നെടുമ്പാശേരിയിൽ ആഡംബര കാറിടിച്ച് 3 പേർ മരിച്ച സംഭവത്തിൽ പെൺകുട്ടികളുടെ മൃതദേഹം വീട്ടിലെത്തിച്ചു. അപകടത്തിൽ ജീവൻ പൊലിഞ്ഞ യുവാക്കൾ നാടിനു തീരാവേദനയായി. നിലവിളിക്കുന്ന അച്ഛനും അമ്മയോടും എന്ത് പറഞ്ഞ് ആശ്വസിപ്പിക്കണമെന്നറിയാതെ കുഴങ്ങി ചുറ്റുമുള്ളവർ. നാട് ഒന്നാകെ മൂവർക്കും അന്ത്യാഞ്ജലി അർപ്പിച്ചു.

പാർട്ട് ടൈം ജോലി ചെയ്തു പഠനം മുന്നോട്ടു കൊണ്ടു പോകുകയായിരുന്നു ഗോപികയും ദേവികയും. കെഎംഎം കോളജിൽനിന്ന് ബിസിഎ പൂർത്തിയാക്കിയ ഗോപിക ഡേറ്റാ അനലിറ്റിക്‌സിൽ ഉപരിപഠനം നടത്തുകയായിരുന്നു.

ബിബിഎ പൂർത്തിയാക്കിയ ദേവിക ലോജിസ്റ്റിക്‌സ് കോഴ്‌സാണു പഠിച്ചിരുന്നത്. കലൂരിലെ സ്ഥാപനത്തിലാണ് ഇരുവരും പഠിച്ചിരുന്നത്. മുഹമ്മദ് ഇയാസും പഠനത്തോടൊപ്പം ജോലിചെയ്താണു മുന്നോട്ടു പോയിരുന്നത്. ഓൺലൈൻ കോഴ്‌സിനൊപ്പം സ്വകാര്യ ഡ്രൈവിങ് സ്‌കൂളിൽ ഹെവി വെഹിക്കിൾ ഡ്രൈവിങ് പഠനത്തിലായിരുന്നു ഇയാസ്.