭിച്ചിട്ടുണ്ട്. എന്നാല്‍ ഇത് രക്ഷപെട്ട ഡ്രൈവറാണോയെന്ന കാര്യം സ്ഥിരീകരിച്ചിട്ടില്ല.
https://www.facebook.com/Malayalivartha
