ഒന്നര പതിറ്റാണ്ടോളം അഭിനയരംഗത്തെ നിറസാന്നിധ്യമായിരുന്ന രവി വള്ളത്തോള്‍ പിന്നീട് നിരവധി സിനിമകളിലും ശ്രദ്ധേയമായ വേഷങ്ങള്‍ ചെയ്തു. തികച്ചും വെള്ളിത്തിരയിലും മിനി സ്ക്രീനിലും സൗമ്യതയുടെ ആള്‍രൂപമായി തിളങ്ങിയ വ്യക്തിത്വമായിരുന്നു രവി വള്ളത്തോള്‍ എന്ന അതുല്യ പ്രതിഭ.

ഒരുകാലത്ത് മലയാളി വീട്ടമ്മമാരുടെയും കോളേജ് കുമാരിമാരുടെയും ഇഷ്ട താരമായിരുന്നു രവി. അഭിനയ പാടവവും സൗന്ദര്യവും സൗമ്യ മനോഭാവവും ഒരാളിലേക്ക് ഇഴുകിച്ചേര്‍ന്നതിനാല്‍ രവി വള്ളത്തോളിന് മിനി സ്ക്രീന്‍ പ്രേക്ഷകരുടെ മനസുകളില്‍ വലിയ ഇടമാണ് ലഭിച്ചത്. മഹാകവി വള്ളത്തോള്‍ നാരായണ മേനോന്റെ അനന്തരവനായ രവിയ്ക്ക് അഭിനയവും സാഹിത്യവും ഏറെ പ്രിയപെട്ടവയായിരുന്നു. അച്ഛന്‍ പ്രശസ്തനായ നാടകകൃത്താണെങ്കിലും ആ മേല്‍വിലാസം ഉപയോഗപ്പെടുത്താന്‍ രവി ആഗ്രഹിച്ചിരുന്നില്ല. മലപ്പുറത്തായിരുന്നു കുടുംബ വീടെങ്കിലും തിരുവനന്തപുരത്തായിരുന്നുത്തോടായിരുന്നു അദ്ദേഹത്തിന് ആത്മ ബന്ധം കൂടുതൽ. പഠനവും തുടര്‍ ജീവിതവുമൊക്കെ തിരുവനന്തപുരത്തായിരുന്നു.. ശിശുവിഹാര്‍ മോഡല്‍ സ്കൂളില്‍ പഠിക്കുമ്ബോഴേ നാടകങ്ങളില്‍ താത്പര്യമുണര്‍ന്നിരുന്നു. മാര്‍ ഇവാനിയോസ് കോളേജില്‍ നിന്നും ബിരുദവും കാര്യവട്ടം കാമ്ബസില്‍ നിന്നും പി.ജിയും ചെയ്തു.

പഠന കാലയളവില്‍ നാടകങ്ങളില്‍ പെണ്‍വേഷങ്ങളാണ് രവി വള്ളത്തോള്‍ അഭിനയിച്ചിരുന്നത്. 1976ല്‍ മധുരം തിരുമധുരം എന്ന ചിത്രത്തിന് വേണ്ടി പാട്ടെഴുതികൊണ്ടാണ് അദ്ദേഹം സിനിമാ ജീവിതത്തിലേക്ക് കടന്ന് വന്നത്. 1986ല്‍ ഇറങ്ങിയ രേവതിയ്ക്കൊരു പാവക്കുട്ടി എന്ന ചിത്രത്തിന്റെ കഥയും രവിയുടേതായിരുന്നു. നാടകത്തിന് വേണ്ടി എഴുതിയ കഥയാണ് സിനിമയാക്കിയത്.

1986ല്‍തന്നെ സീരിയല്‍ രംഗത്തേക്ക് കടന്നു. ദൂരദര്‍ശനിലെ വൈതരണി എന്ന സീരിയിലില്‍ ആയിരുന്നു രംഗപ്രവേശം. അച്ഛന്‍ ടി.എന്‍.ഗോപിനാഥന്‍ നായരുടേതായിരുന്നു സീരിയലിന്റെ തിരക്കഥ. തുടർന്ന് രവി വള്ളത്തോളിനെ തേടി നൂറുകണക്കിന് സീരിയല്‍ വേഷങ്ങളെത്തി.

ലെനിന്‍ രാജേന്ദ്രന്റെ സ്വാതി തിരുനാള്‍ എന്ന ചിത്രത്തിലൂടെ ചലച്ചിത്ര അഭിനയ രംഗത്തേക്ക് കടന്നു. മതിലുകള്‍, കോട്ടയം കുഞ്ഞച്ചന്‍, ഗോഡ്ഫാദര്‍, സര്‍ഗം, കമ്മിഷണര്‍, വിഷ്ണുലോകം, നീവരുവോളം തുടങ്ങി അന്‍പതിലധികം സിനിമകളില്‍ ചെറുതും വലുതുമായ വേഷങ്ങള്‍ കൈകാര്യം ചെയ്തു. അഭിനയത്തിന്റെ ഇടവേളകളിലെല്ലാം എഴുത്തിന് സമയം നീക്കിവച്ചു. മുപ്പതില്‍പ്പരം ചെറുകഥകളെഴുതി. പാട്ടുകളും. 1980 ജനുവരി 1ന് ഗീതാലക്ഷ്മിയുമായി വിവാഹം. എന്നാൽ കുട്ടികളില്ലാത്തതിന്റെ ദു:ഖം മറക്കാൻ അദ്ദേഹം തണല്‍ എന്ന പേരില്‍ ചാരിറ്റബിള്‍ ട്രസ്റ്റ് രൂപീകരിച്ച്‌ മാനസിക വൈകല്യം നേരിടുന്ന കുട്ടികള്‍ക്കായുള്ള പ്രവര്‍ത്തനങ്ങള്‍ തുടങ്ങി.

ഏതാണ്ട് അമ്ബതോളം സിനിമകളിലും വേഷമിട്ടിട്ടുണ്ട്. സ്വാതി തിരുനാളിലെ ഗായകന്റെ വേഷത്തിലായിരുന്നു അരങ്ങേറ്റം. 2014ല്‍ പുറത്തിറങ്ങിയ ദി ഡോള്‍ഫിന്‍സാണ് ഏറ്റവും അവസാനമായി അഭിനയിച്ച ചിത്രം.

സിബി മലയിലിന്റെ നീവരുവോളം, സിദ്ധിഖ് ലാലിന്റെ ഗോഡ്ഫാദര്‍ എന്നിവയില്‍ ശ്രദ്ധേയമായ വേഷങ്ങളായിരുന്നു. ഇരുപത്തിയഞ്ചോളം ചെറുകഥകള്‍ രചിച്ചിട്ടുണ്ട്. രവി വള്ളത്തോളിന്റെ നാടകമായ രേവതിക്കൊരു പാവക്കുട്ടി പിന്നീട് സിനിമയാക്കി.

അമേരിക്കന്‍ ഡ്രീംസ് എന്ന പരമ്ബരയിലെ അഭിനയത്തിനാണ് മികച്ച നടനുള്ള സംസ്ഥാന ടെലിവിഷന്‍ അവാര്‍ഡ് ലഭിച്ചത്. പാരിജാതം എന്ന പരമ്ബരയിലെ അഭിനയത്തിന് ഏഷ്യാനെറ്റ് ടെലിവിഷന്‍ അവാര്‍ഡും ലഭിച്ചിട്ടുണ്ട്. സീരിയലുകളില്‍ പ്രധാന റോളുകള്‍ ചെയ്ത് തിളങ്ങിയെങ്കിലും സിനിമയില്‍ വേണ്ടത്ര ശോഭിക്കാന്‍ അവസരം ഒരുങ്ങിയില്ല. അടൂര്‍ ഗോപാലകൃഷ്ണന്റെ ചിത്രങ്ങളിലടക്കം അഭിനയിക്കാന്‍ കഴിഞ്ഞത് വലിയ ഭാഗ്യമായി അദ്ദേഹം എപ്പോഴും പറയാറുമുണ്ട്. രോഗത്തിന്റെ അവശതകള്‍ അലട്ടിയപ്പോഴാണ് സിനിമാ, സീരിയല്‍ രംഗങ്ങളില്‍ നിന്നും വിട്ടുനിന്നത്. തിരുവനന്തപുരം വഴുതക്കാട്ടെ വസതിയില്‍ വച്ചായിരുന്നു അന്ത്യം.