സംസ്ഥാനത്തെ വലിയ ജില്ലയായ പാലക്കാട് കേരളത്തിലേക്കുള്ള പ്രധാന കവാടമായിനാല്‍ കോവിഡ് രോഗികളുടെ എണ്ണം കൂടുമ്പോള്‍ ജില്ലയില്‍ ആശങ്ക ഏറുന്നു. ഇവിടെയാണ് നിലവില്‍ കൂടുതല്‍ രോഗികളുള്ളത്. രോഗം ബാധിച്ചവരുള്‍പ്പെടെ, വാളയാര്‍വഴി കേരളത്തിലേക്ക് ദിനം പ്രതി എത്തുന്നത് ശരാശരി 1800 പേരാണ്. അധികം പേരും മഹാരാഷ്ട്ര, തമിഴ്‌നാട്, കര്‍ണാടക, ആന്ധ്ര, തെലുങ്കാന തുടങ്ങിയ സംസ്ഥാനങ്ങളില്‍ നിന്നുള്ളവരാണ്. കേരളത്തിന്റെ മറ്റുജില്ലകളിലുള്ള അതിഥി തൊഴിലാളികള്‍ പെര്‍മിറ്റുമായി വേഗത്തില്‍ അതിര്‍ത്തി കടക്കാന്‍ അനധികൃതമായി വാഹനങ്ങളിലെത്തുന്നതും വാളയാറിലേക്ക്.

ജില്ലയില്‍ കോവിഡ് രോഗികളുടെ എണ്ണം 105 ആയി. ഒറ്റപ്പാലം താലൂക്കിലെ റേഷന്‍ കട നടത്തുന്ന വനിതയും രോഗം ബാധിച്ചവരിലുണ്ട്. മൊത്തം 9 പേര്‍ക്കാണ് സമ്പര്‍ക്കം വഴി രോഗമുണ്ടായത്. ബാക്കിയെല്ലാം വിദേശത്തുനിന്നും മറ്റു സംസ്ഥാനങ്ങളില്‍ നിന്നുമെത്തിയവര്‍. രോഗികളില്‍ ഏഴും 10-ഉം മാസം പ്രായമുള്ള കുട്ടികളുമുണ്ട്. നാലുപേര്‍ ആരോഗ്യപ്രവര്‍ത്തകര്‍.

സംസ്ഥാനത്തിന്റെ കണക്കില്‍പ്പെടുത്തിയില്ലെങ്കിലും പാലക്കാട് ടൗണിലുള്ള ഒരാള്‍ കോയമ്പത്തൂരില്‍ കോവിഡ് ബാധിച്ചു നേരത്തെ മരിച്ചു. ജില്ലയില്‍ രോഗം ബാധിച്ചവരുടെ മൊത്തം എണ്ണം 123. 14 പേര്‍ രോഗമുക്തരായി വീടുകളിലേക്കു മടങ്ങി. രോഗികളുടെ എണ്ണം കൂടിയതോടെ ചികിത്സയിലുള്ള കുറച്ചുപേരെ ചെര്‍പ്പുളശേരിക്കു സമീപമുളള സ്വകാര്യമെഡിക്കല്‍ കോളജിലേക്കു മാറ്റാനാണു തീരുമാനം. ജില്ലാ ആശുപത്രി, ഒറ്റപ്പാലം, മണ്ണാര്‍ക്കാട് താലൂക്ക് ആശുപത്രികളിലായാണ് രോഗികളുള്ളത്.

മറ്റു സംസ്ഥാനങ്ങളില്‍ രോഗം അതി തീവ്രമായപ്പോള്‍ ചികിത്സപോലും കിട്ടാത്ത അവസ്ഥയില്‍ നിന്ന് രക്ഷപ്പെട്ടു വന്നവരാണ് മിക്കവരും. ഇനിയും നൂറുക്കണക്കിനാളുകള്‍ വരാനിരിക്കുന്നു. അതിനാല്‍ വരുംദിവസങ്ങളും ജില്ലയുടെ ആരോഗ്യം അത്ര മെച്ചമായിരിക്കില്ല.

പാസ് എടുക്കാനൊന്നും നില്‍ക്കാതെ ഊടുവഴികളിലൂടെ ഇപ്പോഴും നിരവധിപേര്‍ അതിര്‍ത്തി ജില്ലയായ പാലക്കാട് എത്തുന്നു. ഇതുവഴി മറ്റുജില്ലകളിലേക്കു എത്തിപെടുന്നവരും നിരവധി. ഇതര സംസ്ഥാനത്തുനിന്നു വരുന്നവരെ പരിശോധിക്കാനായി വാളയാറില്‍ ആരംഭിച്ച കൗണ്ടറുകളിലെ രണ്ട് ആരോഗ്യപ്രവര്‍ത്തകര്‍ക്കും കോവിഡ് ബാധിച്ചതിന്റെ ക്ഷീണം ഇനിയും വിട്ടുമാറിയിട്ടില്ല. അതേ തുടര്‍ന്ന് ഡോക്ടര്‍ ഉള്‍പ്പെടെ 25 പേരാണാണ് ക്വാറന്റീനിലായത്.

മറ്റുസംസ്ഥാനങ്ങളില്‍ നിന്നുള്ളവര്‍ക്ക് കേരളത്തിലെ മറ്റു ജില്ലകളിലേക്കു വേഗത്തിലെത്താന്‍ കഴിയുന്നത് വാളയാര്‍ വഴിയാണെന്ന ഭൂമിശാസ്ത്രപരമായ പ്രത്യേകതയും പാലക്കാടിനുണ്ട്. പൊലീസ്, ആരോഗ്യം, റവന്യു, ജിഎസ്ടി, ഐടി, ജല അതോററ്റി, വൈദ്യുതി വകുപ്പ്, ജില്ല നിര്‍മ്മിതി കേന്ദ്രം, വിദ്യാഭ്യാസം, തദ്ദേശസ്വയംഭരണം, മോട്ടോര്‍വാഹനവകുപ്പ്, അഗ്‌നിരക്ഷസേന തുടങ്ങിയ വിവിധ വകുപ്പുകളിലെ ഇരുന്നൂറിലേറെ ഉദ്യോഗസ്ഥര്‍ വാളയാറില്‍ ഡ്യൂട്ടിയിലുണ്ട്. ട്രോമോകെയര്‍, സിവില്‍ ഡിഫന്‍സ്, കുടുംബശ്രീ സന്നദ്ധ പ്രവര്‍ത്തകര്‍ ഇതിനു പുറമെയാണ്.രോഗത്തിന്റെ സമൂഹവ്യാപന സാധ്യത സംബന്ധിച്ചു മെഡിക്കല്‍കോളജ് സാമൂഹിക ആരോഗ്യ വിഭാഗവും ജില്ലാമെഡിക്കല്‍ അധികൃതര്‍ സൂചനകളൊന്നും നല്‍കുന്നില്ലെങ്കിലും തള്ളിക്കളയാന്‍ കഴിയില്ലെന്ന് അവര്‍ സമ്മതിക്കുന്നു.

ക്വാറന്റീനിലുള്ളവര്‍ പൊതുസമൂഹവുമായി ഇടപെടുന്നത് തുടര്‍ന്നാല്‍ ആ ആപത്തിനും അധികദിവസം വേണ്ട. ക്വാറന്റീന്‍ ലംഘനം കണ്ടെത്താന്‍ ജില്ലാപൊലീസും ആരോഗ്യവകുപ്പും ത്രിതല സംവിധാനമാണ് ഒരുക്കിയിട്ടുള്ളത്. സാംപിള്‍ ടെസ്റ്റിന് ജില്ലാ ആശുപത്രിയില്‍ കൂടുതല്‍ സംവിധാനം ഏര്‍പ്പെടുത്തിയിട്ടുണ്ട്. ജില്ലയില്‍ വെന്റിലേറ്ററുകള്‍ കാര്യമായി ഉപയോഗിക്കേണ്ട കേസുകളുണ്ടായിട്ടില്ല. അട്ടപ്പാടിയിലെ ആദിവാസി മേഖല ഇതുവരെ സുരക്ഷിതം.

ഇപ്പോള്‍ നിരീക്ഷണത്തിലുള്ളത് മൊത്തം 8,500 പേരാണ്. സംസ്ഥാനത്ത് ആദ്യത്തെ സാമൂഹിക അകലം പാലിക്കല്‍ മാനേജ്‌മെന്റ് സംവിധാനം നടപ്പാക്കിയത് പാലക്കാടാണ്. ജില്ലാകലക്ടറുടെ നേതൃത്വത്തിലാണ് ഈ പദ്ധതി. പാലക്കാട് മെഡിക്കല്‍ കോളജ് കമ്യൂണിറ്റി മെഡിസില്‍ വിഭാഗം സാമൂഹിക ആഘാത നിരീക്ഷണവും നടത്തുന്നു